ATV

Author: A.M.

  • Ousmane Dembele: Messi mbetet i pangopur dhe rrezik në Botërorin 2026

    Ousmane Dembele: Messi mbetet i pangopur dhe rrezik në Botërorin 2026

    Kapiteni i Francës, Kylian Mbappé, ka shprehur dëshirën që trajneri aktual i “Les Bleus”, Didier Deschamps, të mos marrë drejtimin e asnjë kombëtareje tjetër pas largimit nga stoli i Francës.

     

    Sulmuesi i Real Madrid theksoi se mënyra më e mirë për ta nderuar Deschampsin është fitimi i Kupës së Botës, duke i dhuruar një mbyllje të denjë aventurës së tij me përfaqësuesen franceze.

     

    “Forma më e mirë për ta nderuar është të fitojmë Botërorin, sepse ai dëshiron të fitojë. Ne do të bëjmë gjithçka që ai ta përjetojë Kupën e Botës në mënyrën më të mirë të mundshme, duke shpresuar që të jetë e fundit për të”, deklaroi Mbappé në një intervistë për M6.

     

    Megjithatë, 27-vjeçari nuk e fshehu dëshirën që Deschamps të mos vazhdojë karrierën në drejtimin e një kombëtareje tjetër.

     

    “E them këtë sepse shpresoj që ai të mos drejtojë ndonjë përfaqësuese tjetër. Kam dëgjuar zëra për Italinë dhe kombëtare të tjera, por kjo do të ishte e çuditshme”, u shpreh ai.

     

    Mbappé vlerësoi lart ndikimin e Deschamps te Franca, duke theksuar se puna dhe sukseset e tij kanë bërë që shumë federata ta admirojnë.

     

    “Ai do të thotë shumë për ne. Është normale që kombëtare të ndryshme ta dëshirojnë, duke parë gjithçka që ka arritur. Por italianët le të zgjedhin një trajner italian. Didier është francez dhe i përket Francës”, përfundoi sulmuesi francez.

  • Bernardo Silva pranë Real Madridit-Marrëveshja thuhet se është arritur

    Bernardo Silva pranë Real Madridit-Marrëveshja thuhet se është arritur

    Mesfushori portugez, Bernardo Silva, raportohet se është shumë pranë transferimit te Real Madrid, duke i dhënë fund aventurës së tij disa vjeçare me Manchester City.

    Sipas mediave italiane, futbollisti 31-vjeçar ka arritur një marrëveshje paraprake me klubin madrilen për një kontratë dyvjeçare, e cila përfshin edhe opsionin e zgjatjes për një sezon shtesë.

    Drejtuesit e Real Madridit besohet se e shohin Silvën si një përforcim të rëndësishëm për sezonin e ri, falë përvojës së tij të madhe në nivelin më të lartë të futbollit evropian. Portugezi vlerësohet veçanërisht për cilësitë teknike, inteligjencën në lojë dhe aftësinë për të luajtur në disa role të ndryshme, si në mesfushë ashtu edhe në repartin ofensiv.

    Nëse transferimi realizohet, Silva do t’i shtonte edhe më shumë cilësi dhe kreativitet skuadrës madrilene, e cila vazhdon të ndërtojë një ekip konkurrues për të gjitha trofetë.

    Megjithatë, deri më tani nuk ka asnjë konfirmim zyrtar nga Real Madridi apo nga vetë lojtari. Madje, raportime të mëparshme nga mediat spanjolle kishin sugjeruar se transferimi i Silvës nuk ishte ndër prioritetet kryesore të klubit, çka bën që lajmi të mbetet ende në kuadër të spekulimeve.

    Për mesfushorin portugez interesim kishte shfaqur edhe Barcelona, por sipas raportimeve të fundit, Real Madridi duket se ka lëvizur më shpejt për të siguruar shërbimet e njërit prej futbollistëve më të vlerësuar në futbollin evropian.

