Author: K.B.

Shoqata e Kosovës për Kërkim dhe Shpëtim ka njoftuar se është aktivizuar pas thirrjes së bërë nga Policia e Kosovës, për të marrë pjesë në operacionin e kërkimit të të riut Yll Hiseni, 18 vjeç, nga fshati Brod i komunës së Shtërpcës.

“Në bazë të thirrjes së bërë nga Policia e Kosovës, Shoqata e Kosovës për Kërkim–Shpëtim mobilizohet për Operacionin e Kërkim–Shpëtimit të personit të humbur Yll Hiseni, 18 vjeçar, nga fshati Brod, komuna Shtërpcë”.

“Të gjitha njësitë janë aktivizuar dhe koordinohen me autoritetet kompetente për të siguruar kërkimin e shpejtë dhe efektiv”, thuhet në njoftimin e shoqatës.

Njësitë e kërkim-shpëtimit janë në terren dhe po punojnë në koordinim të plotë me autoritetet lokale e policore për gjetjen sa më të shpejtë të të zhdukurit.

Një kandidat fitues për deputet në zgjedhjet nacionale të vitit 2025 shpenzon mesatarisht 12,150 euro, sipas raportit “Kostoja e politikës në Kosovë”, të publikuar të enjten nga Democracy Plus dhe Westminster Foundation for Democracy.

Studimi analizon shpenzimet e kandidatëve dhe ndikimin e tyre në konkurrencën politike, barazinë e mundësive dhe integritetin e procesit zgjedhor.

Raporti tregon se një kandidat mesatar shpenzon rreth 9,463 euro, ndërsa ata që nuk arrijnë të fitojnë shpenzojnë vetëm 4,090 euro. Gratë kandidate rezultojnë të kenë shpenzuar dukshëm më shumë se burrat: rreth 15 mijë euro kundrejt 6 mijë eurove të kandidatëve meshkuj.

Graeme Ramshaw, drejtor për Cilësi dhe Inovacion në WFD, theksoi që raporti fokusohet veçanërisht tek rinia dhe gratë. “Për t’u bërë deputet është sfidë jo vetëm pozita, por edhe shpenzimet e nevojshme. Fushatat po bëhen gjithnjë e më të shtrenjta, kandidatët varen nga financimi personal, ndërsa gratë shpesh marrin hua nga familjarët”, u shpreh ai.

Albert Krasniqi nga D+ prezantoi metodologjinë, e cila u mbështet në intervista me kandidatë dhe fokus-grupe me politikanë, gazetarë dhe ekspertë të shoqërisë civile.

Raporti vë në pah se rekrutimi partiak përcaktohet nga popullariteti, mbështetja financiare dhe afërsia me liderët. Analiza e LVV, PDK dhe LDK-së identifikon kritere si përfaqësimi gjeografik, profili profesional dhe lidhjet me komunitetin. Sipas studimit, gjasat për fitore rriten dukshëm për kandidatët që shpenzojnë mbi 8,000 euro.

Të premten e 12 dhjetorit ishte planifikuar të mbahet seanca e radhës në rastin e vrasjes së Liridona Ademajt, ku të dyshuar janë ish-bashkëshorti i saj, Naim Murseli, Granit Plava dhe Kushtrim Kokalla.

Megjithatë, siç raporton gazetarja e Klan Kosova, Qendresa Tërshani, me vendim të Gjykatës Themelore në Prishtinë, seanca është shtyrë për datën 22 dhjetor 2025 me fillim nga ora 09:30.

E kur kjo seancë të mbahet, është planifikuar të paraqiten pamjet e kamerave të sigurisë, të cilat janë dëshmi në këtë proces gjyqësor.

Liridona Ademaj u vra më 29.11.2023 në ora 20:25 në rrugën “Dalip Alshiqi” në fshatin Bërnicë të Prishtinës.

