Rreth 30 nxënës besohet se janë helmuar në Mitrovicë.
Njëri prej tyre, 16 vjeçari, Valdrin Hasani ka thënë për ATV-në se simptomat e helmimit i janë shfaqur pasi ka ngrënë ushqim në një lokal.
“E kam hëngër një hamburger dhe simptomat më janë shfaqur pas një dite si vjellje, barkqitje. Kam pasë shumë temperaturë, kam pasë kokë dhembje, ethe, e që këtu në qendër të mjekësisë familjare janë kujdesur shumë mirë për ne”, tha Hasani.
Agjencia e Ushqimit dhe Veterinës ka dalë menjëherë në vend të ngjarjes dhe ka mbyllur lokalin. Sipas kësaj agjencie higjiena sanitare në këtë lokal nuk ishte në gjendje të mirë derisa lokali nuk ka ofruar dëshmi për pajisjen e stafit me libreza sanitare.
Sidoqoftë gjendja e pacientëve tashmë është e mirë.
Sipas Agjencisë së Ushqimit dhe Veterinarisë, ndaj operatorit ekonomik do të ndërmerren të gjitha masat ligjore konform gjetjeve përfundimtare raporteve të analizave laboratorike.
Takimi i radhës i Komisionit Parlamentar për Stabilizim-Asocim, komision ky i përbashkët i Kuvendit të Kosovës dhe Parlamentit Evropian, ka gjasa të mos mbahet në nëntor, siç ishte planifikuar.
Në një përgjigje për ATV-në, kjo u konfirmua nga kryesuesja e këtij komisioni, Mimoza Kusari-Lila.
“Ende nuk kemi datë të saktë të takimit të radhës të KPSA-së. Parlamenti Evropian nuk e ka anuluar bashkëpunimin, por është me fushata parazgjedhore për zgjedhjet e radhës parlamentare. Prej muajit mars kur kemi pasur takimin e përbashkët në Strasburg, ka pasur indikacione që takimi i nëntorit në Prishtinë, mund të mos ndodhë, për shkak të zgjedhjeve. Megjithatë, ende asgjë të konfirmuar nuk kemi”, tha Kusari-Lila.
Ndonëse, anulimi eventual i këtij takimi sipas Kusari – Lilës, nuk lidhet me masat ndëshkuese të Bashkimit Evropian ndaj Kosovës, kryetarja e Komisionit për Integrime, Rrezarta Krasniqi, ka dyshime.
Sidoqoftë, rëndësia e takimeve të tilla vlerësohet të jetë e madhe.
Marrëveshja e Stabilizim-Asocimit mes Kosova dhe Bashkimit Evropian u nënshkrua më 27 tetor të vitit 2015, teksa hyri në fuqi më 2016.
Vendet që synojnë anëtarësimin në BE-së nënshkruajnë MSA-në, e cila është një kuadër ligjor dhe përkushtim për reforma politike, ekonomike, tregtare ose reforma për të drejtat e njeriut.
Aplikimet iu pranuan, e testet fizike e psikike i kaluan me kohë. Megjithatë, mbi 300 të rinj nga grupi i dytë i rekrutëve të Forcës së Sigurisë, nuk e kanë filluar trajnimin më 2 tetor siç ishte planifikuar.
Nga Ministria e Mbrojtjes, vonesa pohojnë se është shkaktuar nga angazhimi në ushtrimin “Defender Europe 2023.
“FSK nuk ka filluar Stërvitjen bazë për Gjeneratën e dytë si rezultat Ushtrimit “Defender Europe 2023 i cili ka afektuar ne fillimin e stërvitjes për Gjeneratën e parë 2023 për dy muaj vonesë. Në këtë mënyrë për arsye ty përgatitjeve administrative të Komandës së Stërvitjes dhe Doktrinës kërkohet kohë shtesë për fillimin e Gjeneratës së dytë”, thotë gjeneral Ilir Qiriqi, shefi i stafit të ministrit.
Mirëpo, burime të ATV-së bëjnë të ditur se arsye tjetër për shtyrjen e trajnimit të rekrutëve është edhe mungesa e veshmbathjeve. Këto pohime fuqizohen nëse shikohen të dhënat e tenderit për veshmbathje, kontrata për të cilin është nënshkruar para më pak se tri javëve.
Marrë parasysh edhe problemet e mëhershme gjatë tenderimit, njohës të fushës së sigurisë sugjerojnë të ketë lehtësime të këtyre procedurave për këtë ministri.
“Konsideroj se duhet të thjeshtohen procedurat e tenderimit në furnizimin e FSK-së…”, tha profesori i shkencave të sigurisë, Rrahman Sylejmani.
Sidoqoftë, vonesa nuk besohet të ketë ndikim tek zhvillimi i ushtarëve potencialë.
