Drejtuesit e futbollit italian po shqyrtojnë mundësinë e ndryshimeve në formatin e Kupës së Italisë, me synimin për ta bërë garën më tërheqëse dhe për të rritur pjesëmarrjen e klubeve nga kategoritë më të ulëta.
Sipas gazetës “La Gazzetta dello Sport”, Lega Serie A po vlerëson disa propozime që mund të hyjnë në fuqi nga sezoni 2027/28. Kjo temë është diskutuar edhe gjatë asamblesë së klubeve të zhvilluar të premten, në prag të tenderit të ri për të drejtat televizive të kompeticionit.
Marrëveshja aktuale me “Mediaset”, me vlerë 56 milionë euro në vit dhe që garanton transmetim falas për tifozët, skadon në fund të këtij sezoni. Përmes tenderit të ardhshëm, drejtuesit e futbollit italian synojnë të rrisin të ardhurat nga të drejtat televizive dhe njëkohësisht t’i japin një shtysë të re Kupës së Italisë.
Një nga objektivat kryesorë është zgjerimi i pjesëmarrjes, duke u krijuar më shumë mundësi skuadrave të Serie C për të garuar në këtë kompeticion. Një ndryshim i tillë do t’u jepte klubeve të kategorive më të ulëta mundësinë të përballeshin me ekipet e mëdha të futbollit italian.
Në mesin e propozimeve që po shqyrtohen është edhe rikthimi i fazës së grupeve në raundet e para. Ky sistem është përdorur për herë të fundit në sezonin 2004/05, përpara se Kupa e Italisë të kalonte në formatin aktual, të bazuar në eliminimin direkt.
Megjithatë, deri tani nuk është marrë asnjë vendim përfundimtar. Diskutimet pritet të vazhdojnë gjatë muajve të ardhshëm, ndërsa drejtuesit e Lega Serie A do të vlerësojnë alternativat përpara se të përcaktojnë formatin e ri të mundshëm.
Nëse propozimet miratohen, Kupa e Italisë mund të pësojë ndryshime të rëndësishme nga sezoni 2027/28, si në organizimin e garës, ashtu edhe në numrin e skuadrave pjesëmarrëse.