Author: A.M.

Futbollisti kosovar Meriton Korenica mund të ndryshojë klub gjatë verës, me interesim serioz nga Rapid Bukureshti, por duke mbetur gjithsesi në kampionatin rumun.

Sipas raportimeve, mesfushori nga Rahoveci është në mesin e katër lojtarëve që trajneri i ardhshëm i Rapidit, Daniel Pancu, synon t’i afrojë për sezonin e ri, duke e vlerësuar si një profil të përshtatshëm për projektin e tij.

Korenica ka pasur oferta edhe nga SHBA dhe Qipro gjatë verës, por klubi i tij aktual CFR Cluj nuk ka pranuar ta lirojë, duke e mbajtur në skuadër.

29-vjeçari ka kontratë me Clujin deri në verën e vitit 2027 dhe po kalon një sezon shumë të mirë, duke regjistruar 12 gola dhe 9 asistime në të gjitha garat, duke qenë një nga lojtarët më produktivë të ekipit.

Ndërkohë, te Rapid Bukureshti aktivizohet edhe futbollisti kosovar Drilon Hazrollaj, ndërsa më parë me këtë fanellë kanë shkëlqyer edhe Albion Rrahmani dhe Ermal Krasniqi, çka tregon lidhjen e fortë të klubit rumun me futbollistët nga Kosova.

Një pjesë gjithnjë e më e madhe e tifozëve të Real Madrid duket se e ka humbur durimin me yllin francez Kylian Mbappé.

Sipas raportimeve, një peticion online me titullin “Mbappé Out” ka mbledhur tashmë mbi 1.5 milion nënshkrime, duke reflektuar pakënaqësinë në rritje ndaj sulmuesit.

Kjo situatë vjen në një periudhë të vështirë për klubin madrilen. Reali renditet në vendin e dytë në kampionat, me diferencë të konsiderueshme nga Barcelona në La Liga, ndërsa në UEFA Champions League u eliminua në çerekfinale nga Bayern Munich.

Ndërkohë, Mbappé është bërë edhe qendër e polemikave për shkak të një incidenti të raportuar në stërvitje. Sipas gazetarëve Guillermo Rai dhe Mario Cortegana të The Athletic, sulmuesi francez është përfshirë në një përplasje me një anëtar të stafit gjatë një ushtrimi.

Burimet bëjnë të ditur se Mbappé ka reaguar me zemërim dhe ka përdorur gjuhë ofenduese ndaj pjesëtarit të stafit, i cili po vepronte si asistent-gjyqtar dhe e kishte sinjalizuar në pozicion jashtë loje.

Ky episod ka shtuar edhe më shumë presionin mbi lojtarin dhe ka nxitur debat rreth formës dhe sjelljes së tij, në një moment kur Real Madridi po kërkon reagim pas një sezoni nën pritshmëri.

Dhjetë klube janë licencuar nga Federata e Futbollit e Kosovës për pjesëmarrje në garat evropiane të sezonit të ardhshëm, pas procesit të vlerësimit që përfshin kriteret sportive, financiare dhe administrative.

Nga klubet e licencuara, tetë janë nga Superliga e Kosovës në konkurrencën e meshkujve, ndërsa dy të tjera përfaqësojnë futbollin e femrave, duke reflektuar rritjen e përfaqësimit edhe në këtë kategori.

Në total, 12 klube kishin aplikuar për licencim pranë FFK-së, por vetëm dhjetë prej tyre kanë arritur të plotësojnë kriteret e kërkuara për të marrë pjesë në garat ndërkombëtare të organizuara nga UEFA.

Ndërkohë, jashtë këtij procesi kanë mbetur FC Drenica dhe FC Prishtina e Re, të cilat nuk kanë arritur të sigurojnë licencën për sezonin e ardhshëm.

Licencimi i klubeve është një hap i rëndësishëm për pjesëmarrjen në arenën ndërkombëtare, ndërsa ekipet kosovare synojnë paraqitje sa më dinjitoze në garat evropiane.

Të mërkurën dhe të enjten zhvillohen ndeshjet e dyta të serisë gjysmëfinale të play-off-it në Superligën e Kosovës në hendboll për meshkuj.

Të mërkurën nga ora 19:30, në palestrën Shani Nushi përballen Vëllaznimi dhe Kastrioti. Ndeshjen e parë në Ferizaj, Kastrioti e fitoi bindshëm me rezultat 41:27 dhe udhëton në Gjakovë me synimin për ta siguruar finalen. Skuadra nga Ferizaj, që tashmë ka fituar Kupën, e mbylli sezonin e rregullt në vendin e parë, ndërsa Vëllaznimi në të katërtin.

Të enjten nga ora 20:00 zhvillohet përballja ndërmjet Besa Famgas dhe Rahoveci në palestrën Karagaçi. Ndeshja pritet të jetë shumë e fortë, pasi Rahoveci e fitoi takimin e parë me rezultat të ngushtë 32:30. Edhe kjo përballje pritet të jetë e baraspeshuar dhe me rivalitet të madh.

Për t’u kualifikuar në finale, skuadrave u nevojiten dy fitore. Nëse është e nevojshme, ndeshjet e treta vendimtare do të zhvillohen në Ferizaj dhe Rahovec.

Ndërkohë, të mërkurën nga ora 19:30 luhet edhe ndeshja e mbetur e kampionatit të rregullt ndërmjet Trepça dhe Prishtina. Trepça renditet e gjashta me 18 pikë, ndërsa Prishtina e shtata me 17 pikë, me të dy skuadrat që synojnë t’i shmangen pozitës së parafundit në tabelë.

Në mesjavë vazhdon gara në play-off-in e Superligës së Kosovës në hendboll për femra, me ndeshjet e dyta gjysmëfinale që zhvillohen të enjten.

Programi nis nga ora 17:00 në arenën Bill Clinton Arena, ku përballen Ferizaj dhe Samadrexha.

Ndërkohë, nga ora 20:00, në palestrën në Banjë, Istogu e pret Shqiponja.

Samadrexha dhe Shqiponja kanë fituar ndeshjet e para dhe janë më afër finales. Samadrexha e mposhti Ferizajn me rezultat 35:26, ndërsa Shqiponja fitoi ndaj Istogut me 25:21.

Megjithatë, Ferizaj dhe Istogu synojnë fitore në shtëpi për ta barazuar serinë dhe për ta çuar atë në ndeshjen vendimtare të tretë.

Mauricio Pochettino ka rrëfyer se periudha e tij te Paris Saint-Germain gjatë sezonit 2021/22, kur kishte nën urdhra Lionel Messi, Kylian Mbappé dhe Neymar, i tregoi sa e vështirë është të bësh të funksionojë një treshe kaq e talentuar në mënyrë të balancuar.

Sipas trajnerit argjentinas, problemi nuk lidhej vetëm me egot, por edhe me stilet e ndryshme të lojës.

“Messi donte të ndërtonte lojën nga mbrapa, më ngadalë, me kombinime dhe pasime. Ai ka cilësinë ta mbajë topin dhe të driblojë disa lojtarë. Por nëse luanim për Mbappén, nuk mund të luanim për Messin”, ka deklaruar Pochettino për The Overlap.

Ai shpjegoi se Mbappé ishte më i rrezikshëm në momentet e tranzicionit, kur skuadra rikuperonte topin dhe nisej shpejt në sulm, duke kërkuar hapësira për vrapime.

“Mbappé, kur e fitonim topin, kërkonte hapësirë. Ishte çështje t’ia jepje topin dhe ta lije të vraponte. Por kur luanim për Messin, ai më thoshte: ‘Forca ime është të vrapoj, por nuk mundem’”, shtoi ai.

Ndryshe nga Mbappé, Pochettino theksoi se me Neymarin nuk kishte të njëjtin problem, pasi braziliani dëshironte të ishte vazhdimisht i përfshirë në lojë me topin.

Ai nënvizoi se kombinimi i tre profileve kaq të ndryshme përbënte një sfidë të madhe taktike. Në fund të sezonit, Pochettino u shkarkua, pavarësisht se fitoi titullin në Francë, ndërsa në Ligën e Kampionëve PSG u eliminua nga Real Madrid në fazën e 1/8-ës.

Manchester United po i ofron Michael Carrick mundësinë për të vazhduar si trajner i parë në mënyrë të përhershme, pas suksesit të tij në drejtimin e klubit dhe kualifikimin në Ligën e Kampionëve për sezonin e ardhshëm.

Sipas “The Guardian”, Carrick ende nuk ka zhvilluar bisedime zyrtare për të konvertuar rolin e tij të përkohshëm në një emërim afatgjatë. Kjo ndodhi pasi drejtuesit e klubit kishin planifikuar fillimisht të prisnin dhe të vlerësonin nëse ai do ta arrinte objektivin kryesor, sigurimin e një vendi në garat elitare evropiane.

Synimi u realizua pas fitores 3-2 ndaj Liverpoolit, që i garantoi United-it një vend në pesëshen e parë. Që nga marrja e drejtimit në janar, Carrick ka regjistruar 10 fitore dhe dy barazime në 14 ndeshje të Ligës Premier.

Raportohet se drejtori i futbollit, Jason Wilcox, dhe shefi ekzekutiv, Omar Berrada, janë të kënaqur me ndikimin e tij që nga momenti kur zëvendësoi Ruben Amorimin. Po ashtu, mbështetje të fortë për Carrickun ka edhe nga brenda skuadrës.

Ferland Mendy është përjashtuar për pjesën e mbetur të sezonit, pasi Real Madridi ka konfirmuar se mbrojtësi francez ka pësuar një dëmtim të rëndë.

Sipas njoftimit zyrtar të klubit, pas ekzaminimeve të kryera nga stafi mjekësor, Mendy është diagnostikuar me dëmtim në tendinën e muskulit në këmbën e djathtë.

Reali shtoi se gjendja e lojtarit do të monitorohet gjatë procesit të rikuperimit, por sinjalet e para tregojnë për një mungesë të gjatë. Vlerësimet fillestare bëjnë të ditur se mbrojtësi i krahut të majtë mund të qëndrojë jashtë fushave deri në pesë muaj, çka e përmbyll praktikisht sezonin e tij dhe vë në pikëpyetje gatishmërinë për fillimin e edicionit të ardhshëm.

Ky është një lajm i keq për Real Madridin, pasi Mendy ka qenë një alternativë e rëndësishme në repartin defensiv, sidomos në ndeshjet me intensitet të lartë.

Mungesa e tij pritet ta detyrojë stafin teknik të bëjë ndryshime në organizimin mbrojtës në një periudhë vendimtare të sezonit. Tani fokusi do të jetë te rehabilitimi, me klubin që synon rikuperimin e plotë të lojtarit, pa e nxituar kthimin e tij në fushë.

Talenti i Chelseat, Jesse Derry, ka pasur nevojë për ndërhyrje mjekësore në fushë pasi u përplas kokë më kokë në zonën e penalltisë gjatë ndeshjes së Ligës Premier ndaj Nottingham Forest.

18-vjeçari e nisi për herë të parë si titullar në Ligën Premier me fanellën e “Bluve”, por u detyrua të marrë trajtim të menjëhershëm pas incidentit shqetësues. Sipas raportimeve, Derry mori oksigjen në fushë, ndërsa stafi mjekësor reagoi shpejt për ta stabilizuar.

Ngjarja ndodhi pas një fillimi kaotik të ndeshjes, ku Chelsea e pa veten në disavantazh me dy gola brenda gjysmë ore.

Më pas, Derry u përplas rëndë me mbrojtësin e Nottingham Forest, Zach Abbott, në një duel brenda zonës. Për shkak të natyrës së rëndë të incidentit, Sky Sports vendosi të mos i shfaqte pamjet e përplasjes gjatë transmetimit.

Barcelona po përgatitet për një afat kalimtar vendimtar, ndërsa drejtuesit sportivë kanë vendosur një objektiv të qartë financiar: sigurimin e rreth 150 milionë eurove përmes shitjes së lojtarëve.

 

Klubi katalanas synon të krijojë hapësirë ekonomike për të përforcuar skuadrën, ndërsa disa emra të rëndësishëm janë në listën e mundshme të largimeve, në rast se mbërrijnë oferta bindëse. Në mesin e lojtarëve për të cilët priten oferta janë Ronald Araujo, Alejandro Balde, Jules Kounde, Marc Casado dhe Roony Bardghji.

 

Megjithatë, plani i klubit nuk është të heqë dorë nga të gjithë këta futbollistë, por të realizojë shitje strategjike që mundësojnë afrime më të rëndësishme.

 

Në “Camp Nou” mbizotëron ideja se tregu kërkon vendime të ftohta dhe se disa prej lojtarëve aktualë kanë vlerë të mjaftueshme për të arritur objektivin financiar.

 

Ndër emrat më të spikatur është Ronald Araujo, i cili gëzon interes të madh në tregun evropian dhe mund të sjellë të ardhura të konsiderueshme në rast largimi. Klubi beson se pikërisht nga repartet mbrojtëse mund të sigurojë një pjesë të madhe të shumës së synuar, duke qenë se tregje si Liga Premier vazhdojnë të kërkojnë profile fizike, të reja dhe të provuara.

 

Edhe pse një shitje e tij do të kishte ndikim sportiv, ajo konsiderohet si më fitimprurësja në aspektin financiar. Në të njëjtën linjë, Balde dhe Kounde mbeten lojtarë me kërkesë të lartë, falë potencialit, shpejtësisë dhe eksperiencës në nivelet më të larta të futbollit.

 

Megjithëse nuk dëshiron të dobësojë stabilitetin defensiv, Barcelona e konsideron një shitje të madhe si çelës për të zhbllokuar të gjithë planifikimin e verës.

Ndërkohë, Casado dhe Bardghji përfaqësojnë një tjetër lloj operacioni. Edhe pse nuk pritet të gjenerojnë shifra të njëjta me emrat kryesorë, largimet e tyre mund të kontribuojnë në rritjen e të ardhurave, lirimin e hapësirave në skuadër dhe balancimin e strukturës së ekipit.

 

Casado vlerësohet për moshën dhe formimin e tij, ndërsa Bardghji vazhdon të shihet si një investim premtues për të ardhmen.

 

Arritja e objektivit prej 150 milionë eurosh do t’i jepte klubit mundësinë të realizojë transferimet prioritare, të përmirësojë kufirin e pagave dhe të hyjë më e fortë në treg.

 

Vendimet nuk do të jenë të lehta, por mesazhi është i qartë: për të blerë, fillimisht duhet të shesë, dhe këta pesë emra mund të përcaktojnë të gjithë afatin kalimtar veror.