Tag: WhatsApp

Përdoruesit e WhatsApp-it po këshillohen të aktivizojnë një funksion të rëndësishëm të sigurisë, i cili mund të ndihmojë në mbrojtjen e llogarive të tyre nga hakerët.

Siç raporton UNILAD Tech, thirrja për aktivizimin e këtij funksioni është bërë nga një krijuese e përmbajtjes në TikTok, e njohur si Lucy, pasi llogaria e WhatsApp-it të nënës së saj ishte hakuar gjatë fundjavës.

Pas këtij rasti, ajo ka paralajmëruar përdoruesit për rëndësinë e aktivizimit të verifikimit me dy hapa, një veçori që shton një nivel shtesë sigurie në llogari.

“Ky është sinjali juaj për ta aktivizuar menjëherë verifikimin me dy hapa në WhatsApp”, ka deklaruar ajo në videon e publikuar në TikTok.

Për ta aktivizuar këtë funksion, përdoruesit duhet të hyjnë në cilësimet e aplikacionit, të zgjedhin opsionin “Llogaria” dhe më pas “Verifikimi me dy hapa”.

Pas kësaj, duhet të vendosin një PIN me gjashtë shifra, i cili do të kërkohet si masë shtesë sigurie gjatë regjistrimit të numrit të telefonit në WhatsApp.

Lucy ka këshilluar gjithashtu përdoruesit që të kontrollojnë pajisjet e lidhura me llogarinë e tyre, për të parë nëse ndonjë pajisje e panjohur ka qasje në të.

Në rast se vërejnë pajisje të panjohura, ajo ka rekomanduar shkëputjen e menjëhershme të tyre.

Verifikimi me dy hapa është një nga masat që mund ta vështirësojë marrjen e kontrollit mbi një llogari, edhe në rastet kur dikush arrin të sigurojë kodin e regjistrimit të përdoruesit.

WhatsApp po zhvillon një funksion të ri për përdoruesit e iPhone, i cili synon ta bëjë më të lehtë gjetjen e fotografive, videove, lidhjeve dhe dokumenteve të shkëmbyera në biseda.

Bëhet fjalë për funksionin Media Hub, i cili u prezantua vitin e kaluar në versionet e aplikacionit për Mac dhe ueb, ndërsa së fundmi është vërejtur edhe në versionin beta të WhatsApp-it për iOS, me numër 26.42.10.74, raporton B92, duke iu referuar GSMArena-s.

Funksioni i ri do të jetë i qasshëm përmes cilësimeve të aplikacionit dhe do t’i mbledhë në një vend të vetëm materialet mediatike të pranuara në biseda. Megjithatë, ai nuk do të përfshijë fotografitë, videot dhe materialet e tjera të dërguara nga vetë përdoruesit, si dhe mesazhet apo përmbajtjet që zhduken pas një periudhe të caktuar.

Dy seksione për organizimin e materialeve

Media Hub do të përmbajë dy seksione kryesore. Seksioni “New” do të shfaqë materialet e pranuara së fundmi, ndërsa “All media” do t’u mundësojë përdoruesve të shohin të gjitha përmbajtjet e disponueshme.

Përdoruesit do të mund t’i filtrojnë materialet sipas kategorisë, duke i ndarë fotografitë, videot dhe lidhjet. Gjithashtu, do të kenë mundësi të zgjedhin mes paraqitjes në formë liste ose rrjeti, si dhe të veçojnë përmbajtjet që u kanë pëlqyer.

Për secilin material do të jenë të disponueshme disa veprime, përfshirë përcjelljen në një bisedë tjetër, reagimin, shënimin me yll dhe kalimin e drejtpërdrejtë te biseda ku materiali është pranuar fillimisht.

Kërkimi do ta lehtësojë gjetjen e përmbajtjeve

Një nga veçoritë më të dobishme të Media Hub pritet të jetë funksioni i integruar i kërkimit. Ai do të mbështesë kërkimin përmes përshkrimeve të fotografive, videove dhe lidhjeve, duke ua lehtësuar përdoruesve gjetjen e materialeve edhe kur nuk e mbajnë mend se kur i kanë pranuar.

Kjo veçori synon të thjeshtojë qasjen në përmbajtjet e shkëmbyera më herët, pa pasur nevojë që përdoruesit të kërkojnë manualisht nëpër biseda.

Kur pritet të jetë i disponueshëm?

Për momentin, Media Hub është ende në fazën e zhvillimit dhe nuk është i disponueshëm as për testuesit e versionit beta.

Pritet që WhatsApp ta testojë funksionin me një numër të kufizuar përdoruesish në njërin nga përditësimet e ardhshme, përpara se të vendoset për një shpërndarje më të gjerë.