  • Kanadaja përballet me Bosnjën-SHBA-ja sfidon Paraguain në ditën e dytë të Botërorit 2026

    Kanadaja përballet me Bosnjën-SHBA-ja sfidon Paraguain në ditën e dytë të Botërorit 2026

    Kupa e Botës 2026 vazhdon me emocione të reja, teksa të premten, më 12 qershor, zhvillohen dy përballje interesante në kuadër të fazës së grupeve. Kombëtaret pjesëmarrëse do të synojnë ta nisin aventurën e tyre me rezultat pozitiv, duke hedhur një hap të rëndësishëm drejt fazës së eliminimit direkt.

    Në Grupin B, kombëtarja e Kanadasë do të përballet me Bosnjë e Hercegovinën në një duel që pritet të jetë mjaft i luftuar. Kanadezët, të mbështetur nga tifozët vendas dhe me një brez lojtarësh cilësorë, synojnë të konfirmojnë rritjen e tyre të vazhdueshme në futbollin ndërkombëtar. Nga ana tjetër, boshnjakët do të kërkojnë të shfrytëzojnë përvojën dhe organizimin në lojë për të marrë një rezultat pozitiv në ndeshjen e parë të turneut.

    Ndërkohë, në Grupin D, Shtetet e Bashkuara të Amerikës do të matin forcat me Paraguain. Amerikanët hyjnë në këtë sfidë me ambicie të mëdha, duke synuar të përfitojnë nga faktori fushë dhe të nisin garën me tri pikë. Megjithatë, Paraguai njihet si një kundërshtar i vështirë, me disiplinë taktike dhe eksperiencë në garat e mëdha ndërkombëtare.

    Të dyja ndeshjet pritet të kenë rëndësi të madhe për ecurinë e grupeve përkatëse, pasi një fitore në start mund t’u japë skuadrave avantazh të rëndësishëm në garën për kualifikim në raundin tjetër.

    Me interesimin e madh të tifozëve nga e gjithë bota dhe atmosferën e veçantë që sjell Botërori, dita e dytë e turneut premton spektakël, rivalitet dhe emocione të forta në rrugën drejt trofeut më prestigjioz të futbollit botëror.

  • Bayerni i vendos “çmim të pamundur” Olises, refuzon interesimin e Real Madridit

    Bayerni i vendos “çmim të pamundur” Olises, refuzon interesimin e Real Madridit

    Bayern Munich nuk ka ndërmend të ndahet me yllin e krahut, Michael Olise, pavarësisht interesimit të madh nga Real Madrid.

    Sipas raportimeve të fundit, klubi madrilen ishte i gatshëm të ofronte deri në 150 milionë euro për 24-vjeçarin, i cili ka spikatur me paraqitjet e tij gjatë sezonit të fundit.

    Megjithatë, drejtuesit e klubit bavarez kanë qenë të prerë në qëndrimin e tyre. Sipas gazetës L’Équipe, një zyrtar i Bayernit ka deklaruar se Olise nuk do të largohet as për 200 milionë euro.

    “Olise është i paçmuar. Edhe për 500 milionë euro, ai nuk do të largohet”, citohet të ketë thënë një tjetër anëtar i bordit drejtues të kampionëve gjermanë.

    Përveç Real Madridit, interes për francezin kanë shfaqur edhe Manchester City dhe Paris Saint-Germain. Megjithatë, një rikthim te Manchester City, ku Olise ka kaluar një periudhë në akademinë e klubit gjatë sezonit 2016/17, nuk duket se është në planet e lojtarit.

    Nga ana tjetër, Paris Saint-Germain raportohet se nuk është i gatshëm të investojë shuma kaq të mëdha për transferimin e futbollistit francez.

    Me këto deklarata, Bayerni ka bërë të qartë se e konsideron Olisen një nga shtyllat kryesore të projektit të tij dhe nuk është i gatshëm të negociojë largimin e tij në këtë fazë.