Në Gjykatën Themelore në Prishtinë në seancën e së enjtes është dhënë fjala përfundimtare në gjykimin ndaj ish-shefit të Agjencisë Kosovare për Inteligjencë, Driton Gashi i cili po akuzohet në rastin e njohur si “Gylenistët”. Mbrojtja e të akuzuarit kërkoi aktgjykim lirues, ndërkaq ajo e palës së dëmtuar aktgjykim dënues.

Në këtë rast, Driton Gashi në cilësinë e shefit të Agjencisë Kosovare për Inteligjencë (AKI), akuzohet se ishte angazhuar drejtpërdrejt në dëbimin e 6 shtetasve turq nga Kosova duke shkelur procedurat ligjore, raporton “Betimi për Drejtësi”

Fjalën përfundimtare para gjykatës e kanë dhënë mbrojtja e palës së dëmtuar dhe mbrojtja e të akuzuarit Gashi. Ndërsa, në seancën e 21 nëntorit 2025, prokurorja Habibe Salihu-Statovci, fjalën përfundimtare e kishte dorëzuar me shkrim.

Mbrojtësit i palëve të dëmtuara, avokatët Leotrim Syla dhe Urim Vokshi fjalën përfundimtare e dorëzuan me shkrim.

Ndërsa, avokati Syla ndër të tjera deklaroi se edhe në këtë shqyrtim gjyqësor është vërtetuar se gjashtë shtetasit turq ishin deportuar me qëllim. Të dy mbrojtësit, kërkuan që i akuzuari të mbahet përgjegjës.

Në anën tjetër, mbrojtësi i të akuzuarit Gashi, avokati Florent Latifaj deklaroi se qëndron pranë fjalës përfundimtare të dhënë në shqyrtimin e kaluar.

Ndërsa, gjatë deklarimit të avokatiti Latifaj seanca u mbyll për publikun përkohësisht, për shkak të elaborimit të pjesëve të seancave që ishin të mbyllura për publikun.

Në fund, avokati Latifaj kërkoi që i mbrojturi i tij të lirohet nga akuza, duke theksuar se “duhet të marrë fund turpërimi që i është bërë institucionit të sigurisë në Kosovë”.

“E nderuar Gjykatë, ju lutem të bazoheni në gjetjet e raportit të AKI-së të përpiluar për këta qytetarë të Republikës së Turqisë. Edhe në aktgjykimet dënuese që i kanë marrë në shtetin e vet për organizim të organizatave terroriste të armatosura. Institucioni i AKI-së e ka kryer punën më përpikëri të madhe dhe në respektim të ligjit dhe nuk ka keqpërdorë autorizim por ka mbrojt interesat e vendit. Propozojmë që pas shqyrtimit të provave të nxjerrni aktgjykim lirues dhe ky turprim që iu ka ba institucionit të sigurisë së Kosovës të merr fund këtu”, tha avokati Latifaj.

Më 19 korrik 2023, Themelorja e kishte shpallur fajtor ish-shefin e AKI-së, Driton Gashi, duke e dënuar me 4 vite e 8 muaj burgim, derisa Valon Krasniqi dhe Rrahman Sylemani ishin liruar nga akuza.

Por, në dhjetor 2024, Gjykata e Apelit e ka kthyer këtë rast në rigjykim vetëm sa i përket pikës I të dispozitivit ndaj të akuzuarit Driton Gashi, ndërsa ka vërtetuar lirimin nga akuza për dy të akuzuarit tjerë.

Sipas aktakuzës së ngritur nga Prokuroria Speciale e Republikës së Kosovës më 24 shkurt 2021, Driton Gashi akuzohet se si person zyrtar në kohën e kryerjes së veprës penale drejtor i Përgjithshëm i Agjencisë Kosovare të Inteligjencës, tutje AKI, prej 23 mars 2018, e deri më 29 mars 2018, në Prishtinë, me qëllim që shtetasit e Republikës së Turqisë, Cihan Ozkan, Yusuf Karabina, Kahraman Demirez, Hasan Hyseyn Demir dhe Mustafa Erden, që kishin leje qëndrim të ligjshëm dhe të drejtën e punës në Kosovë dhe Osman Karakoya që kishte bërë kërkesë për leje qëndrim në Kosovë, e të cilit procedura nuk i kishte përfunduar, t’i dëbojë me forcë kundërligjshëm nga Kosova dhe t’i dorëzojë tek autoriteteve turke.

