Kushtetuesja fillon shqyrtimin e dekretit të presidentes javën e ardhshme

Gjykata Kushtetuese ende nuk ka filluar shqyrtimin e lëndës që ka të bëjë me dekretin e presidentes Vjosa Osmani për shpërndarjen e kuvendit.

Burime brenda gjykatës thonë se fillimisht duhet të përkthehen të gjitha materialet e dorëzuara nga palët e interesit në gjuhët përkatëse për shtatë gjyqtarët e Gjykatës Kushtetuese.

Në fillim të javës së ardhshme, Kushtetuesja pritet të fillojë shqyrtimin e dekretit të presidentes Vjosa Osmani për shpërndarjen e kuvendit.

RTV21 një ditë më parë ka raportuar se Gjykata Kushtetuese do t’i trajtojë së bashku kërkesën e kryeministrit Albin Kurti dhe atë të Grupit parlamentar të LVV-së, për shkak të objektit të njëjtë.