ATV

Author: G.O.

  • “Nëse nuk e pranoni tani, do të jetë më keq”, ShBA-ja ushtron presion mbi Zelensky-n

    “Nëse nuk e pranoni tani, do të jetë më keq”, ShBA-ja ushtron presion mbi Zelensky-n

    Zyrtarët amerikanë kanë njoftuar aleatët e NATO-s se Uashingtoni synon të ushtrojë presion mbi presidentin ukrainas, Volodymyr Zelensky, për të pranuar një marrëveshje paqeje me Rusinë në ditët në vijim.

    Sipas Guardian, informacioni u dha gjatë një takimi të ambasadorëve të NATO-s në Kiev, të drejtuar nga Sekretari i Ushtrisë Amerikane, Dan Driscoll, pas bisedimeve me Zelensky-n dhe një telefonate me Shtëpinë e Bardhë.

    “Asnjë marrëveshje nuk është perfekte, por duhet të bëhet sa më shpejt të jetë e mundur”, tha Driscoll, ndërsa atmosfera në takim u përshkrua si e tensionuar, me diplomatë evropianë që shprehën dyshime për përmbajtjen dhe mënyrën e zhvillimit të negociatave pa informuar plotësisht aleatët.

    Driscoll e mbrojti këtë qasje:

    “Presidenti Trump dëshiron paqe tani. Sa më shumë njerëz të përfshihen, aq më e vështirë bëhet të ecet përpara me procesin., shkruan euronews.albania.

    Zyrtarët amerikanë paralajmëruan se nëse Kievi nuk e nënshkruan tani, marrëveshja mund të përkeqësohet në të ardhmen.

    Takimi i ardhshëm në Gjenevë

    Këshilltarët e sigurisë kombëtare nga vendet E3 pritet të takohen nesër në Gjenevë me zyrtarë nga Bashkimi Evropian, SHBA dhe Ukraina për të diskutuar planin e paqes të propozuar nga Uashingtoni.

    Çfarë përfshin marrëveshja?

    Drafti për Ukrainën përfshin kushte të vështira për Kievin, duke përfshirë:

    Lëshimin e territoreve tashmë të pushtuara nga Rusia dhe zonave shtesë nën kontroll ukrainas.

    Parashikimin e amnistisë për të gjitha krimet e luftës të kryera gjatë konfliktit.

    Presidenti Zelensky e përshkroi situatën si “një nga më të vështirat në historinë tonë”, duke theksuar se Ukraina po përballet me dilemë midis humbjes së dinjitetit të saj ose të një aleati kyç.

    Reagimet dhe shqetësimet e Evropës

    Njoftimi i SHBA-së habiti disa aleatë evropianë, të cilët nuk ishin informuar për përmbajtjen dhe procesin e negociatave. Shprehën shqetësime se Rusia mund të ketë pasur ndikim në hartimin e marrëveshjes, që po paraqitet ukrainasve si fakt i kryer.

    Drafti dhe kanalet diplomatike

    Drafti thuhet se është hartuar nga këshilltari i Trump, Steve Witkoff, dhe këshilltari i Kremlinit, Kirill Dmitriev, duke shërbyer si kanal komunikimi midis Uashingtonit dhe Moskës. Driscoll pritet të udhëtojë së shpejti në Rusi për bisedime.

    Presidenti rus, Vladimir Putin, tha se Moska kishte marrë një kopje të planit dhe e konsideroi atë si bazë për një zgjidhje përfundimtare paqësore.

    Mesazhi i Zelensky-t

    Zelensky nënvizoi se paqja e vërtetë bazohet gjithmonë në siguri dhe drejtësi të garantuar. Ai theksoi:

    “Përfaqësuesit tanë e dinë se si t’i mbrojnë interesat kombëtare dhe çfarë është e nevojshme për të parandaluar Rusinë të kryejë një pushtim të tretë.”

    Presidenti ukrainas njoftoi bisedime të vazhdueshme me partnerët ndërkombëtarë, të fokusuar tek hapat për t’i dhënë fund luftës dhe garantimin e sigurisë për vendin e tij.

  • Gjakovë, sot protestohet për Daorsa Spahinë: “Nuk ndalemi derisa të vendoset drejtësia”

    Gjakovë, sot protestohet për Daorsa Spahinë: “Nuk ndalemi derisa të vendoset drejtësia”

    Sot, në Gjakovë do të mbahet një protestë për kërkimin e drejtësisë për Daorsa Spahinën, 25-vjeçaren e cila humbi jetën tragjikisht në Tetovë më 6 nëntor.

    Organizatorët e protestës kanë njoftuar se ajo do të nisë në orën 12:00 dhe do të kërkojë veprim të menjëhershëm dhe të vendosur nga institucionet e Kosovës, si dhe drejtësi për Daorsën. Ata akuzojnë shtetin e Maqedonisë së Veriut për lënien e saj të pambrojtur dhe mosveprimin e institucioneve për të siguruar sigurinë e qytetarëve.

    “Daorsa u la e pambrojtur nga institucionet e Maqedonisë së Veriut. Shteti i Kosovës duhet të angazhohet dhe të veprojë me vendosmëri,” deklaruan organizatorët.

    Në një mesazh të fortë, ata shtuan se nee nuk ndalemi derisa të vendoset drejtësia.

    Protesta synon të rrisë ndërgjegjësimin dhe të bëjë presion për një hetim të thelluar dhe përgjegjësi për tragjedinë që goditi familjen dhe shoqërinë.

  • Bien temperaturat, ditën e sotme priten reshje shiu e bore

    Bien temperaturat, ditën e sotme priten reshje shiu e bore

    Ditën e sotme mbi vendin tonë parashihet të mbajë mot kryesisht i vranët, ndërsa herë pas here do të ketë edhe reshje lokale shiu dhe bore.

    Reshjet e borës pritet të shfaqen edhe në disa zona të ulëta, sidomos në pjesën veriore dhe verilindore të vendit, me gjasë duke përfshirë edhe Prishtinën.

    Era do të fryjë drejtimesh të ndryshme, me shpejtësi prej 10-36 km/h.

    Temperaturat do të pësojnë ulje të mëtejshme, me minimale që do të lëvizin prej -1 deri në 4°C, ndërsa ato maksimale prej 2 deri në 7°C.

  • Lëndohet Kapiteni i Kosovës, Amir Rrahmani

    Lëndohet Kapiteni i Kosovës, Amir Rrahmani

    Amir Rrahmani, kapiteni i Kosovës, është lënduar gjatë fitores së Napolit ndaj Atalantas në Serie A.

    Napoli mposhti Atalantan 3-1 në ndeshjen e javës së 12-të të kampionatit italian, e zhvilluar të shtunën në “Stadio Diego Armando Maradona”. Rrahmani, lider i mbrojtjes së Napolit, u detyrua të lërë fushën në minutën e 64-t të takimit për shkak të një lëndimi të papritur. Ai u zëvendësua nga Juan Jesus.

    Në këtë fitore, David Neres shënoi dy gola për napolitanët, ndërsa Noa Lang shënoi golin e tretë. Pjesa tjetër e golave erdhi nga Gianluca Scamacca, i cili realizoi për Atalantën, që nuk arriti të shpëtonte nga humbja.

    Kapiteni i Shqipërisë, Berat Gjimshiti, e luajti të plotë ndeshjen për Atalantan.

    Me këtë fitore, Napoli ngjitet në 25 pikë dhe qëndron në pozita të forta në tabelën e Serie A, ndërsa Atalanta, me 13 pikë, mbetet në mesin e renditjes.

    Rrahmani, 31 vjeç, ka pasur probleme të vazhdueshme me lëndime edhe në fillim të këtij edicioni, dhe mungoi në 12 ndeshje për shkak të një dëmtimi muskulor. Tashmë, mbetet të shihet se sa serioze është lëndimi i tij dhe kur do të kthehet në fushë.

  • (VIDEO) Aksident fatal në cirkun italian: Akrobati humb jetën pas një shfaqjeje të rrezikshme

    (VIDEO) Aksident fatal në cirkun italian: Akrobati humb jetën pas një shfaqjeje të rrezikshme

    Një aksident tragjik ka ndodhur në një cirk në Itali, ku një akrobat humbi jetën para syve të publikut pasi një shfaqje rrezikshme shkoi keq.

    Ngjarja e rëndë ndodhi në qytetin Sant’Anastasia, afër Napolit, gjatë një shfaqjeje nga cirku Imperial Royal, njofton Wanted in Rome.

    Aksidenti ka ndodhur gjatë performancës së famshme të “Globi i Vdekjes”, ku tre motoçiklistë profesionistë hipën të tre njëkohësisht në një sferë të madhe çeliku. Tre burrat, një 26-vjeçar kilian, një 43-vjeçar meksikan dhe një 43-vjeçar kolumbian, ishin duke kryer aktin në errësirë, me dritat LED që ndriçonin vetëm kostumet e tyre.

    Sipas informacioneve të para, akrobati kilian humbi kontrollin e motoçikletës dhe ra nga sfera. Kur u ndezën dritat, u pa menjëherë se gjendja ishte shumë e rëndë.

    Sipas gazetës Corriere della Sera, 26-vjeçari vdiq pak pas aksidentit.

    Tragjedia ndodhi para një audience të mbushur plot, përfshirë një numër të madh fëmijësh, disa prej të cilëve po filmonin shfaqjen me telefonat e tyre.

    Policia ka nisur një hetim dhe po mbledh pamjet amatoreske të vizitorëve për të sqaruar rrethanat e plota të aksidentit. Kryebashkiaku i Sant’Anastasias, Domenico Esposito, e ka cilësuar këtë ngjarje si “shkatërruese” dhe ka shprehur ngushëllime për familjet e viktimës.

    “E di që shumë fëmijë ishin të pranishëm dhe e panë këtë tragjedi”, tha Esposito. “Ne bashkohemi me dhimbjen e familjeve të prekura nga ky incident tragjik.”

    Për të parë videon klikoni në link👇🏻

    https://video.corrieredelmezzogiorno.corriere.it/le-immagini-dell-incidente-mortale-al-circo-di-sant-anastasia/c17bae4d-b8fb-4b89-a55e-d82c2d9f8xlki

  • Prishtina nën vëzhgim të kamerave, në vitin e ardhshëm edhe 600 kamera të reja

    Prishtina nën vëzhgim të kamerave, në vitin e ardhshëm edhe 600 kamera të reja

    Ka përfunduar faza e fundit e projektit për vendosjen e kamerave të sigurisë në kryeqytet, por që Drejtori i Drejtorisë për Siguri dhe Emergjenca në Prishtinë, Lulzim Fushtica, ka bërë të ditur se në 2026-ën do të nisë zgjerimi i madh i këtij sistemi.

    Ai njoftoi se plani i përbashkët me Policinë e Kosovës parasheh vendosjen e afër 600 kamerave të reja në 200 lokacione të Prishtinës, shkruan Ekonomia Online.

    Fushtica tha se deri më tani janë instaluar 165 kamera në 54 lokacione, duke theksuar se ky është vetëm fillimi i projektit afatgjatë për rritjen e sigurisë publike në kryeqytet. Sipas tij, investimet do të vijojnë vitin e ardhshëm me buxhet të planifikuar posaçërisht për këtë projekt.

     “Projekti i parë për vendosjen e kamerave, faza e fundit është përfunduar, deri më tani janë vendosur 165 kamera në 54 lokacione. Kjo është vetëm një pjesë e vogël e asaj çka ne mendojmë të bëjmë. Nga viti tjetër, pra 2026, i kemi paraparë me buxhet që të vazhdojmë dhe plani që është bërë bashkarisht nga Policia e kryeqytetit dhe Drejtoria e Sigurisë, parasheh që të vendosen afër 600 kamera në 200 lokacione në kryeqytet”, tha ai.

    Ai theksoi se përfitimet nga ky sistem janë të drejtpërdrejta dhe të matshme në aspektin e sigurisë publike, kontrollit të trafikut dhe zbulimit e rasteve.

    “Përfitimi është fillimisht parandalimi dhe rritja e sigurisë publike në kryeqytet, kemi të bëjmë me rritje të sigurisë publike në përgjithësi, kemi të bëjmë me kontrollin më të mirë të trafikut, kontrollin më të mirë të mobilitetit dhe zbulimin e rasteve. Deri më tani, sipas të dhënave që i kemi nga Policia e kryeqytetit kemi një rritje të zbulueshmërisë së rasteve deri në 30 për qind, po ashtu edhe një parandalim apo zvogëlim të rasteve deri në 30 për qind dhe deri 100 për qind kemi zbulueshmëri të rasteve ‘godit dhe ik’, pra kur pjesëmarrësit në komunikacion shkaktojnë aksident dhe ikin, për arsye se kamerat janë të vendosura në gjitha hyrjet dhe daljet e kryeqytetit. Të vendosura janë në udhëkryqe, në sheshet kryesore dhe rrugët kryesore, do të vazhdojmë që të vendosen në gjitha pjesët e kryeqytetit sipas vlerësimit të rrezikshmërisë”, tha ai.

    Fushtica bëri të ditur se menaxhimi i sistemit të kamerave bëhet vetëm nga Policia e Kosovës, në përputhje me legjislacionin në fuqi.

    “Sipas ligjit, të vetmit janë Policia e Kosovës, këtë rast Drejtoria e Policisë së kryeqytetit, e cila vetëm se e kemi vendosur një pikë të monitorimit në sektorin e trafikut të kryeqytetit të cilat monitorohen 24/7”, tha ai.

  • Pesë shoferë ndëshkohen për kundërvajtje të rënda në trafik në Ferizaj e Shtime

    Pesë shoferë ndëshkohen për kundërvajtje të rënda në trafik në Ferizaj e Shtime

    Pesë shoferë janë ndëshkuar nga Njësitë e Komunikacionit Rrugor në rajonin e Ferizajt, pasi u kapën duke kryer kundërvajtje të rënda në trafik në Shtime dhe Ferizaj.

    Sipas policisë, më 22 nëntor 2025, në rrugën “Adem Jashari” në Shtime u ndaluan tre shoferë për tejkalim të shpejtësisë dhe një tjetër për tejkalim të rrezikshëm.

    I.R., 31 vjeç, u kap duke vozitur me 90 km/h në zonën me kufizim 40 km/h me veturën VW Golf. Ai u gjobit me 200 euro, mori 2 pikë negative dhe iu pezullua patentë shoferi për 3 muaj.

    Y.B., 30 vjeç, i cili po lëvizte me Audi me 93 km/h në të njëjtën zonë, po ashtu u ndëshkua me 200 euro, 2 pikë negative dhe 3 muaj pezullim të patentës.

    Ndërkohë, B.T., 40 vjeç, u kap duke kryer tejkalim në vijë të plotë me veturën Toyota dhe u ndëshkua me të njëjtën masë.

    M.G., 30 vjeç, që po ngiste VW Caddy, u gjobit për përdorim të telefonit gjatë vozitjes. Policia konstatoi se kjo ishte përsëritje e kundërvajtjes, ndaj u aplikua ndëshkimi maksimal prej 200 euro, 2 pikë negative dhe 3 muaj pezullim të patentë shoferit.

    Në Ferizaj, në rrugën “Brahim Ademi”, u ndalua edhe H.K., 39 vjeç, i cili po voziste VW Golf me 100 km/h në zonën ku kufizimi është 50 km/h. Edhe ai u ndëshkua me 200 euro, 2 pikë negative dhe 3 muaj pezullim të patentës.

    Policia Rajonale e Ferizajt u ka bërë thirrje të gjithë shoferëve që të respektojnë kufizimet e shpejtësisë dhe shenjat e komunikacionit, duke theksuar se shpejtësia e lartë, tejkalimet e pasigurta dhe përdorimi i telefonit gjatë ngasjes rrezikojnë seriozisht jetën dhe pronën e qytetarëve.

  • Gjykata shpall një muaj paraburgim për shoferin që iu gjetën 120 kg narkotikë në autobus

    Gjykata shpall një muaj paraburgim për shoferin që iu gjetën 120 kg narkotikë në autobus

    Gjykata Themelore në Prishtinë ka aprovuar kërkesën e Prokurorisë Speciale për caktimin e masës së paraburgimit prej një muaji ndaj të pandehurit B.K., i dyshuar për blerje, posedim dhe shpërndarje të narkotikëve, si dhe për mbajtje të paautorizuar të armëve.

    I njëjti dyshohet se më 21.11.2025, ka transportuar 120 kg marihuanë nga Shqipëria në Kosovë me autobus, me qëllim dërgimin e saj në shtete të tjera evropiane. Substanca narkotike u gjet në bunkerë të modifikuar nën karrige në autobus.

    Gjykata ka vendosur që B.K. të mbahet në paraburgim për një muaj, duke vlerësuar se masat e tjera nuk do të ishin të mjaftueshme për të parandaluar pengimin e hetimeve ose përsëritjen e veprave penale.

    Ky vendim mund të ankimohet në Gjykatën e Apelit.

  • Irani kërkon ndihmë urgjente për luftimin e zjarrit në pyjet e veta antike

    Irani kërkon ndihmë urgjente për luftimin e zjarrit në pyjet e veta antike

    Irani ka kërkuar ndihmë të menjëhershme ndërkombëtare për ta shuar një zjarr të madh që nisi të përhapet para tri javëve në pyjet e lashta Hirkaniane, të cilat janë në listën i Trashëgimisë Botërore të UNESCO-s që nga viti 2019.

    Zjarri, i cili nisi pranë fshatit Elit në provincën Mazandaran më 31 tetor, u ka shpëtuar përpjekjeve për ta vënë nën kontroll dhe vazhdon të kërcënojë një nga ekosistemet më të vjetra dhe më të pasura në botë.

    Mohammad Jafar Qaempanah, zëvendës i presidentit iranian Masud Pezeshkian, njoftoi më 21 nëntor në X se janë bërë përgatitjet për të “kërkuar me shpejtësi ndihmë nga vendet mike”.

    Derisa Qaempanah nuk tregoi se cilat vende, Shina Ansari, kreu i Departamentit të Mjedisit të Iranit, më vonë konfirmoi se Turqia do të dërgojë dy avionë specialë për shuarjen e zjarreve, një helikopter dhe një ekip prej tetë personash për të ndihmuar në fikjen e flakëve.

    Ansari shtoi se Irani mund të kërkojë ndihmë edhe nga Rusia, “nëse është e nevojshme”.

    Autoritetet pretendojnë se zjarri fillimisht u vu nën kontroll pas disa ditësh, por një “fazë e dytë” u riaktivizua fundjavën e kaluar, njofton rel.

    Megjithatë, aktivistët mjedisorë dhe banorët vendës këmbëngulin se zjarri ka vazhduar të digjet pandërprerë në tri javët e fundit dhe nuk është vënë kurrë plotësisht nën kontroll.

    Tereni i ashpër, moti jashtëzakonisht i ngrohtë dhe grumbullimi i gjetheve të thata dhe pemëve të rrëzuara kanë kontribuar në qëndrueshmërinë dhe përhapjen e zjarrit.

    Pamjet gjatë natës që po qarkullojnë në internet tregojnë shkallën e dëmtimit dhe përpjekjet rraskapitëse të ekipeve të emergjencës dhe vullnetarëve që luftojnë me flakët.

    Mehrdad Khazaei-Poul, kreu i Departamentit të Burimeve Natyrore të Mazandaranit, ia la fajin për zjarrin kryesisht neglizhencës njerëzore.

    “Për fat të keq, disa individë kanë vepruar me pakujdesi, duke shkaktuar zjarrin”, tha ai, duke theksuar se “faktorët natyrorë nuk kanë qenë shkaku kryesor”.

    Pyjet Hirkaniane – rreth 660.000 hektarë prej të cilëve ndodhen në Provincën Mazandaran – janë ndër ekosistemet më të vjetra në botë dhe pjesë e Trashëgimisë Botërore të UNESCO-s.

    Të shtrira përgjatë brigjeve jugore të Detit Kaspik, këto pyje datojnë më shumë se 40 milionë vjet dhe përmbajnë pemë deri në 500 vjet të vjetra, sipas UNESCO-s.

  • I vuri në gjumë me valium vjehrrin dhe vjehrrën dhe ua vodhi paratë, arrestohet dhëndri në Librazhd

    I vuri në gjumë me valium vjehrrin dhe vjehrrën dhe ua vodhi paratë, arrestohet dhëndri në Librazhd

    Një ngjarje e rrallë ka tronditur Librazhdin, ku një person është arrestuar pasi i ka dhënë një çiftit të moshuar dozë të lartë valiumi dhe më pas i ka vjedhur një shumë parash. Sipas informacioneve të Policisë së Shtetit, i dyshuari është 36 vjeç dhe rezulton të jetë dhëndri i çiftit.

    Policia ka publikuar pamje nga arrestimi i të dyshuarit dhe ka bërë me dije se hetimet janë zhvilluar në kuadër të operacionit “Opportunity”.

    “Pas marrjes së njoftimit se dy bashkëshortë ishin dërguar fillimisht në spitalin e Librazhdit dhe më pas në QSUT, në gjendje të rënduar shëndetësore dhe të dyshuar për intoksikim, shërbimet e Komisariatit të Policisë Librazhd organizuan menjëherë punën për zbardhjen e rrethanave të ngjarjes.

    Falë veprimeve të shpejta dhe të koordinuara hetimore, të kryera në bashkëpunim me specialistët e Seksionit për Hetimin e Krimeve kundër Personit në DVP Elbasan dhe nën drejtimin e Prokurorisë, u bë e mundur zbardhja e plotë e ngjarjes, si dhe identifikimi, kapja dhe arrestimi i autorit të dyshuar, shtetasit I. K., 36 vjeç”, thuhet në njoftim.

    Hetimet kanë zbuluar se i dyshuari, i afërm familjar i çiftit, dyshohet se u ka administruar atyre një dozë të lartë medikamenti qetësues, të dyshuar si valium, duke shkaktuar dëmtime të rënda shëndetësore, dhe më pas ka vjedhur një shumë parash në banesën e tyre.

    Policia thekson se çifti i moshuar ndodhet nën kujdesin e mjekëve dhe është jashtë rrezikut për jetën.

    Në cilësinë e provës materiale janë sekuestruar shuma e parave të vjedhura dhe një celular. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.