Gjithnjë sipas aktakuzës, Driton Gashi akuzohet se keqpërdori detyrën zyrtare, duke mos i përmbushur detyrat zyrtare sipas kompetencës, në atë mënyrë që Departamentit për Shtetësi, Azil dhe Migracion, më tutje DSHAM, të MPB i rekomandoi revokimin e lejeve të qëndrimit për shtetasit turq Cihan Ozkan, Yusuf Karabina, Kahraman Demirez, Hasan Hyseyn Demir dhe Mustafa Erden dhe mosdhënien e lejes për Osman Karakoya, për arsye se kinse ata paraqesin rrezik për sigurinë kombëtare, fakt që nuk është provuar fare në procedurë të zbatuar në bazë të ligjit, ndërsa të akuzuarit Rrahman Sylejmani, drejtor i Drejtorisë për Migrim dhe të Huaj në Ministrin e Punëve të Brendshme, tutje DMH, i kishte rekomanduar nxjerrjen e gjashtë urdhrave për dëbimin e të dëmtuarave me forcë nga Republika e Kosovës.

PSRK-ja pretendon se i akuzuari Driton Gashi, për këtë procedurë dhe për dëbimin e të dëmtuarve me forcë nga Republika e Kosovës, nuk e ka njoftuar Presidentin dhe Kryeministrin e Republikës së Kosovës, siç parashihet me Ligjin për AKI dhe as Kryeprokurorin e Shtetit siç parashihet me nenin 25 të Ligjit për AKI, dhe se ka tejkaluar po ashtu kompetencat duke përfshirë AKI, në aranzhimin e udhëtimit, transportin dhe pjesëmarrjen në operacionin e dëbimit që nuk ishin kompetenca të agjencisë që drejtonte, pastaj u angazhuan drejtpërdrejt në aksionin e dëbimit të tyre ani pse kjo nuk ishte në kompetencën e tij.

Me këto veprime, PSRK-ja e ngarkon të akuzuarin Driton Gashi se ka kryer veprën penale “Keqpërdorimi i pozitës apo autoritetit zyrtar”, nga neni 422, paragrafi 1 të KPK-së.

Sipas kësaj aktakuze, Valon Krasniqi akuzohej se si person zyrtar, drejtor në DSHAM në MPB, në periudhën kohore prej 23 mars 2018 deri më 29 mars 2018, keqpërdori detyrën zyrtare duke mos i përmbushur detyrat zyrtare sipas kompetencës, në atë mënyrë që në kundërshtim me 91 të Ligjit për të Huaj, mori vendim për revokimin e lejeve të ligjshme të qëndrimit të të dëmtuarave shtetasve Cihan Ozkan, Yusuf Karabina, Kahraman Demirez, Hasan Husein Demir dhe Mustafa Erden dhe në kundërshtim me nenin 44 të të njëjtit ligj për Osman Karakoya, që ishte në procedurë për marrjen e lejes së qëndrimit, pa u përfunduar ajo me vendim të formës së prerë, mirëpo veproi vetëm duke u bazuar në rekomandimin e të akuzuarit Driton Gashi për revokimin e lejeve të qëndrimit për shtetasit turq dhe pa vërtetuar fare nëse informacionet e AKI plotësojnë kriteret ligjore të përcaktuara me ligj për të vërtetuar se të dëmtuarit paraqesin rrezik për sigurinë kombëtare.