  • Hong Myung-bo përgëzon Korenë e Jugut pas përmbysjes ndaj Çekisë

    Hong Myung-bo përgëzon Korenë e Jugut pas përmbysjes ndaj Çekisë

    Përzgjedhësi i Koresë së Jugut, Hong Myung-bo, ka lavdëruar lojtarët e tij për paraqitjen dhe karakterin e treguar në fitoren 2-1 ndaj Çekisë në ndeshjen e parë të Grupit A në Kupën e Botës 2026.

    Koreano-jugorët mbetën në disavantazh në pjesën e dytë pas golit të Ladislav Krejçit, por arritën të rikthehen në lojë dhe të përmbysin rezultatin falë golave të Hwang In-beom dhe Oh Hyeon-gyu, duke siguruar tri pikë shumë të rëndësishme në Guadalajara.

    “Para ndeshjes u dhashë dy porosi: të mos dorëzohen deri në fund dhe të qëndrojnë të bashkuar. Si në fushë, ashtu edhe jashtë saj, duhet të veprojmë si një ekip i vetëm”, tha Hong pas ndeshjes.

    Fitorja erdhi pavarësisht se kapiteni Son Heung-min nuk pati paraqitjen e tij më të mirë. Sulmuesi humbi disa raste të mira në pjesën e parë dhe më pas u zëvendësua nga Oh Hyeon-gyu, i cili shënoi golin e fitores.

    Megjithatë, trajneri koreano-jugor e mbrojti kapitenin e skuadrës, duke vlerësuar angazhimin e tij.

    “Son është lojtari ynë më i mirë dhe një kapiten shembullor. Ne besojmë se ai dha gjithçka nga vetja në këtë ndeshje”, u shpreh Hong.

    Në përfundim, ai theksoi se skuadra duhet të përmirësojë shfrytëzimin e rasteve të krijuara, pavarësisht suksesit të rëndësishëm në ndeshjen hapëse të Botërorit.

  • Kylian Mbappé: Deschamps i përket Francës, jo një kombëtareje tjetër

    Kylian Mbappé: Deschamps i përket Francës, jo një kombëtareje tjetër

    Kapiteni i Francës, Kylian Mbappé, ka shprehur dëshirën që trajneri aktual i “Les Bleus”, Didier Deschamps, të mos marrë drejtimin e asnjë kombëtareje tjetër pas largimit nga stoli i Francës.

    Sulmuesi i Real Madrid theksoi se mënyra më e mirë për ta nderuar Deschampsin është fitimi i Kupës së Botës, duke i dhuruar një mbyllje të denjë aventurës së tij me përfaqësuesen franceze.

    “Forma më e mirë për ta nderuar është të fitojmë Botërorin, sepse ai dëshiron të fitojë. Ne do të bëjmë gjithçka që ai ta përjetojë Kupën e Botës në mënyrën më të mirë të mundshme, duke shpresuar që të jetë e fundit për të”, deklaroi Mbappé në një intervistë për M6.

    Megjithatë, 27-vjeçari nuk e fshehu dëshirën që Deschamps të mos vazhdojë karrierën në drejtimin e një kombëtareje tjetër.

    “E them këtë sepse shpresoj që ai të mos drejtojë ndonjë përfaqësuese tjetër. Kam dëgjuar zëra për Italinë dhe kombëtare të tjera, por kjo do të ishte e çuditshme”, u shpreh ai.

    Mbappé vlerësoi lart ndikimin e Deschamps te Franca, duke theksuar se puna dhe sukseset e tij kanë bërë që shumë federata ta admirojnë.

    “Ai do të thotë shumë për ne. Është normale që kombëtare të ndryshme ta dëshirojnë, duke parë gjithçka që ka arritur. Por italianët le të zgjedhin një trajner italian. Didier është francez dhe i përket Francës”, përfundoi sulmuesi francez.

  • Maroku merr goditje të rëndë para Botërorit-Humb Aguerd dhe Ez Abde

    Maroku merr goditje të rëndë para Botërorit-Humb Aguerd dhe Ez Abde

    Kombëtarja e Marokut ka pësuar një goditje të madhe vetëm pak ditë para nisjes së aventurës në Kupën e Botës 2026, pasi dy prej futbollistëve të saj më të rëndësishëm, Ez Abde (Abdessamad Ezzalzouli) dhe Nayef Aguerd, janë detyruar të tërhiqen nga turneu për shkak të lëndimeve.

