ATV

Author: ATVLive

  • Behrami: Javën e ardhshme do të vijë një delegacion nga SHBA, do të flasë me Kurtin në gjuhën që ky e kupton

    Behrami: Javën e ardhshme do të vijë një delegacion nga SHBA, do të flasë me Kurtin në gjuhën që ky e kupton

    Analisti politik, Artan Behrami, në emisionin CONTEXT në ATV, tregoi se javën e ardhshme në Kosovë do të vijë një delegacion nga NSA, nga zyra e presidentit Bajden, që merret ekskluzivisht me siguri.

    Ai tha se edhe figura tjera të larta të SHBA-së kanë vizituar Kosovën kohëve të fundit, por që nuk janë bërë publike, pasi që këta të fundit nuk kanë pranuar të dalin në konferencë për shtyp.

    “Diplomatët në Amerikë kanë hek dorë prej Kosovës. Tash është çështje e sigurisë. Pra, në Kosovë këto ditë, nëse jo këtë javë, javën e ardhshme do të vijë një delegacion nga NSA, nga zyra e presidentit Bajden, që merret ekskluzivisht me siguri, ishte një kongresmen, i cili nuk e takoi fare Albin Kuçin dhe nuk u bë lajm në Kosovë, erdh një kongresmen i cili po ashtu merret me siguri, i cili është përgjegjës po ashtu me fut edhe nën sanksione individë edhe personalitete të ndryshme, i cili kur erdh në Kosovë, presidenti Osmani dëshiroi me ia organizu një konferencë për media, sikur asgjë nuk ka ndodhë në marrëdhëniet Kosovë-SHBA, por ai refuzoi dhe nuk pat konferencë të përbashkët për media”, tha Behrami.

    Ai tha se delegacioni që pritet të viujë javën e ardhshme në Kosovë, do të flaës me kryeministrin në gjuhën që ky e kupton, pra atë të kërcënimit.

    “Pra, do ta kemi një delegacion dhe do të flet një delegacion që merr me siguri dhe do të flet një gjuhë të cilën Kryeministri e kupton dhe ajo është gjuha e kërcënimit. Ai për ca një tjera nuk merr vesh. Po ashtu ka funksionu deri sot. Ju e keni domethënë shembullin e targave. E çoi domethënë durimin e amerikanëve deri në pikëpërmbysje, derisa u dash me thirrë dikush edhe me folë me tonë dikun të atyre Taksas me tonë të kaubojve për me për me kuptu ky seriozitetin e çështjes së Veriut. Pra, nuk mundet Albin Kuçi e as ‘Bisla’ me shku edhe me kontrollu Veriun vetë pa Amerikën”, u shpreh Behrami. /atvlive.tv

    Emisionin e plotë e gjeni në videon më poshtë:

  • Kurti ftohet të dëshmojë në rastin e të dyshuarit për krime lufte

    Kurti ftohet të dëshmojë në rastin e të dyshuarit për krime lufte

    Përgatiti: Nora Luta

    Prokuroria Speciale e Kosovës e ka aprovuar kërkesën e mbrojtjes së të dyshuarit për krime lufte, Dragisha Millenkovic, që kryeministri Albin Kurti të intervistohet në cilësinë e dëshmitarit.

    Avokati Dejan Vasic të martën e njoftoi zyrtarisht Kurtin, madje ia dorëzoi edhe pyetjet që planifikon t’ia parashtrojë.

    Ndërsa i gjithë procesi, sipas tij, mund të zgjasë më pak se një orë.

    “Meqë, prokuroria ka aprovuar kërkesën për dëgjim të kryeministrit Albin Kurti në cilësinë e dëshmitarit, sot e kam dorëzuar një kërkesë të re përmes së cilës e kam njoftuar kryeministrin që prokurori special e ka miratuar kërkesën që të ftohet si dëshmitar, dhe i kam lënë të dhënat e mia, nëse ka nevojë që unë të takohem me kryeministrin për përmbajtjen e dëshmisë së tij. I kam dorëzuar edhe pyetjet që për mua janë të rëndësishme për të marrë përgjigje nga dëshmitari, dhe mendoj që intervistimi do të mund të zgjasë rreth 15 minuta”, tha Vasic.

