Author: ATVLive

Presidenti Joe Biden dhe ish Presidenti Donald Trump janë drejt një përballjeje tjetër në zgjedhjet presidenciale të nëntorit. Por, sfidat ligjore të ish Presidentit Trump dhe mosha e të dy kandidatëve mund të ndikojnë fushatën presidenciale. Ekspertët theksojnë se tërheqja e kandidatëve kryesorë nga gara për president do të çonte në procese të ndërlikuara për zëvendësimin e tyre.

Ish Presidenti Donald Trump përballet me 91 akuza penale dhe të paktën njëri nga gjyqet mbi këto akuza pritet të zhvillohet këtë vit.

Problemet shëndetësore mund të ndikojnë tek Presidenti Joe Biden, i cili është 81 vjeç.

“Në shtyp flitet për moshën e zotit Biden, por jo atë të zotit Trump”, tha Presidenti Biden.

Ish Presidenti Trump është 77 vjeç.

“Në nëntor do të kemi një ditë të madhe sepse do ta rimarrim drejtimin e vendit”, tha Presidenti Trump.

Por çfarë ndodh nëse njëri nga kandidatët vdes ose për arsye shëndetësore nuk mund të vazhdojë fushatën para zgjedhjeve të nëntorit?

Nëse kjo ndodh para kuvendeve kombëtare të dy partive, disa shtete mund të shtyjnë datën e zgjedhjeve paraprake për të lejuar hyrjen e më shumë kandidatëve në garë.

Kandidatët për president të secilës parti shpallen në kuvendet e tyre kombëtare. Kuvendi kombëtar i republikanëve do të mbahet në korrik ndërsa ai i demokratëve në gusht. Nëse kandidati që kryeson garën tërhiqet dhe asnjë kandidat tjetër nuk arrin të sigurojë shumicën e votave, atëherë delegatët e partisë mund të zgjedhin dikë tjetër.

“Delegatët do të kenë shumë liri për të negociuar. Ata ndoshta mund të zgjedhin një kandidat që nuk ka marrë pjesë në fushatën e zgjedhjeve paraprake. Kjo ka ndodhur në vendin tonë. Por, kjo do të varet nga kuvendet kombëtare të partisë republikane dhe asaj demokrate”, tha për Zërin e Amerikës John Fortier nga Instituti “American Enterprise”.

Nëse kandidati që i fiton zgjedhjet paraprake tërhiqet pas kuvendit kombëtar, atëherë partitë mblidhen sërish për ta zëvendësuar atë dhe kjo nuk garanton zgjedhjen e një kandidati për nënpresident.

Edhe nëse kjo ndodh pas zgjedhjeve procesi është i njëjtë. Për shembull, edhe nëse Presidenti Biden i fiton zgjedhjet por nuk mund të fillojë mandatin e ri presidencial, nënpresidentja Kamala Harris nuk do ta zëvendësonte atë në mënyrë automatike, elektorët e shteteve do të duhej të votonin sërish për të zgjedhur presidentin.

Por çfarë ndodh nëse ata nuk arrijnë ta bëjnë këtë?

“Në këtë pikë, nëse asnjë kandidat nuk siguron shumicën, procesi kalon në Dhomën e Përfaqësuesve. Zgjedhjet do të përfundonin në një proces që nuk ka ndodhur për qindra vite”, thotë Michael Thorning, drejtor i Demokracisë Strukturore në Qendrën e Politikave Dypartiake.

Nëse Presidenti i zgjedhur vdes pas çertifikimit të rezultatit të zgjedhjeve më gjashtë janar, nënpresidenti ose nënpresidentja e zgjedhur inaugurohet në postin e Presidentit të vendit.

Secili nga këta skenarë do të çonte në një proces shumë të ndërlikuar, që do të mund të zvarritej më tej nga gjykatat, nëse do të kishte kontestim të rezultatit të zgjedhjeve.

Duke marrë parasysh sulmin në Kapitol nga mbështetësit e zotit Trump më 6 janar 2021, një proces i tillë do të mund të shoqërohej sërish me veprime të dhunshme./VOA/

Prokuroria Themelore e Prishtinës ka nisur hetimet lidhur me rastin ku ra një pjesë e kulmit të Komunës së Re të Prishtinës.