    FIFA ka miratuar tashmë zëvendësimet e tyre në listën zyrtare të “Luanëve të Atlasit”. Sipas raportimeve, në vend të dy lojtarëve të dëmtuar janë ftuar Marwane Saadane, mbrojtësi 34-vjeçar i Al Fateh, dhe Amine Sbai, sulmuesi 25-vjeçar i Angers.

    Të dy futbollistët ndodheshin tashmë me ekipin në Shtetet e Bashkuara të Amerikës dhe ishin pjesë e përgatitjeve të fundit para fillimit të turneut.

    Mungesa e Nayef Aguerd konsiderohet një humbje e madhe për repartin defensiv të Marokut. Mbrojtësi qendror nuk ka luajtur që nga muaji mars për shkak të një problemi në ijë, i cili më pas u komplikua edhe nga një frakturë në zonën pubike. Pavarësisht përpjekjeve për rikuperim, ai nuk arriti të jetë gati në kohë për Botërorin.

    Nga ana tjetër, Ez Abde pësoi një dëmtim në gju gjatë ndeshjes miqësore ndaj Norvegjisë. Fillimisht kishte shpresa që sulmuesi të qëndronte në listë dhe të rikuperohej gjatë fazës së grupeve, por ekzaminimet e fundit mjekësore detyruan stafin teknik të marrë vendimin për ta zëvendësuar.

    Të dy lojtarët kanë pasur rol kyç në sukseset e fundit të Marokut, përfshirë ecurinë historike deri në gjysmëfinalet e Kupës së Botës 2022, si dhe paraqitjet e forta në arenën afrikane.

    Mungesa e tyre vjen në momentin më të papërshtatshëm për përfaqësuesen marokene, e cila synon të përsërisë paraqitjen mbresëlënëse të realizuar në Katar.

    Maroku do ta nisë fushatën e tij në Grupin C me një përballje të vështirë ndaj Brazilit, ndërsa më pas do të luajë kundër Skocisë dhe Haitit.

    Trajneri Mohamed Ouahbi tani do të duhet të riorganizojë planet e tij taktike dhe të gjejë zgjidhje të reja për të mbuluar mungesën e dy prej armëve më të rëndësishme të skuadrës në prag të turneut më të madh të futbollit botëror.

  • Kupa e Botës 2026 dhe gjumi: A ia vlen të sakrifikoni netët për futbollin?

    Kupa e Botës 2026 dhe gjumi: A ia vlen të sakrifikoni netët për futbollin?

    Për tifozët evropianë, ndeshjet e Kupës së Botës të zhvilluara në Amerikën e Veriut shpesh nënkuptojnë net pa gjumë. Ndeshjet përfundojnë në orët e hershme të mëngjesit sipas kohës në Kosovë, ndërsa rutina pas tyre zakonisht përfshin pak gjumë, lodhje dhe përpjekje për t’iu rikthyer aktiviteteve të përditshme.

    Në pamje të parë, një natë pa gjumë mund të duket e padëmshme. Megjithatë, ekspertët paralajmërojnë se organizmi nuk funksionon me “kredi falas”. Sipas specialistit të mjekësisë së gjumit, Joachim Ficker, trupi mund të përballojë përkohësisht një natë pa gjumë falë mekanizmave kompensues që aktivizohen në tru për të ruajtur funksionet bazë.

    Problemet fillojnë zakonisht gjatë mesditës dhe pasdites, kur shfaqen rënie të ndjeshme të energjisë dhe përqendrimit. Në këto momente, performanca mendore mund të bjerë në nivele të krahasueshme me një gjendje të lehtë dehjeje.

    Eksperti tjetër i gjumit, Dieter Kunz, thekson se rreziku bëhet edhe më i madh kur mungesa e gjumit vazhdon për disa ditë. Në këto raste, organizmi fillon të pësojë pasoja më serioze dhe progresive.