    Avokati i të dyshuarit për krime lufte në burgun e Prishtinës dhe në atë të Lipjanit pret që Kurti t’i përgjigjet pozitivisht ftesës për të dëshmuar rreth ngjarjeve që pretendon se lidhen me klientin e tij.

    “Nuk kemi marrë përgjigje deri tash, ka qenë koha e pushimeve dhe me gjasë kryeministri nuk ka qenë në dispozicion, por pres të marrim përgjigje në këtë, pasi është çështje urgjente, ka të bëjë me çështjen e paraburgimit të të dyshuarit”, tha Vasic.

    Sipas avokatit Dejan Vasic, Kurti si i burgosur në atë periudhë mund të dëshmojë për pafajësinë e Dragisha Millenkovicit, i cili u arrestua në qershor të këtij viti, dhe dyshohet se gjatë luftës, në cilësinë e personit zyrtar në burgun e Prishtinës dhe në atë të Lipjanit, ka kryer krime lufte ndaj popullatës civile.

    Zyra e Kryeministrit nuk ka konfirmuar gjatë ditës se si do të veprojë kryeministri Kurti në këtë rast, i cili gjatë muajit kishte thënë për televizionin që për çdo kërkesë zyrtare, Prokuroria si dhe mbrojtja do të marrin përgjigje.

    Edicionin Qendror të lajmeve në ATV e gjeni në videon më poshtë:

  • Zgjedhjet në veri – kritikohet Udhëzimi Administrativ, pushteti e sheh si zgjidhje të vetme

    Zgjedhjet në veri – kritikohet Udhëzimi Administrativ, pushteti e sheh si zgjidhje të vetme

    Pas përfundimit të hartimit të Udhëzimit Administrativ që mundëson shkarkimin e kryetarëve të komunave veriore përmes peticionit, Partia Demokratike e Kosovës(PDK) dhe shoqëria civile kërkon koordinim me ShBA-në dhe BE-në për shpalljen e zgjedhjeve në katër komunat veriore.

    Sipas partisë më të madhe opozitare, qasja e qeverisë që përmes peticionit të lirohen nga funksioni kryetarët aktualë lë për të dëshiruar. Ndërkaq, në Institutin e Kosovës për Drejtësi(IKD) thonë se Udhëzimi Administrativ ka probleme kushtetuese dhe ligjore, andaj zgjidhja më e mirë do të ishte dorëheqja e kryetarëve.

    Në anën tjetër, një mundësi të tillë e përjashtojnë nga partia në pushtet, Lëvizja Vetëvendosje, ku thonë se përveç peticionit s’ka asnjë rrugë tjetër institucionale dhe politike për të shkuar në zgjedhje të parakohshme në veri.

    Shefi i Grupit Parlamentar të PDK-së, Abelard Tahiri thotë për KosovaPress se qasja e qeverisë për situatën në veri lë për të dëshiruar.

    “Si Parti Demokratike e Kosovës kemi një korrektësi dhe bashkëpunim të mirë me Shtetet e Bashkuara të Amerikës dhe Bashkimin Evropian që të gjejmë një zgjidhje, për faktin se i kemi dy kryetarë aty. Në anën tjetër, kur i sheh qasjen dhe hapat e kësaj qeverie në këtë drejtim lënë për të dëshiruar”, thotë Tahiri.

    Kritik ndaj Udhëzimit Administrativ për iniciativën e qytetarëve për largimin e kryetarit të komunës nga detyra është hulumtuesi në IKD, Naim Jakaj.

    Ai thotë se i njëjti ka probleme kushtetuese, ligjore dhe teknike, prandaj, sipas tij zgjidhja e duhur është dorëheqja e kryetarëve në veri.