“Nëse shtyhet trajnimi për 2-3 javë nuk shkakton ndonjë pengesë të madhe. Më problem do ishte nëse pas nisjes së trajminit do kishte pauzë për ndonjë arsye”, tha njohësi i çështjeve të sigurisë, Nuredin Ibishi.
Më 19 shtator, Ministria e Mbrojtjes nënshkroi kontratë me vlerë prej 537 mijë euro, për furnizim me uniforma dhe atlete sportive komplet për nevojat e FSK-së.
Forca e Sigurisë së Kosovës që është në procesin 10 vjeçar të transformimit në ushtri, që nga viti 2018, planifikohet t’i ketë maksimalisht 5000 ushtarë aktivë dhe 3000 rezervë.
Mbledhja e radhës në të cilën pritet konstituimi i komisionit hetimor parlamentar për keqpërdorime me rezerva shtetërore pritet të mbahet të martën. Fillimi i punës i këtij komisioni i kërkuar nga opozita tashmë ka dështuar dy herë për shkak të mungesës së anëtarëve nga partia në pushtet.
Por sipas deputetit të PDK-së dhe anëtarit të këtij komisioni, Ferat Shala mungesa e deputetëve të pushtetit është ikje.
Partitë opozitare dhe partia në pushtet kanë shprehur deri tash qëndrime të kundërta lidhur me punën e këtij komisioni.
Sipas opozitës nevoja për themelimin e këtij komisioni është e domosdoshme ndërkaq në Vetëvendosje konsiderojnë se mund të paraqet ndërhyrje në sistemin e drejtësisë, pasi prokuroria është duke hetuar këtë rast.
Kuvendi në seancën e 21 shtatorit me 69 vota për votoi themelimin e Komisionin hetimor parlamentar për rezervat shtetërore.
Destabilizimi, sipas komandantit të KFOR-it, Angelo Michele Ristuccia, ishte qëllimi i sulmit terrorist në Banjskë, më 24 Shtator.
Ai theksoi se sulmi ndaj KFOR-it, më 29 maj, dhe ndaj Policisë, para 12 ditësh, konfirmojnë situatën e paqëndrueshme në veri të Kosovës dhe lehtësinë e përshkallëzimit.
“Ne e dënojmë plotësisht sulmin ndaj Policisë së Kosovës, sepse është absolutisht i papranueshëm. Së dyti, me siguri, me sa dimë dhe duke pasur parasysh cilësinë dhe sasinë e pajisjeve të konfiskuara nga Policia e Kosovës, me siguri qëllimi i kryerësve të këtij krimi, qëllimi i sigurt, është që të krijojnë paqëndrueshmëri, të rrisin destabilitetin dhe kaosin, kjo është e sigurt”, tha komandant i KFOR-it, Angelo Michele Ristuccia.
Përveç njoftimit se po e hetojnë keqpërdorimin e logove të KFOR-it nga terroristët, Ristuccia nuk dha përgjigje të prerë për atë se si u fut në Kosovë arsenali i armëve e municionit të konfiskuar nga Policia.
“Është shumë herët të thuhet se nga janë futur këto armë në Kosovë. Gjithsesi, ne jemi të pranishëm në veri të Kosovës si dhe përgjatë… dhe veprojmë në përputhje me mandatin tonë, pa u ngarkuar me detyra nga subjekte të tjera… Ekziston një marrëveshje teknike ushtarake, e cila përcakton qartë se kush duhet të bëjë çfarë, ka edhe aktivitete teknike dhe procedurale që ne i kryejmë dhe sigurisht që bëjmë maksimumin për t’i kryer këto aktivitete. Sigurisht që terreni këtu, ju e dini më mirë se unë, sepse jetoni këtu në Kosovë, terreni është kompleks, nuk është aq e lehtë të kontrollosh të gjithë terrenin dhe të gjithë vijën kufitare, por ne po bëjmë maksimumin”, tha Michele Ristuccia.
Pasi konkludoi se zgjidhja e vetme e qëndrueshme mund të arrihet në dialog, ai foli për veprimet e ndërmarra nga NATO-ja.
“Në dritën e zhvillimeve të fundit, KFOR-i ka rritur praninë dhe aktivitetin e tij në veri të Kosovës, dhe Këshilli i Atlantikut të Veriut, ka autorizuar vendosjen e forcave shtesë për ta adresuar situatën. Trupat janë tërhequr nga rezervat strategjike të NATO-s për Ballkanin Perëndimor. Mbretëria e Bashkuar po vendos trupa shtesë dhe zbatimi i mëtejshëm do të vazhdojë së shpejti edhe nga aleatët e tjerë, duke përfshirë Rumaninë”, tha Michele Ristuccia.