Gjithnjë sipas Prokurorisë, po ashtu i akuzuari Valon Krasniqi, përgjegjësitë e tij ligjore për identifikimin e të dëbuarve, sigurimin e fletë-udhëtimeve, sigurimin e kujdesit mjekësor dhe autoritetin për zbatimin e operacionit të dëbimit me forcë të tyre ia kishte kaluar AKI-së dhe Policisë së Kosovës, në këtë mënyrë duke u shkelur të drejtat e të dëmtuarve, të drejtën e qëndrimit dhe punës së ligjshme në Kosovë të dëmtuarve iu ka shkaktuar dëm moral dhe material.

Me këto veprime, PSRK-ja e ngarkonte të akuzuarin Valon Krasniqi se ka kryer veprën penale “Keqpërdorimi i pozitës apo autoritetit zyrtar” nga neni 422, paragrafi 1 të KPK-së të KPK-së.

PSRK-ja e ngarkonte të akuzuarin Rrahman Sylejmani se si person zyrtar, drejtor i DMH, pranë MPB, më 29 mars 2018, në Prishtinë, tejkaloi kompetencat zyrtare në atë mënyrë që nxori gjashtë urdhra për dëbim me forcë të 6 shtetasve të Republikës së Turqisë, të dëmtuarave Cihan Ozkan, Yusuf Karabina, Kahraman Demirez, Hasan Husein Demir dhe Mustafa Erden, që kishin leje qëndrim të ligjshëm qëndrimi dhe pune në Kosovë, dhe Osman Karakoya që ishte në procedurë për marrjen e lejes së qëndrimit dhe punës edhe pse në bazë të nenit 99, par.1 të Ligjit për të Huaj, nuk ishte fare në kompetencë të DMH që drejtonte ai, por në kompetencë të DSHAM.

Ndërsa, thuhet se urdhrat për dëbim me forcë i nxori edhe pse ishin përmbushur asnjë nga kushtet për lëshimin e urdhrit për dëbim me forcë nga neni 97, par. 1 të të njëjtit ligj dhe po ashtu pa e zbatuar procedurën e paraparë në nenin 97, paragrafi 8 i të njëjtit ligj, ndërsa, dëboi me forcë dhe deportojë të dëmtuarin Hasan Husein Gunakan në mënyrë të kundërligjshme edhe pse atij nuk i ishte revokuar fare leja e qëndrimit dhe punës në Kosovë dhe nuk kishte as urdhër për dëbimin e tij, në këtë mënyrë shkeli rënd të drejtat e të dëmtuarve për qëndrim dhe punësim në Kosovë, me ç’rast iu shkaktoi dëm moral dhe material të dëmtuarve.

Me këto veprime, Prokuroria e ngarkonte të akuzuarin Rrahman Sylejmani se ka kryer veprën penale “Keqpërdorimi i pozitës apo autoritetit zyrtar” nga neni 422, paragrafi 1 të KPK-së.

Po ashtu, prokuroria e akuzonte Rrahman Sylejmanin edhe se si person zyrtar, në cilësinë si në piken III- të këtij dispozitivi, gjatë muajit mars 2018 në shkollat “Mehmet Akif”, në Gjakovë dhe Lipjan dhe në shtëpinë në lagjen “Marigona” në Prishtinë, me ndihmën e Policisë së Kosovës, privoi kundërligjshëm nga liria duke i dëbuar dhe deportuar me forcë të dëmtuarit e cekur në dispozitivin III pa ekzistuar asnjë bazë ligjore të paraparë me dispozitat e nenit 29, par.2 dhe 3 të Kushtetutës së Republikës së Kosovës dhe neni 13, paragrafi 1 i Kodit të Procedurës Penale.

Me këto veprime, PSRK e ngarkonte të akuzuarin Rrahman Sylejmani se ka kryer veprën penale “Privimi i kundërligjshëm i lirisë” nga neni 196, par. lidhur me par. 3 të Kodit Penal.