    “Ne kemi pa se (Udhëzimi Administrativ)ka probleme kushtetuese dhe probleme ligjore. Së dyti ka probleme të tjera që janë teknike sa i përket mbledhjes dhe formalizmit të një nisme të caktuar nga një grup i caktuar kryetarësh për të larguar një kryetar komune nga funksioni i tij. Së pari Udhëzimi Administrativ tregon vetëm këtë procedurën teknike të mbledhjes së nënshkrimeve, gjë që është lënë një afat shumë i shkurtër 30 ditor dhe pastaj 15 ditë në rast se nuk mblidhet 20 për qindëshi i numrit të caktuar, që janë votues të regjistruar vitin e fundit. Për komuna të caktuara do të jetë problem ky numër dhe po ashtu për komuna të vogla… Zgjidhja më e mirë do të ishte që kryetarët e komunave në veri për arsye që nuk kanë legjitimitet të plotë për të ushtruar detyrën të japin dorëheqje në mënyrë që të shkojmë në zgjedhje. Udhëzimi Administrativ dhe dorëheqjet e prodhojnë të njëjtin rezultat, mbajtjen e zgjedhjeve në ato komuna”, thekson Jakaj.

    Por këtë kërkesë e sheh të papranueshme deputeti i LVV-së, Adnan Rrustemi. Ai thotë për KosovaPress se përveç peticionit s’ka rrugë tjetër institucionale për largimin e kryetarëve në veri nga detyra.

    Ai shton se s’ka asnjë mundësi që t’iu kërkojnë dorëheqjen atyre, pasi e njëjta mbetet në vullnetin e tyre individual.

    “Institucionalisht dhe politikisht nuk ka rrugë tjetër për të shkuar në zgjedhje përveçse shfrytëzimin e të drejtës që parasheh Ligji për qeverisje lokale, që të kërkohet nga vetë qytetarët largimi i kryetarëve aktual, përmes së paku 20 për qind të nënshkrimeve të votuesve nga ato komuna… Rrugë tjetër për të larguar kryetarët aktual nga detyra nuk ka insitucionalisht dhe politikisht, pastaj pjesa tjetër dorëheqja është veprim moral, individual i kryetarit për të cilin ne nuk kemi as tagër politik, institucional dhe moral për t’ia kërkuar. Ne punojmë si institucione për rrafshin dhe mekanizmat institucionalë për të shkuar drejt zgjedhjeve të parakohshme”, deklaron deputeti Rrustemi.

    Të martën, ministri i Administrimit të Pushtetit Lokal, Elbert Krasniqi, njoftoi se ka përfunduar hartimi i Udhëzimit Administrativ për iniciativën e qytetarëve për largimin e kryetarit të komunës nga funksioni. Sipas tij, ky udhëzim jep mundësinë e zbatimit praktik të një të drejte të garantuar nga Ligji për Vetëqeverisje Lokale.

    Më 10 korrik, Kosova ka arritur marrëveshje me BE-në për ulje të tensioneve në veri, ku është përfshirë edhe mbajtja e zgjedhjeve të reja atje. BE-ja ka bërë thirrje që zgjedhjet në veri të mbahen në një afat sa më të shkurtër kohor./KP

  • Vushtrria edhe me një tjetër subvencion, ndanë 70,000 euro për Kulturë, Rini e Sport

    Vushtrria edhe me një tjetër subvencion, ndanë 70,000 euro për Kulturë, Rini e Sport

    Komuna e Vushtrrisë ka ndarë 70,000.00 euro subvencione për fushën e Kulturës, Rinisë dhe Sportit.

    Këtë e ka bërë të ditur kryetari i kësaj komune Ferit Idrizi, përmes një shkrimi në Facebook.

    Postimi i plotë:

  • Ministria e Mjedisit: S’ka më nevojë për leje për vendosjen e paneleve solare për konsum familjar

    Ministria e Mjedisit: S’ka më nevojë për leje për vendosjen e paneleve solare për konsum familjar

    Ministria e Mjedisit, Planifikimit Hapësinor dhe Infrastrukturës njofton se më qytetarët nuk do të kenë nevojë që të pajisen për leje ndërtimore për vendosjen e paneleve solare fotovoltaike për konsum familjar, me kapacitete të instaluara deri në 7 kW.