Komandanti Ristuccia konfirmoi se më 24 Shtator, ishte në koordinim, me siç u shpreh “të gjitha palët”. Javën e ardhshme, ushtaraku italian do t’ia dorëzojë detyrën e komandantit të KFOR-it gjeneralit turk, Ozkan Ulutash.
Mbi 20 milionë euro është shuma që Qeveria detyrohet t’i japë kompanisë “Contour Global” .
Kjo kompani Amerikane, me të cilën Qeveria e udhëhequr nga Ramush Haradinaj, në vitin 2017, nënshkroi kontratë për ndërtimin e termocentralit, me kapacitet 450 megavat, “Kosova e Re”, fitoi betejën në Gjykatën Ndërkombëtare të Arbitrazhit.
Kontrata e nënshkruar në fund të viti 2017, u neglizhua nga Qeveria aktuale, duke bërë kështu që kompania të tërhiqet nga projekti në mars të 2020-ës, duke kërkuar 20 milionë euro dëmshpërblim.
Këtë, ish-ministri i Infrastrukturës në Qeverinë Haradinaj e vlerësoi skandal tjetër të pushtetit.
Por, ndryshe mendojnë ekspertë të energjisë. Sipas ish-drejtuesit komercial në Korporatën Energjetike të Kosovës, realizimi i këtij projekti do të pësonte me rritje enorme të çmimit të energjisë elektrike.
“Kthimi aq i shpejtë i vlerës së investimeve do të bënte që çmimi i energjisë elektrike të rritej dhe të ishte shumë i lartë… Mënyra se si është lidhur kontrata, kushtet e saj të disfavorshme, besoj që i kanë dhënë të drejtë ta anulojë atë kontratë Qeverisë së Kosovës”, tha Palok Berisha, ekspert i energjisë.
Sipas tij, qeveritë duhet të kenë kujdes dhe të mos nënshkruajnë kontrata të cilat kryesisht janë në favor të kompanive investuese.
Ndërtimi i Termocentralit “Kosova e Re” është kundërshtuar, duke u konsideruar si projekt i dëmshëm për mjedisin dhe qytetarët. Jetëgjatësia e Termocentralit “Kosova e Re” është llogaritur të jetë 40 vjet dhe kishe vlerë mbi 1.3 miliard euro.
Teatri ”Faruk Begolli”, në Kolegjin AAB, bëri bashkë studentët nga i gjithë vendi, në ceremoninë e pranimit të studentëve të rinj, të cilët do të jenë pjesë e vitit të ri akademik 2023/2024.
Duke iu uruar mirëseardhje, rektori i Kolegjit, Lulzim Tafa, u foli studentëve për rëndësinë e studimeve në këtë kolegj.
Të entuziazmuar që nga e hëna do të fillojnë rrugëtimin e ri, studentët thonë se zgjodhën AAB-në për shkak të rëndësisë që i jep rrugëtimit akademik.
Studentë të tjerë shprehen të lumtur që këtë vit të ri akademik po e nisin në një kolegj, i cili, sipas tyre, do t’iu ofrojë mundësi të mëdha.
Ky organizim u përmbyll me fjalime e tregime suksesi të ish-studentëve.
Kolegji AAB është institucioni më i madh jopublik i arsimit të lartë në trevat shqiptare.
Prokuroria Speciale e Kosovës nuk është pajtuar me vendimin e Apelit, për ndërprerjen e masës së paraburgimit ndaj tre të dyshuarve për keqpërdorim me rezervat shtetërore.
PSRK-ja ka paraqitur kërkesë në Gjykatën Supreme për mbrojtje të ligjshmërisë, si mjet i jashtëzakonshëm juridik.
Burimet i kanë thënë televizionit se Prokuroria Speciale e konsideron të kundërligjshëm dhe skandaloz lirimin e tyre nga paraburgimi. Sipas tyre, prokuroria po zhvillon hetime intensive dhe është në fazën e ekzaminimit të të gjitha provave të sekuestruara, nga bastisjet në Ministrinë e Industrisë dhe Tregtisë.
Kërkesën e PSRK-së, Gjykata Supreme e ka pranuar më 29 shtator.
“Në Gjykatën Supreme, me datë 29.09.2023, është pranuar kërkesa për mbrojtje të Ligjshmërisë e ushtruar nga Prokurori i Shtetit, ndaj vendimit të Gjykatës së Apelit. Kjo lëndë është në punë që nga data 03.10.2023”, tha Antigona Uka – lutfiu, udhëheqëse e Zyrës për Informim dhe Komunikim me Media në Gjykatën Supreme.
Por, për një kërkesë të tillë nuk është ende në dijeni mbrojtja. Avokati i Ridvan Muharremit, Mahmut Halimi, thotë se nuk pasur bazë ligjore që të dyshuarit të mbahen në paraburgim.