    Studimet shkencore tregojnë se edhe një javë me vetëm gjashtë orë gjumë në natë mund të shkaktojë ndryshime të rëndësishme biologjike. Një nga rreziqet më të mëdha është mikrogjumi – episode shumë të shkurtra të humbjes së vëmendjes që zgjasin vetëm disa sekonda dhe mund të jenë veçanërisht të rrezikshme gjatë drejtimit të automjetit.

    Kupa e Botës 2026 do të jetë një sfidë e veçantë për tifozët për shkak të diferencës kohore mes Amerikës së Veriut dhe Evropës. Me shumë ndeshje që do të zhvillohen gjatë natës ose në orët e para të mëngjesit, ndjekja e të gjithë turneut do të jetë praktikisht e pamundur për shumicën e njerëzve.

    Turneu do të zgjasë 38 ditë dhe do të përfshijë një numër rekord ndeshjesh. Për tifozët më të përkushtuar, shikimi i katër ndeshjeve në ditë mund të nënkuptojë deri në tetë orë transmetim, pa llogaritur analizat dhe përmbajtjet shtesë.

    Për këtë arsye, ekspertët rekomandojnë një qasje më të balancuar. Ndeshjet që zhvillohen në orare më të favorshme duhet të kenë përparësi, ndërsa përballjet e vona mund të ndiqen përmes përmbledhjeve dhe analizave në mëngjes.

    Gjatë fazës së grupeve, prioritet duhet të jetë ruajtja e ritmit normal të gjumit. Vetëm në fazat vendimtare, si çerekfinalet, gjysmëfinalet dhe finalja, mund të justifikohet sakrifikimi i disa orëve gjumë për të mos humbur momentet më të rëndësishme të turneut.

    Po ashtu, ekspertët nuk e konsiderojnë zgjidhje ideale kompensimin e netëve pa gjumë me gjumë të gjatë gjatë ditës. Kjo mund të prishë ritmin natyror të organizmit dhe ta bëjë më të vështirë gjumin gjatë natës.

    Në fund, mënyra më e mirë për ta shijuar Kupën e Botës 2026 është krijimi i një përvoje personale, duke zgjedhur ndeshjet më interesante dhe duke shmangur ngarkesën e tepërt fizike. Në një turne kaq të madh, selektimi nuk është humbje, por mënyra më realiste për të shijuar futbollin pa rrezikuar shëndetin.

  • FIFA miraton revolucionin më të madh në transferime, ndryshimet hyjnë në fuqi nga viti 2027

    FIFA miraton revolucionin më të madh në transferime, ndryshimet hyjnë në fuqi nga viti 2027

    Pas një takimi të zhvilluar në Mexico City, FIFA ka njoftuar ndryshime të thella në Rregulloren e Transferimeve, të cilat do të hyjnë në fuqi më 1 janar 2027. Dispozitat e reja janë rezultat i dy viteve negociatash me sindikatën e lojtarëve FIFPro, ligat dhe klubet evropiane, duke sjellë reformën më të madhe në sistemin e transferimeve që nga viti 2001.

    Një nga ndryshimet më të rëndësishme është përfshirja e detyrueshme e lojtarëve në përfitimet financiare nga transferimet. Sipas rregullave të reja, futbollistët do të kenë të drejtë të përfitojnë pesë për qind të tarifës së transferimit të tyre, një praktikë që deri më tani zbatohej kryesisht në Spanjë.

    Për lojtarët me pagë fikse vjetore nën 150 mijë euro, pjesëmarrja prej pesë për qind do të jetë e garantuar. Edhe në rastet kur lojtari heq dorë pjesërisht nga kjo e drejtë, përfitimi i tij nuk mund të jetë më i ulët se paga e vitit të fundit të kontratës ose 2.5 për qind e shumës totale të transferimit.

    Në rast të mosmarrëveshjeve financiare, çështjet do të trajtohen nga Gjykata e Futbollit, ndërsa për pagesat e vonuara do të aplikohet interes prej tetë për qind.

    Një tjetër risi e madhe është futja e detyrueshme e klauzolave të lirimit në të gjitha kontratat mes lojtarëve dhe klubeve. Të dyja palët do të duhet të bien dakord për shumën e klauzolës, duke garantuar më shumë liri lëvizjeje për futbollistët dhe më shumë qartësi në tregun e transferimeve.

    FIFA ka vendosur gjithashtu të lejojë nënshkrimin e kontratave deri në pesë vjet me lojtarët nën moshën 18-vjeçare, duke tejkaluar kufirin aktual prej tre vjetësh. Megjithatë, kjo do të jetë e mundur vetëm në kushte të caktuara dhe klubet do të kenë një numër të kufizuar të kontratave të tilla gjatë çdo sezoni.

    Po ashtu, është krijuar Platforma Globale për Dialog Social, ku do të marrin pjesë FIFA, FIFPro, Federata e Ligave Botërore dhe organizatat e klubeve. Vendimet do të merren kryesisht me konsensus, duke synuar bashkëpunim më të madh mes të gjitha palëve të përfshira në futbollin profesional.

    Ndryshimet e reja përfshijnë edhe masa që lidhen me mirëqenien e lojtarëve, standardet e shëndetit dhe sigurisë, si dhe dispozita të veçanta për shtatzëninë, birësimin dhe lejet familjare.

    Si pjesë e marrëveshjes, FIFPro dhe anëtarët e saj do të tërheqin të gjitha paditë dhe mosmarrëveshjet e hapura kundër FIFA-s. Gjithashtu, do të nënshkruhet një Memorandum Mirëkuptimi mes FIFA-s dhe FIFPro-s, i cili do të formalizojë zbatimin e reformave të reja.

    Me këto ndryshime, FIFA synon të modernizojë sistemin global të transferimeve dhe të krijojë një ekuilibër më të madh mes interesave të lojtarëve, klubeve dhe organizmave drejtues të futbollit botëror.

  • Ferdi Kadioglu kujton sfidën me Kosovën: Ishte e vështirë, por kualifikimi në Botëror ishte si një ëndërr

    Mbrojtësi i Kombëtares së Turqisë, Ferdi Kadioglu, ka folur për emocionet e përjetuara pas ndeshjes ndaj Kosovës në Prishtinë, sfidë që i hapi rrugën ekipit të tij drejt kualifikimit në Kupën e Botës 2026.

    Futbollisti turk rikujtoi përballjen me “Dardanët” gjatë një interviste për TRT World, duke e cilësuar atë si një nga ndeshjet më të vështira në rrugëtimin e Turqisë drejt turneut më prestigjioz të futbollit botëror.

    Kadioglu veçoi kushtet e vështira atmosferike dhe presionin e madh që ndiente para fillimit të takimit në Prishtinë.

    “Ndeshja me Kosovën nuk ishte e lehtë. Bënte shi, bënte ftohtë dhe frynte erë. Isha edhe pak nervoz”, deklaroi fillimisht mbrojtësi turk.

    Megjithatë, ai theksoi se të gjitha vështirësitë u harruan menjëherë pas përfundimit të ndeshjes, kur Turqia siguroi kualifikimin për në Kupën e Botës.

    “Por ndihesh si në ëndërr kur mbaron ndeshja dhe e kupton që do të shkosh në Kupën e Botës”, u shpreh Kadioglu.

    Turqia është një nga kombëtaret që do të marrë pjesë në Kupën e Botës 2026, ndërsa Ferdi Kadioglu pritet të jetë një nga lojtarët kyç të ekipit në turneun që do të zhvillohet në Shtetet e Bashkuara të Amerikës, Kanada dhe Meksikë.

    Deklarata e mbrojtësit turk dëshmon vështirësinë e sfidës së zhvilluar në Prishtinë, por edhe rëndësinë që pati ajo ndeshje në rrugëtimin e Turqisë drejt Botërorit.