    Njoftimi i plotë:

    Në kuadër të punës sonë për Dekarbonizim dhe në përputhshmëri me Acquis të BE-së, kemi bërë Ndryshimin dhe Plotësimin e Udhëzimit Administrativ MMPH Nr. 08/2013 për Ndërtimet për të cilat nuk kërkohet leje ndërtimore, rrjedhimisht, qytetarët nuk do të kenë nevojë që të pajisen me leje ndërtimore për VENDOSJEN E PANELEVE SOLARE fotovoltaike për konsum familjar, me kapacitete të instaluara deri në 7 kW.

    Në nenin 2, paragrafin 2, të Udhëzimit Administrativ bazë, kemi bërë plotësim ndryshimin me paragrafët e rinj 2.15 dhe 2.16, si në vijim:

    🔹 2.15. Vendosja në çati e paneleve solare fotovoltaike, për prodhim të energjisë elektrike për vet-konsum, që janë konsumator familjar, me kapacitet të instaluar deri në 7 kW, siç definohet me legjislacionin përkatës për energji.

    🔹 2.16. Vendosja e termoizolimit në muret e jashtme të shtëpive familjare ekzistuese, por të cilat nuk e ndryshojnë dukjen/fasadën dhe nuk bien ndesh me nenin 14 nën-paragrafi 1.5 të Ligjit Nr. 04/L-110 për Ndërtim.

  • Dodë Gjergji: Nënë Tereza është pasuruar shpirtërisht derisa ka ndihmuar njerëzit e varfër

    Dodë Gjergji: Nënë Tereza është pasuruar shpirtërisht derisa ka ndihmuar njerëzit e varfër

    Është kremtuar në Prishtinë mesha solemne e ditës së festës së Shën Terezës, në të cilën u kujtuan veprat e humanistes shqiptare.

    Ipeshkvi i Kosovës, Dodë Gjergji, dha mesazhe për paqe derisa përmendi kontributin e Nënë Terezës për të ndihmuar njerëzit e varfër.

    Ai e quajti atë “Nëna e botës”.

    “Nënë Tereza në gjithë jetën e saj është përpjekur që të jetë e përvuajtur deri sa i ka dhënë një gotë ujë të varfëritë atë gjë e ka bërë me përvujtërinë më të madhe të njeriut… Ajo u bë zëri më i famshëm dhe më i fuqishëm në shekullin XX, pse, sepse nuk pati frikë se do ta gjykonin të tjerët as se do të humbtë mbështetjen, se nuk do të merrte ndonjë ‘like’ siç e quajmë tani, ajo thjeshte vazhdojë t’i këndonte himnin e dashurisë me poemën e dashurisë që kishte mësuar nga libri i shenjtë. E gëzimin e zemrës së saj, lumturinë e gëzimit të vet e shprehte me këto fjalë të bukura lum ata që janë të varfër në shpirt, ose i dëshmonte ato fjalë të bukura nëse i jep një gotë ujë atyre, të vegjëlve me ke dhënë mua dhe ishte e bindur se çdo vepër e saj ishte për Krishtin, dhe çdo buzëqeshje e të varfërve është dhuratë për të” tha Dodë Gjergji.

    Po ashtu, Dodë Gjergji u shpreh se kërkesa e Nënës Terezës ishte lutja për njerëzit e varfër edhe kur ajo nuk është më.

    “Ajo kishte vetëm një kërkesë, ‘lutuni për fukaratë e mi, e le të lutemi ne bashkë me të për të gjithë të varfëritë e botës, për të gjithë njerëzit që kanë nevojë për një gotë ujë e nuk ka kush ju jep, që kanë nevojë për një copë bukë e nuk e gjejnë , që kanë nevojë për pak dashuri e nuk e kanë, që kanë nevojë për mua e unë i braktisë” shtoi Gjergji.

    5 shtatori shënon ditën e shenjtërimit të Nënë Terezës misioni i së cilës ishte jeta në shërbim të të tjerëve.