Para një muaji, Gjykata e Apelit i kishte pranuar ankesat e mbrojtjes si të bazuara, duke vendosur që Hafiz Gara, Irfan Lipovica dhe Ridvan Muharremi të lirohen për t’u mbrojtur në liri.
Apeli kishte konsideruar se gjykata nuk ka arritur ta vërtetojë dyshimin e bazuar së të pandehurit kanë kryer veprat penale për të cilat dyshohen.
Dy zyrtarët e Ministrisë së Industrisë dhe Tregtisë, Hafiz Gara e Irfan Lipovica, dyshohen për keqpërdorim të detyrës zyrtare, ndërsa biznesmeni Ridvan Muharremi, i përfolur në publik për afërsi me Vetëvendosjen, dyshohet për ndihmë në kryerjen e kësaj vepre penale.
Ata ishin arrestuar në gusht, gjatë një aksioni të Policisë, nën dyshime se në kundërshtim me procedurat ligjore, sasi e madhe e miellit dhe vajit është paguar pa u pranuar produktet.
Në pyetjen e deputetes nga AAK-ja, Time Kadrijaj, nuk u përgjigj ministri i Shëndetësisë, Arben Vitia.
Deputetja pati pyetje edhe për kryeministrin i cili po ashtu refuzoi të përgjigjej.
“Udhëtimet e tua më të shpeshta kanë qenë në Greqi, por nuk kemi marrë ndonjë njohje?”, tha Kadrijaj.
“As unë nuk do të përgjigjem në pyetjet e juaja. Marrëveshjet ndërkombëtare duhet të votohen e më pas ne mund të përgjigjemi”, tha kryeministri Kurti.
Në seancën e së premtes të Kuvendit, në të cilën pyetjet e deputetëve ishin pika e vetme e rendit të ditës, kryeministri Albin Kurti, bashkë me kabinetin qeveritar, refuzuan t’iu përgjigjen opozitarëve, të cilët nuk po i votojnë marrëveshjet ndërkombëtare.
Vendimi i ekzekutivit nuk i pëlqeu opozitës.
Pas përfundimit të seancës, PDK-ja dhe LDK-ja i kanë quajtur sulm e shantazh qëndrimet e kabinetit qeveritar.
Megjithatë, pesë ministra të cilët ishin të pranishëm në seancë, megjithatë u janë përgjigjur pyetjeve të deputetëve të pushtetit.
Qysh nga fillimi i sesionit pranveror, deputetët e dy partive opozitare, PDK-ja e AAK-ja, kanë refuzuar t’i votojë marrëveshjet ndërkombëtare, të cilat sipas qeverisë kanë vlerë 360 milionë euro.
Sanksionimi i Serbisë pas agresionit të 24 Shtatorit, ishte kërkesë e presidentes Vjosa Osmani në të gjitha takimet bilaterale me liderë të shteteve të ndryshme dhe krerë të institucioneve të Bashkimit Evropian, në Granda të Spanjës.
Teksa kërkoi garantimin e sigurisë së kufirit me Serbinë, presidentja ritheksoi se sanksionimi i shtetit fqinj duhet t’i paraprijë vazhdimit të dialogut.
Por, brenda Bashkimit Evropian nuk ka pajtim të plotë për kërkesën e Kosovës.
Në samitin jo-formal të liderëve të shteteve anëtare të BE-së, kryeministri hungarez Viktor Orban doli haptas në mbrojtje të Serbisë.
“Jo, jo, është qesharake, është e pamundur. Serbët kanë vuajtur nga provokimet e rregullta në dy vjetët e fundit, kështu që duhet ta kuptojmë që kosovarët duhet të sillen në mënyrë tjetër. Mos i provokoni serbët. Provokimet çojnë në përgjigje, kjo rezulton në jo-stabilitet. Pa Serbinë, nuk ka stabilitet në Ballkan. Kështu që unë definitivisht argumentoj që të ndihmojmë Serbinë të stabilizojë rajonin”, tha Orban.
Në samitin ku kryetema ishin procesi i zgjerimit dhe migracioni, kryeministri i Luksemburgut, Xavier Bettel, përmendi Kosovën teksa tha se asnjë shtet nuk mund të anëtarësohet në BE pa zgjidhur konfliktet.
Ndërkaq, krerët e institucioneve të BE-së, në deklarimet publike në Spanjë, nuk folën për sanksionim e Serbisë.
Në margjina të samitit, presidentja Vjosa Osmani takoi homologun e saj Volodymyr Zelenskyy –për çka bëri përshkrim të shkurtë me tri fjalë: qëndresë, stoicizëm dhe shpresë.