Organizatat e dala nga Ushtria Çlirimtare e Kosovës kanë përgatitur gjithçka për protestën paqësore që do të mbahet në sheshin “Skënderbeu” në Shkup më 13 dhjetor. Kryetari i OVL-UÇK, Hysni Gucati, ka thënë se kanë marrë edhe lejen nga shteti maqedonas për organizimin e protestës.

Gucati u shpreh optimist se kufiri do të jetë i hapur, ndërsa kërkesa e tyre ka qenë që në ditën e protestës të mos jenë të pranishëm kufitarë serbë.

“Jo, nuk besoj se edhe ata nuk e kuptojnë që paqja duhet të mbizotërojë gjithkund. Maqedonët dhe shqiptarët janë shtetformues të Maqedonisë së Veriut. Ata kanë marrë përsipër sigurimin, por shpresoj që kufiri do të jetë i hapur. Kërkesa ime ka qenë që listat serbe të mos jenë në kufi, dhe më është premtuar, por politika sllave nuk është gjithmonë e besueshme”, ka thënë Gucati për EO.

Ai gjithashtu ironizoi deklaratat e kryeministrit maqedonas Hristijan Mickoskit, duke thënë se ato vetëm kanë rritur interesin e shqiptarëve për të marrë pjesë në protestë.

“Jam i bindur që do ta kalojmë perimetrin që kemi menduar. Shqiptarët janë irrituar pak, por i falënderoj Mickoskit që i ka nxitur të dalin dhe të na bashkohen”, shtoi Gucati.

Gucati theksoi se protesta nuk do të provokojë situata konfliktuale.

“Është e domosdoshme të shkojë secili. Unë do të jem prezent bashkë me liderë të ndryshëm shqiptarë nga Maqedonia dhe Kosovë, përfshirë ish-deputetë. Kemi dy leje, një nga Çairi dhe një tjetër nga autoritetet maqedonase. Protesta është paqësore, nuk shkojmë për të provokuar. Ajo mbahet aty ku jetojnë shqiptarët në Shkup, dhe do të zhvillohet në mënyrën më të qetë të mundshme”, ka thënë ai.

Ai shtoi se nuk ka marrë mbështetje nga institucionet e Kosovës, por ka bashkëpunuar me partitë politike shqiptare dhe me mbështetje të kufizuar nga jashtë:

“Institucionet e Kosovës nuk na kanë mbështetur as në këtë protestë, as në të kaluarën. Partitë politike kanë dalë dhe na kanë mbështetur, ndërsa nga qeveria e Shqipërisë ka pasur pak mbështetje dhe disa kundërshtime”, ka thënë Gucati.

OVL-UÇK ka mbajtur protesta në Hagë, Tiranë, Strasbourg e Prishtinë në mbështetje të ish-krerëve të UÇK-së që janë në Gjykatën Speciale.

Instituti Hidrometeorologjik i Kosovës ka njoftuar se gjatë ditëve të fundit është regjistruar rritje e ndotësve në ajër në disa zona të vendit, bazuar në të dhënat e monitorimit të cilësisë së ajrit.

Sipas njoftimit, përkeqësimi i cilësisë së ajrit është shkaktuar nga mjegulla e dendur, lagështia e lartë, mungesa e erërave dhe fenomeni i inversionit termik, të cilat kanë krijuar kushte që favorizojnë grumbullimin e ndotësve në shtresat e ulëta të atmosferës.

“Ulja e temperaturave ka rritur nevojën për ngrohje, duke sjellë rritje të emetimeve ndotëse në ajër”, thuhet më tej në komunikatë.

IHMK thekson se po e monitoron situatën në mënyrë të vazhdueshme dhe u rekomandon personave të ndjeshëm të kufizojnë ekspozimin e gjatë në ambiente të jashtme deri në përmirësimin e kushteve atmosferike.

Në Francë, vendet fqinje si Belgjika, dhe sigurisht në Itali, Mal të Zi, madje edhe në Shqipëri, ku ai lindi 41 vjet më parë, kërkimet për Taulant Tomën janë duke vazhduar.

Arratisja e tij nga burgu i Operas u zbulua nga oficerët një orë e gjysmë pasi shqiptari ishte larguar.

Ishte ora 08:00 e së dielës (7 Dhjetor) dhe dritarja e qelisë së tij kishte një shufër të prerë me sharrë, duke lënë një hapësirë ​​drejtkëndëshe me përmasa 30 me 40 centimetra: shumë e vogël që të futej i burgosuri tjetër, por e mjaftueshme që Taulanti, i cili ishte dobësuar posaçërisht për këtë qëllim, të dilte nga qelia, dhe më pas përdorur një “litar” të bërë me çarçafë të zbriste poshtë.

Ai e kapërceu pengesën e fundit, murin rrethues 6 metra të lartë, me një shfaqje cirku: Taulant Toma sajoi një shkop duke lidhur bishtat e fshesave me shirit ngjitës dhe duke bashkangjitur një grep hekuri, një pajisje mjaftueshëm e fortë për ta mbajtur ndërsa ngjitej.

Arratisja e tij e parë ndodhi në vitin 2009, kur u largua nga burgu i Ternit. I njëjti skenar mbizotëroi: hekura të prerë dhe çarçafë të përdorur si litarë. Shqiptari gjithmonë arrinte t’i pasonte këto arratisje me periudha të gjata fshehjeje.

Kjo zgjati dy muaj, derisa u kap në Casarile, në brendësi të Milanos, dhe u dërgua në burgun e Parmës, një nga mjediset e konsideruara më të sigurta në Itali, ku strehoheshin, për shembull, disa mafiozë të ndaluar nën regjimin e 41 bis.

Një sfidë e re që Taulanti e ndërmori dhe ia doli mbanë katër vjet më vonë. Në shkurt të vitit 2013, arriti të arratisej edhe nga këtu.

Bashkëpunëtori i tij në këtë arratisje u vra pak kohë më vonë, nga një argjendar që po përpiqej ta grabiste. Ai mbeti i lirë deri në shtator.

Autoritetet policore italiane zbuluan se ai ishte arrestuar në Liège të Belgjikës dhe ishte dërguar në burgun Lantin, pak jashtë qytetit. Ndërsa procedurat e ekstradimit zvarriteshin, Taulant Toma nuk humbi kohë. Ishte atëherë që mbështetja e botës kriminale shqiptare u bë më e dukshme. Një fishekzjarr i madh u ndez në oborrin e burgut për të krijuar rrëmujë.

Pastaj, një grup të burgosurish formuan një piramidë në të cilën Taulanti u ngjit. Përtej murit, persona të armatosur e pritën dhe u larguan nga vendngjarja.

Në rastin e fundit, stafi i reduktuar për shkak të festave luajti rol, si dhe fakti më i përgjithshëm se Opera ka “1,338 të burgosur, të kontrolluara nga vetëm 533 oficerë, kur në të vërtetë duhet të ketë të paktën 811”.

Ambasada gjermane ka thënë se moscertfikimi i kandidatëve për deputet të Listës Serbe e dëmton imazhin ndërkombëtar të Kosovës dhe ka ndikim negativ në rrugën drejt integrimit të vendit në BE.

Ambasada ka theksuar se zgjedhjet dhe përgatitjet teknike duhet të jenë të lira nga manovrimet politike të akterëve politikë.

“Siç e theksuam javën e kaluar, procesi zgjedhor dhe përgatitjet teknike për zgjedhjet duhet të jenë të lira nga manovrimet politike nga aktorët politikë. Sjellja penguese e disa anëtarëve të Komisionit Qendror të Zgjedhjeve, të cilët refuzojnë të verifikojnë Listën Serbe dhe kandidatët e saj, ndikon negativisht në reputacionin ndërkombëtar të Kosovës dhe në rrugën e saj drejt integrimit evropian”, kanë thënë për KO, nga Ambasada gjermane.