    Shtatë vjet më parë Papa Françesku vendosë të shenjtërojë murgeshën katolike me prejardhje shqiptare./kp

  • Bullgari, shpallet gjendje katastrofe në qytetin turistik jugor për shkak të stuhisë

    Bullgari, shpallet gjendje katastrofe në qytetin turistik jugor për shkak të stuhisë

    Një stuhi shiu ka shkaktuar përmbytje të rënda në qytetin turistik bregdetar të Tsarevos në Bullgari të martën, duke bërë që autoritetet lokale të shpallin gjendjen e katastrofe, tha Drejtoria Rajonale e Brendshme në kryeqytetin rajonal Burgas. Sirenat paralajmëruese tregojnë që njerëzit të evakuohen në vendet më të larta ku ujërat e përmbytjeve nuk mund të arrijnë.

    Zëdhënësja e policisë së Burgasit, Tsvetelina Radneva, tha se shumë thirrje nga njerëzit në vështirësi kanë arritur në linjën e urgjencës 112.

    Disa ekipe zjarrfikësish janë dërguar nga Burgas dhe Primorsko për t’u bashkuar me shërbimet lokale të zjarrit për t’u marrë me pasojat e përmbytjeve.

    Në vendin e njohur të kampingut në Arapya, uji i përmbytjes ka arritur në 2 m.

    Lumi Veleka ka përmbytur rrugën ndërmjet Varvarës dhe Sinemorecit dhe e ka bërë të pakalueshme për qarkullim.

    Instituti Kombëtar i Meteorologjisë dhe Hidrologjisë ka lëshuar një paralajmërim me kod të verdhë për erëra të forta dhe stuhi me bubullima në 15 rajone të vendit dhe kod portokalli për stuhi të forta në rajonin e Burgasit./BTA-KP/

  • AKP inkason mbi 1.2 milion euro nga borxhet e qiramarrësve

    AKP inkason mbi 1.2 milion euro nga borxhet e qiramarrësve

    Agjencia Kosovare e Privatizimit për një muaj ka arritur që të inkasoi 1 milion e 226 mijë euro nga borxhet e qiramarrësve të aseteve të Ndërmarrjeve Shoqërore(NSh).

    AKP njofton se Bordi i Drejtorëve në mbledhjen e saj ka shqyrtuar dhe miratuar: Raportin e Komisionit për Vlerësim të Performancës së Menaxhmentit të AKP-së për vitin 2022, Propozimin e Autoritetit të Likuidimit për shpërndarje për kreditorët e NSH-NHT Rugova-Pejë dhe NSh. magjistralja-Prishtinë, Rregulloren për heqje dorë nga asetet në likuidim sipas nenit 18.3.1 dhe nenit 18.3.2 i Shtojcës së Ligjit Nr. 04/L-034 për AKP-në, Kërkesën nga komuna e Ferizajt për dhënien e pëlqimit për kryerjen e punimeve të dëmeve në objektet shkollore përballë pallatit të sporteve Bill Clinton – Ferizaj, pronë e NSH Plantacioni, Plotësim/ndryshimin e Rregullores për organizim të brendshëm dhe sistematizim të vendeve të punës, Janë aprovuar pikat e rendit të ditës që ndërlidhen me qiradhëniet dhe është aprovuar raporti i Komisionit të banesave me ç’rast janë trajtuar 18 kërkesa të palëve.

    “Gjatë kësaj mbledhje, Bordi u njoftua lidhur me asetin në pronësi të NSh “Ramiz Sadiku” – lagjja Pejton në Prishtinë nga Njësia e Negocimit Direkt si dhe aprovoi 5 raporte fillestar për inicim të procedurës për shitje me negocim direkt që do t’i nënshtrohet procedurave të tjera të parapara me legjislacion për t’u finalizuar shitja sipas raportit përfundimtar i cili do t’i paraqitet Bordit për aprovim”, thuhet në raportin e AKP-së.

  • ​Kurti dhe shefin i OSBE-së në Kosovë flasin për zgjedhjet e parakohshme në veri

    ​Kurti dhe shefin i OSBE-së në Kosovë flasin për zgjedhjet e parakohshme në veri

    Kryeministri i Republikës së Kosovës, Albin Kurti, priti sot në takim shefin e Misionit të OSBE-së në Kosovë, Michael Davenport, me të cilin biseduan për bashkëpunimin ndërmjet Qeverisë së Republikës së Kosovës dhe zyrës së OSBE-së, në Kosovë.