Këtë e ka konfirmuar për Gazetën Online Reporteri.net, zëdhënësja e kësaj Prokurorie, Laureta Ulaj. E njëjta ka bërë të ditur se Prokurori i Shtetit ka dalë në vendngjarje me njësitet relevante ku janë iniciuar hetime në drejtim të veprës penale “Shkaktim i rrezikut të përgjithshëm”.

“Lidhur me këtë rast, ju njoftojmë se Prokurori i Shtetit ka dalë në vendin e ngjarjes e bashkë me njësitë relevante dhe me urdhër të njëjtit janë iniciuar hetime fillimisht në drejtim të veprës penale ‘Shkaktimi i rrezikut të përgjithshëm’.

Prokuroria në koordinim me policinë kanë filluar me ndërmarrjen e të gjitha veprimeve të nevojshme hetimore lidhur me këtë rast, nga i cili sipas informatave që kemi deri më tani ka marrë lëndime trupore një person (femër)”, tha Ulaj për Reporteri.net.

Nga rënia e kulmit, një grua ka mbetur e lënduar, derisa nga Emergjenca për Reporteri.net thanë se është jashtë rrezikut për jetën.

Kështu ka bërë të ditur për Gazetën Online Reporteri.net shefi i Emergjencës, Naser Syla.

“Po kryhen ekzaminimet. Gjendja e saj momentalisht është stabile”, tha Syla për Reporteri.net.

Në kuadër të turit treditor rajonal, ministri për Evropën dhe Punët e Jashtme i Shqipërisë, Igli Hasani, u ndal këtë të enjte në Malin e Zi, ku zhvilloi dhe një konferencë të përbashkët për shtyp me homologun në Podgoricë.

Në fjalën e tij Hasani vlerësoi bashkëpunimin mes dy vendeve, por u ndal dhe te situata e sigurisë në rajon. Ai theksoi se Shqipëria sheh me shqetësim përpjekjet e Rusisë që kërkon të destabilizojë rajonin.

Gjithashtu ministri i Jashtëm shprehu shqetësimin dhe për situatën në veri të Kosovës dhe shtimin e retorikës që vë në pikëpyetje orientimin euro-atlantik të rajonit.

“Shqipëria, si një vend anëtar i NATO, e sheh me shqetësim rolin e aktorëve si Rusia, që kërkojnë të rrisnin tensionet e të shkaktojnë destabilizim të rajonit. Jemi të shqetësuar edhe nga zhvillimet e paradokohshme në Veriun e Kosovës e nga shtimi i një retorike që vë në pikëpyetje orientimin euroatlantik të Ballkanit Perëndimor nga disa forca e grupime në vende të ndryshme të rajonit. Jemi të shqetësuar edhe nga ngadalësimi i ritmit të reformave në disa prej vendeve të rajonit”, tha ai.

Kryediplomati shqiptar tha se për Shqipërinë e ardhmja e Ballkanit Perëndimor duhet të udhëhiqet nga vlerat demokratike dhe një orientim i qartë euro-atlantik.

“Është pikërisht ky vizion i përbashkët që qëndron në themel të miqësisë mes vendeve tona. Ne besojmë që vende si Shqipëria e Mali i Zi, që udhëhiqen nga ky vizion, kanë sot detyrimin të punojnë më shumë për të çuar përpara reformat integruese dhe bashkëpunimin rajonal. Ky është edhe objektivi kryesor që do të informojë punën tonë gjatë kryesimit të disa nismave rajonale në vitin 2024, për çka do të mirëprisnim edhe bashkëpunimin maksimal të Malit të Zi si një vend mik e një partner i rëndësishëm në këtë rrugëtim”, theksoi Hasani.

Ai shtoi se Mali i Zi është një nga vendet e rajonit që ka avancuar më shumë në proceset integruese në BE.

“Ne shpresojmë që qeveria malazeze do ta përshpejtojë akoma më shumë ritmin e reformave sepse avancimi i çdonjërit nga vendet tona në procesin e integrimit është një kontribut i vyer për mbarë rajonin. Shpresoj që eksperiencat e mira të Malit të Zi t’i shërbejnë Shqipërisë, dhe ato të Shqipërisë t’i shërbejnë Malit të Zi, për një të ardhme sa më të mirë e sa më të begatë”, tha Hasani. /EuronewsAl

Në mungesë të kuorumit ka përfunduar seanca e Kuvendit të Kosovës, ku është diskutuar për çmimin e energjisë elektrike.

Pas debatit rreth pesë orësh, nuk pati deputetë të mjaftueshëm në sallën plenare për ta hedhur në votim rezolutën e PDK-së, ku kërkohej ulja e çmimit të energjisë elektrike dhe heqjen e bllok-tarifës.

Mirëpo zyrtarët qeveritarë dhe deputetët e mazhorancës, gjatë seancës thanë se Kosova ka çmimin më të lirë energjisë në rajon, derisa edhe e konsideruan të domosdoshëm nevojën për mbajtjen e bllok-tarifës.

Drejtori për Siguri dhe Emergjenca në Komunën e Prishtinës, Lulzim Fushtica, ka thënë se në momentin e rrëzimit të kulmit të ndërtesës së Komunës, nuk kanë qenë duke u zhvilluar punime në atë kat të ndërtesës, raporton EO.

Ai ka thënë se rrëzimi mund të ketë ndodhur si pasojë e erërave, por kur është pyetur se pse nuk është dërmuar asnjë ndërtesë tjetër aty përreth, ai ka thënë se nuk mund të paragjykojë dhe se hetimet do të tregojnë se si dhe çfarë ka ndodhur.

“Nuk ka pasur punime në atë kat të ndërtesës, në momentin kur ka ndodhur rrëzimi nuk kanë qenë duke u zhvilluar punime. Sipas të gjitha gjasave si pasojë e erërave të forta që kanë ndodhur ka ardhur deri te rrëzimi. Hetimet janë në fazën preliminare, nuk mund të them asgjë më shumë, nuk mund të paragjykoj, Policia dhe inspektorët e emergjencave janë duke e kryer punën e tyre”, është shprehur Fushtica në një deklarim për media.

Ai ka thënë se kjo ndërtesë është ndërtuar në vitin 2009 por ka thënë se nuk ka informata nëse kulmi i saj është rrëzuar edhe një herë më herët. Ai ka theksuar se nuk kanë informata për dëmet e tjera të shkaktuara nga rënia e çatisë.

Një pjesë e rrugës është bllokuar nga Policia për qarkullim të automjeteve.

Një vajzë ka pësuar lëndime të rënda trupore dhe është në rrezik për jetë si pasojë e rënies së kulmit të ndërtesës së Komunës së re në Prishtinë.

Gjendja e pacientes është stabile, ndonëse ka marrë lëndime të rënda trupore.

Kështu bënë të ditur në një prononcim për KosovaPress, drejtori i Qendrës Emergjente në Qendrën Klinike Universitare të Kosovës(QKUK), Naser Syla. Ai tha se sipas të gjitha gjasave pas ekzaminimeve të pacientes në emergjencë, e njëjta do të dërgohet në Mjekimin Intensiv Qendror për të vazhduar trajtimin.

“Gjendja për momentin është stabile, por lëndimet, pas ekzaminimeve të kryera në Qendrën Emergjente kanë rezultuar me lëndime të rënda trupore…Ka lëndime multiforme në disa pjesë të organizmit, është një poli traumë e rëndë…Në Emergjencë pritet të bëhet disa ekzaminime të tjera, pas një afati të caktuar kohor, mandej sipas të gjitha gjasave do të vazhdon trajtimin në mjekimin intensiv qendror…Tek ka lëndime të rënda trupore, është në gjendje të rrezikshme për jetë”, tha Syla.

Ndërkaq, dyshohet se si pasojë e erërave të forta, ka rënë kulmi i ndërtesës së Komunës së re në Prishtinë.

Nga pamjet e siguruara nga KosovaPress, kuptohet se bëhet fjalë për dëme të konsiderueshme materiale.

Çedomir Stojkoviq, avokat i politikanit serb, Nikola Sanduloviq, ka vendosur lule te varri i Blerina Jasharit, vajzës shtatëvjeçare të vrarë në Kompleksin “Adem Jashari” në Prekaz, raporton Ekonomia Online.

Te varri i saj ka lënë edhe një mesazh.

“Urrejtja vdes. Ti jeton përgjithmonë. Një mijë lot për një mijë vjet, dhe miliona shpresa dhe ëndrra. Të cilat fillojnë me fjalën ‘Më fal’”, thuhet në mesazh.

Stojkoviq e pati paralajmëruar një ditë më herët se do të shkojë të vendosë lule te varri i 7-vjeçares e cila u vra krah anëtarëve të tjerë të familjes Jashari nga forcat e armatosura serbe në vitin 1998.

Stojkoviq ka shkruar se pas këtij veprimi do të dorëzohej tek autoritetet e Beogradit për t’i sfiduar dhe treguar se në Serbi ekziston një rregull i ri sipas të cilit çdo vendosje lulesh në varret e fëmijëve shqiptarë dënohet me rrahje dhe burg.

Sanduloviq ishte arrestuar dhe ka pretenduar se është rrahur nga shërbimi sekret serb pikërisht për këtë arsye. Në fletarrestin ndaj tij thuhej se ai kishte nxitur urrejtje kombëtare, racore e fetare, duke e përmendur rastin kur ai pati bërë homazhe te varrezat e Jasharëve.

Të shtunën e 20 janarit do të zhvillohet Kampionati i Kosovës për Senior në xhudo.

Ky Kampionat i xhudos do të mbahet në Qendrën Nacionale të Xhudos në Pejë, raporton kp.

Në Kampionatin e Kosovës për Senior do të marrin pjesë klubet e xhudos nga Kosova, dhe garat fillojnë nga ora 10:00.

Këshilli për Mbrojtjen e të Drejtave e të Lirive të Njeriut (KMDLNJ) u ka bërë thirrje qytetarëve që të shfrytëzojnë çdo mundësi ligjore për shkak të faturave të larta të energjisë elektrike, duke mos përjashtuar as mundësinë e organizimit të protestave si e drejtë demokratike.

Në një reagim për media, KMDLNJ thotë se qytetarët e Kosovës janë plaçkitur me faturat e fundit (dhjetor 2023) që, në jo pak raste janë 400 për qind më të larta se ato të muajit paraprak (nëntor 2023).

KMDLNJ përkujton se ka kërkuar hetime nga Prokuroria e Shtetit dhe që qytetarët të mos i paguajnë faturat e plota, por të ankohen dhe të ngrenë padi në gjykata dhe të kundërshtojnë në mënyrë të organizuar përmes protestave.

KMDLNJ ka folur edhe rreth seancës së sotme plenare ku po debatohet mbi çmimet e larta të energjisë elektrike, duke thënë pozita me çdo kusht po përpiqet ta arsyetojë “këtë hajni të pashembullt që iu bëhet qytetarëve të Kosovës”.

“Në seancën e jashtëzakonshme dolën pohimet se rryma që e blihet me 2 euro e 90 centë ndërsa u faturohet qytetarëve 14 euro e 45 centë, gjë e cila është fakt i mjaftueshëm që të bëhen hetimet e shpejta. Në këtë mes do të gjendej edhe përgjegjësia institucionale. 100 eurot e ndara nga Qeveria kanë qëllim për mbytje të zhurmës ndërsa subvencionimi ka filluar vetëm pasi pati reagime të shumta dhe për t’i shmangur kundërshtimet e organizuara të qytetarëve që janë vjedhur haptas dhe ka dyshime edhe nga segmente të caktuara institucionale”, thuhet në reagim.

KMDLNJ kundërshton keqpërdorimet e pamohueshëm duke kërkuar hetime dhe përgjegjësi sikur që e ka kundërshtuar diskriminimin e qytetarëve/ konsumatorëve në baza etnike si shkelje e rëndë e të drejtave të njeriut.

Në këtë kontekst KMDLNJ ka kundërshtuar takimin me ZRRE-në pasi ky i fundit ka përgjegjësinë kryesore institucionale për situatën e krijuar.