    Ndër të tjerash, diskutuan për procesin e zgjedhjeve të parakohshme në komunat në veri të Kosovës, me ç’rast kryeministri shprehu falënderimin e tij për mbështetjen e OSBE-së në adresimin e legjislacionit sekondar në lidhje me nenin 72 të Ligjit për vetëqeverisje lokale.

    Sipas një komunikate të Qeverisë, në takim, u bisedua edhe për integrimin e komuniteteve jo-shumicë dhe pengesat me të cilat ballafaqohen.

    Në lidhje me këtë, kryeministri Kurti shprehu shqetësimin e tij në lidhje më kërcënimet dhe frikësimet nga Beogradi dhe strukturat ilegale ndaj policëve të rinj nga komuniteti serb të angazhuar së fundmi në Policinë e Kosovës.

  • Sociologu Jeton Brajshori: Sistemi i drejtësisë, fajtori kryesor për vrasjet në Kosovë

    Sociologu Jeton Brajshori: Sistemi i drejtësisë, fajtori kryesor për vrasjet në Kosovë

    Kosova, me një popullsi prej mbi 1 milion banorësh, ka përjetuar një situatë shqetësuese në lidhje me numrin e vrasjeve. Pa kaluar shtatori, numri i vrasjeve këtë vit, thuajse ka arritur numrin e vrasjeve të vitit 2022. Këtë vit, vetëm deri me 4 shtator në Kosovë janë regjistruar 19 vrasje.

    Lidhur me këto statistika, sociologu Jeton Brajshori, në emisionin “A LIVE” në ATV, tha se fajin kryesor e ka sistemi gjyqësor, i cili sipas tij, po dështon t’i penalizojë kriminelët dhe personat të cilët mbajnë armë pa leje.

    “Për arsye se kemi shumë tipa të ndryshëm të vrasësve, pra nga sociopatë, psikopatë, persona të ndryshëm dhe e kemi pasur këtë rastin e fundit që ishte në Prizren, pra për një pusetë që ka qenë diçka jashtëzakonisht absurde, të mirët jeta ndokujt për një pusetë. Çka është ende diçka më e randë, çka mund të ceki është se, është kryer vrasje në prani të gruas dhe vajzës. Kur i kemi pasur ne më herët disa zakone që vrasjet nuk duhet të ndodhin në prani të grave apo fëmijëve, për arsye se kjo nuk përkon nuk ka përku me statusin kanunor të cilin e kemi patur më herët dhe fatmirësisht sot këto gjana duhet të kapërcehen, por dështimi i gjyqësisë që t’i penalizojë kriminelët dhe personat të cilët mbajnë armë pa leje, ne do të kemi vazhdimisht vrasje të tilla, kur e kemi parasysh se i kemi edhe afërsisht 1000 recidivistë të cilët enden të lirë në rrugët e Kosovës, normalisht që krimi vetëm pritet që të ndodhë. Jo që në njëfarë mënyre po ua la fajin, po automatikisht ata janë fajtorë”, tha Brajshori.

    Ai tha se ajo çka është më shqetësuesja lidhur me këto raste është se në shoqërinë tonë, vrasjet kanë filluar të bëhen normalitet.

    “Ekzistojnë faktorë të ndryshëm të cilët e dërgojnë një person të bëjë vrasje, pra që nga problemet me shëndetin mendor, nga problemet e trashëguara më herët, nëse ka me persona të tjerë, po ashtu edhe vrasja në afekt, mirëpo ajo çka është shqetësuese për shoqërinë tonë është se, thjesht vrasjet kanë filluar të bëhen normalitet në shoqërinë tonë. Kjo është ajo e cila është më shqetësuesja për momentin, për arsye se kemi pasur shumë vrasje dhe thjesht njerëzit janë duke marrur si normale që mund të ndodhë një vrasje”, tha Brajshori. /atvlive.tv

    Më shumë detaje rreth kësaj çështje i gjeni në emisionin “A LIVE”, të cilin e gjeni në videon më poshtë: