ATV

Tag: Pjetër Shala

  • Vazhdon procesi gjyqësor ndaj Pjetër Shalës

    Vazhdon procesi gjyqësor ndaj Pjetër Shalës

    Pas pushimit dimëror, në Dhomat e Specializuara të Kosovës, sot për të dytën ditë me radhë vazhdon procesi gjyqësor ndaj Pjetër Shalës. Gjatë javës janë paraparë të mbahen katër seanca në rastin Shala.

    Në Dhomat e Specializuar të Kosovës në Hagë, të martën ka filluar dëshminë dëshmitari i 10 i mbrojtjes, Safet Gashi, në gjykimin ndaj Pjetër Shalës. Dëshmitari, dje, ka thënë se nuk e di që UÇK-ja ka arrestuar apo ndaluar dikë. Ai tha se UÇK-ja nuk ka pasur të bëjë asnjëherë me civilë.

    Dëshmitari Safet Gashi do të vazhdojë dëshminë e tij edhe gjatë ditës së sotme, në Dhomat e Specializuara të Kosovës (DhSK) në Hagë, përkatësisht në çështjen gjyqësore ndaj Pjetër Shalës.

    Sipas aktakuzës, Pjetër Shala ishte anëtar i Ushtrisë Çlirimtare të Kosovës (‘UÇK’) i stacionuar në Kukës, Shqipëri. Aktakuza kundër Shalës u konfirmua më 12 qershor 2020 dhe versioni i redaktuar u bë publik më 15 prill 2021. Më 18 tetor 2021, gjykatësi i procedurës paraprake miratoi pjesërisht mocionet e Mbrojtjes dhe urdhëroi ZPS-në që të ndryshojë aktakuzën në mënyrë që të ofrojë nivelin e kërkuar të konkretitetit dhe të qartësisë lidhur me pjesëmarrjen personale të të akuzuarit në incidente. ZPS-ja e dorëzoi aktakuzën e korrigjuar më 1 nëntor 2021. Kjo ishte aktakuza në fuqi në këtë çështje.

    Shala u arrestua më 16 mars 2021 në Belgjikë dhe u transferua në objektin e paraburgimit të Dhomave të Specializuara të Kosovës më 15 prill 2021.

    Më 19 prill 2021, Shala pati paraqitjen e tij të parë para gjykatësit të procedurës paraprake dhe u vetëdeklarua i pafajshëm për të gjitha pikat e aktakuzës.

    Gjykimi filloi më 21 shkurt 2023 me deklaratat hyrëse të Prokurorit të Specializuar, të përfaqësuesit të viktimave dhe të Mbrojtjes. Më 6 korrik 2023, ZPS-ja e mbylli çështjen e vet.

    Ndërsa në rastin gjyqësor ‘Hashim Thaçi dhe të tjerët’, seancat do të fillojnë më 15 janar.

    Gjatë muajit janar sipas kalendarit të Dhomave të Specializuar, do të jenë në tërësi 16 seanca gjyqësore, në dy rastet gjyqësore Hashim Thaçi dhe të tjerët’ dhe ‘Shala’.

  • Nga sot rinis punën Gjykata Speciale, pritet vendimi për Pjetër Shalën

    Nga sot rinis punën Gjykata Speciale, pritet vendimi për Pjetër Shalën

    Pas tri jave pushimi, në Dhomat e Specializuara në Hagë sot palët do të kthehen në sallat e gjykimit, për të rinisur punën e tyre.

    Sipas kalendarit të kësaj Gjykate, nga e marta e deri të premten, para trupit gjykues do të paraqitet Pjetër Shala, derisa javën tjetër gjykimi do të vazhdojë edhe për ish-krerët e UÇK-së Hashim Thaci, Kadri Veselin, Jakup Krasniqin e Rexhep Selimin.

    Këtë muaj, trupi gjykues do të mund të vendos rreth çështjes së Pjetër Shalës, i cili akuzohet për krimet lufte.

    Dhomat e Specializuara, kanë nisur pushimin dimëror më 18 dhjetor, derisa pas vdekjes së njërit nga avokatët e Kadri Veselit, mbrojtja kishte kërkuar kohë disa javë, për të zëvendësuar avokatin.

  • Pjetër Shalës i refuzohet kërkesa për vizitë tek psikologu

    Pjetër Shalës i refuzohet kërkesa për vizitë tek psikologu

    Kryetarja e trupit gjykues, Mappie Veldt-Foglia, me vendimin e 14 dhjetorit 2023, ka refuzuar kërkesën e Pjetër Shalës për një vizitë psikologjike, me arsyetimin se mbrojtja është dashur t’i drejtohet regjistruesit të paraburgimit përpara se ta përfshijë panelin në këtë çështje.

    Në vendim, thuhet se paneli i trupit gjykues, më 11 dhjetor 2023 mori kërkesë urgjente për vizitë të psikologut për të akuzuarin Pjetër Shala, por kjo kërkesë është refuzuar, raporton “Betimi për Drejtësi”.

    “REFUZON Kërkesën; dhe b. URDHËRON palët dhe mbrojtësin e viktimave që të respektojnë udhëzimet e Panelit siç janë përcaktuar në këtë vendim”, thuhet në dispozitivin e këtij aktvendimi.

    Në arsyetimin e këtij vendimi, thuhet se më 25 tetor 2023, trupi gjykues vendosi se në rast që Shala shpallet fajtor për një ose më shumë nga krimet për të cilat akuzohet, do t’i përcaktojë dënimin përkatës me shpalljen e aktgjykimit.

    Si rrjedhojë, paneli udhëzoi mbrojtjen e Shalës që të paraqesë çfarëdo dëshmie për dënimin, më së voni deri në mbylljen e rastit. Kurse, më 29 nëntor 2023, paneli vendosi që data e mbylljes së këtij afati për mbrojtjen të jetë deri më 15 janar 2024.

    Por, thuhet se më 11 dhjetor 2023, paneli kishte marrë kërkesë urgjente nga mbrojtja e Pjetër Shalës për një vizitë psikologjike, së bashku me njoftimin për kërkesën për thirrje të provave relevante për dënim.

    Gjithnjë sipas vendimit, mbrojtja e Shalës kishte parashtruar se ka kontaktuar me një eksperte psikologjike, me qëllim që të kryejë një vlerësim për të akuzuarin dhe të prodhojë një raport mbi shëndetin e tij mendor, si dhe ndikimin që kanë pasur procedurat e Dhomave të Specializuara të Kosovës tek ai.

    “Mbrojtja për Pjetër Shalën (Mbrojtja) parashtron se ka kontaktuar me një eksperte psikologjike, e regjistruar në Regjistrin Kombëtar të Ekspertëve në Gjykatën Belgjike, znj. Vanessa Milazzo (Znj. Milazzo), me qëllim që të kryejë një vlerësim të të akuzuarit dhe të prodhojë një raport mbi shëndetin e tij mendor, ndikimin e procedurave para Dhomës së Specializuar në jetën e tij , dhe sjelljen e tij pas ngjarjeve të pretenduara në aktakuzën e konfirmuar deri më sot. Mbrojtja synon ta prezantojë raportin si provë me qëllim të dënimit dhe/ose të dëshmojë znj. Milazzo para trupit gjykues”, thuhet në vendim.

    Tutje, thuhet se mbrojtja i kërkoi panelit që të krijohen rrethanat që psikologja ta vizitojë Shalën më 18 dhe 19 dhjetor 2023 dhe t’i jepet asaj të paktën tri orë kohë në vizita.

    “Për këtë qëllim, mbrojtja i kërkon Panelit që të udhëzojë Sekretarin dhe Njësinë e Menaxhimit të Paraburgimit që: (i) të lejojnë znj. Milazzo të vizitojë të akuzuarin më 18 dhe 19 dhjetor 2023; (ii) heq dorë nga kërkesa që vizitat të organizohen 15 ditë përpara; (iii) të lejojë znj. Milazzo të sjellë një fletore dhe mjete shkrimi në vizitë, për të mbajtur shënime nga bisedat e saj me të Akuzuarin; dhe (iv) t’i japë asaj të paktën tre orë gjatë çdo vizite për të kryer vlerësimin e saj. Më 12 dhjetor 2023, për të siguruar një zhvillim të shpejtë të procedurave, Paneli e refuzoi kërkesën përmes emailit, me arsye dhe udhëzime të mëtejshme për t’u ndjekur, dhe udhëzoi Mbrojtja t’i bëjë kërkesat e nevojshme Kryeshefit të Paraburgimit pa vonesë”, thuhet në vendim.

    Aty thuhet se paneli kërkoi informacion shtesë nga mbrojtja, nëse raporti i Milazzos do të përgatitej në anglisht ose në një gjuhë tjetër, kurse mbrojtja e informoi panelin se raporti do të përgatitej në frëngjisht dhe do të përkthehej në anglisht.

    Pas kësaj, vendimi ofron arsyet e panelit për refuzimin e kësaj kërkese, si dhe cakton afatet kohore për paraqitjen e provave nga eksperti i thirrur nga mbrojtja dhe parashtresat eventuale si përgjigje nga ZPS-ja dhe mbrojtja e viktimave.

    Sipas kësaj, paneli ka theksuar se asgjë në kërkesë nuk sugjeron që mbrojtja i është drejtuar shefit të paraburgimit me ndonjë kërkesë përkatëse dhe se një kërkesë e tillë të është refuzuar. Po ashtu, thuhet se paneli nuk ka vendosur ndonjë kufizim në kontaktet dhe komunikimet e të akuzuarit që do të kërkonte ndërhyrjen e panelit për të autorizuar ndonjë vizitë.

    Rrjedhimisht, paneli ka konstatuar se mbrojtja e Shalës është dashur që së pari t’i drejtohet Regjistruesit të Paraburgimit përpara se ta përfshijë panelin dhe nuk gjen ndonjë arsye për të ushtruar mbikëqyrje gjyqësore në këtë situatë.

    “Rrjedhimisht, Paneli konstaton se Mbrojtja është dashur së pari t’i drejtohet Kryeshefit/Regjistruesit të Paraburgimit para se të kontaktojë Panelin dhe nuk gjen ndonjë arsye për të ushtruar mbikëqyrje gjyqësore në këtë situatë. Për këto arsye, Paneli e refuzon kërkesën dhe e udhëzon mbrojtjen që t’i bëjë kërkesat e nevojshme Kryeshefit të Paraburgimit pa vonesë”, thuhet në vendim.

    Kryetarja e trupit gjykues, Veldt-Foglia përmes këtij vendimi ka sqaruar se është vendosur mbi këtë kërkesë të mbrojtjes pa iu dhënë mundësia për t’u dëgjuar ZPS-së dhe mbrojtjes së viktimave.

    “Paneli është i vetëdijshëm për hapat e ndryshëm që duhet të ndërmerren në mënyrë që të prodhohet raporti i ekspertit dhe fakti që data e synuar për mbylljen e çështjes së mbrojtjes është caktuar më 15 janar 2024. Nuk u shkaktua asnjë paragjykim ndaj ZPS-së ose mbrojtësit të viktimave duke e shfuqizuar kërkesën pa i dëgjuar”, thuhet në vendim.

    Ndërsa sa i përket udhëzimeve të mëtejshme mbi paraqitjen e dëshmive të ekspertes, paneli ka konstatuar se mbrojtja nuk ka vepruar me shpejtësi, por në fakt ka treguar mungesë të kujdesit.

    “Mbrojtja duhet të kishte kontaktuar ekspertin sapo Paneli të kishte komunikuar vendimin e tij, më 25 tetor 2023, se dënimi, nëse ka, do të shqiptohej së bashku me aktgjykimin gjyqësor, dhe jo vetëm pasi Paneli të caktonte datën e synuar për mbylljen të çështjes së mbrojtjes. Paneli e udhëzoi mbrojtjen në atë kohë që të paraqesë çfarëdo dëshmie mbi dënimin gjatë prezantimit të rastit të saj dhe më së voni, deri në mbylljen e rastit. Kur Paneli cakton datën e synuar për mbylljen e çështjes së një pale, të gjitha provat që ende duhen dëgjuar duhet të dihen dhe… duhet të përgatitet të mbyllë çështjen e saj. Pasi të përcaktohet, data e synuar mund të ndryshojë vetëm nëse lindin rrethana të paparashikuara”, thuhet në vendimin mbi kërkesën e mbrojtjes së Pjetër Shalës.

    Për këto arsyeje, paneli ka vendosur që të shkurtojë afatet kohore përkatëse për ZPS-në dhe mbrojtjen e viktimave në mënyrë që të sigurohet që provat e mbrojtjes të paraqiten përpara datës së përcaktuar.

    Si rrjedhojë, paneli ka udhëzuar që në rast që mbrojtja vendos të paraqes provat e ekspertes psikologjike në këtë çështje gjyqësore, jo më larg se 4 janari 2024 duhet t’i prezantojë ZPS-së dhe mbrojtjes së viktimave raportin përfundimtar të psikologes së bashku me përkthimin në anglisht.

    Po ashtu, jo më larg se data e lartpërmendur, mbrojtja u obligua që të bëjë kërkesën për të shtuar psikologen dhe raportin e saj në listën e dëshmitarëve dhe të informojë panelin, ZPS-në dhe mbrojtjen e viktimave në rast që synon që ta thërras psikologen për të dëshmuar personalisht apo ka për qëllim të shtojë në listën e provave vetëm raportin e saj.

    Po ashtu, në rast që psikologja Milazzo ftohet për të dëshmuar, mbrojtja duhet të sigurojë që ajo të jetë e disponueshme në datat specifike.

    “Mbrojtja do të sigurojë gjithashtu që znj. Milazzo të jetë e disponueshme për të dëshmuar, nëse ajo do të thirret për të dëshmuar, në një nga datat e mëposhtme: 11, 12, 19 dhe 22 janar 2024”, thuhet në vendim.

    Ndërsa për ZPS-në dhe mbrojtjen e viktimave, gjykatësja Veldt-Foglia udhëzoi që jo më vonë se 9 janari 2024 t’i përgjigjen kërkesës së mbrojtjes për të shtuar Milazzon në listën e dëshmitarëve apo raportin e saj në listën e provave.

    Po ashtu, thuhet se ZPS-ja dhe mbrojtja e viktimave mund t’i bëjnë parashtrimet e tyre edhe më 9 janar 2024, pra gojarisht gjatë seancës dëgjimore të kësaj date.

    Pjetër Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.

    Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

    “Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.

  • Pjetër Shalës i vazhdohet paraburgimi

    Pjetër Shalës i vazhdohet paraburgimi

    Michael Doyle, zëdhënës i Dhomave të Specializuara të Kosovës (DhSK) në Hagë, përmes informimit javor të DhSK-së për media ka dhënë informacionet lidhur me aktivitetet kryesore të realizuara në këtë gjykatë gjatë javës një jave.

    Zëdhënësi Doyle njoftoi se në çështjen gjyqësore Hashim Thaçi, Kadri Veseli, Rexhep Selimi dhe Jakup Krasniqi, blloku i radhës i seancave gjyqësore përfundoi të enjten e kaluar. Sipas tij, dëshmitari i 36-të i thirrur nga Prokuroria, z. Sadik Halitjaha, pritet të vazhdojë dhënien e dëshmisë gjatë seancës gjyqësore të ardhshme, më 4 dhjetor, raporton “Betimi për Drejtësi”.

    Doyle në vazhdim tha se më 17 nëntor, në të njëjtën çështje gjyqësore, Zyra e Prokurorit të Specializuar parashtroi një kërkesë urgjente për ndryshim të kushteve të paraburgimit të z. Thaçi, z. Veseli dhe z. Selimi. Versioni i redaktuar publik i kërkesës u lëshua dje dhe gjendet në faqen e internetit të DHSK-së.

    ” Në këtë parashtrim, Prokuroria pretendon se të akuzuarit kanë shkelur urdhrat e Trupit Gjykues, duke zbuluar identitetet e dëshmitarëve të mbrojtur dhe/ose duke ua shpërndarë përmbajtjen konfidenciale të dëshmive personave që i kanë vizituar në objektin e paraburgimit. Prokuroria pretendon gjithashtu se hetimet kanë zbuluar tentime të mëtejshme për të penguar procesin gjyqësor, përfshirë dhënien e udhëzimeve se si duhet të japin dëshmi dëshmitarët dhe planet për kontaktimin e dëshmitarëve”, deklaroi zëdhënësi Doyle.

    Gjithashtu në çështjen gjyqësore Thaçi dhe të tjerët, Doyle tha se dje u lëshua versioni i redaktuar publik i Vendimit mbi Kërkesën e Mbrojtësit Kujdestar për Shtyrje të Dëshmisë së W04577-ës, që tani gjendet në faqen e internetit.

    “Vendimi ka të bëjë me dëshmitarin e 29-të të thirrur nga Prokuroria në këtë çështje gjyqësore. Në vendim, Trupi Gjykues miratoi kërkesën e mbrojtësit kujdestar për shtyrje të dëshmisë së dëshmitarit, bazuar në faktin se psikologu i Zyrës për Mbrojtje dhe Mbështetje të Dëshmitarëve konstatoi se dëshmitari aktualisht nuk është në gjendje të japë dëshmi dhe se palët nuk e kundërshtuan kërkesën e mbrojtësit kujdestar. Trupi Gjykues miratoi shtyrjen e dëshmisë së dëshmitarit deri në një njoftim të ardhshëm dhe deri kur Trupi Gjykues të bindet se dëshmitari është në gjendje të japë dëshmi”, deklaroi ai.

    Lidhur me gjykimin kundër Pjetër Shalës, gjatë kësaj konference u tha se seancat po mbahen këtë javë dhe vazhdojnë dhe javën tjetër.

    Sipas Zëdhënësit Doyle, më 20, 21 dhe 22 nëntor, dha dëshmi dëshmitari i pestë, z. Zijadin Hoxha. Më 22 nëntor, filloi dhënien e dëshmisë dëshmitarja e gjashtë e thirrur nga Mbrojtja, znj. Safete Hadërgjonaj, dëshmia e së cilës përfundoi sot. Dëshmitarja e shtatë e thirrur nga Mbrojtja, Time Kadrijaj, filloi dhënien e dëshmisë sot.

    “Më 20 nëntor, Trupi Gjykues vendosi lidhur me vazhdimin e paraburgimit të Pjetër Shalës. Gjykatësit konstatuan se vazhdon të ekzistojë rreziku që i akuzuari të pengojë procesin gjyqësor dhe/ose të kryejë krime të tjera, përfshirë kundër dëshmitarëve që kanë dhënë dëshmi ose që do të japin dëshmi në këtë proces gjyqësor. Në lidhje me lirimin e përkohshëm, Trupi Gjykues gjykoi se këto rreziqe mund të zvogëlohen mjaftueshëm vetëm përmes kornizës së monitorimit të komunikimeve të zbatueshme në objektin e paraburgimit të DHS-së, u tha në fund të kësaj konference./BetimipërDrejtësi

  • Vazhdon procesi gjyqësor ndaj Pjetër Shalës

    Vazhdon procesi gjyqësor ndaj Pjetër Shalës

    Sot do të vazhdojë procesi gjyqësor ndaj Pjetës Shalës në Gjykatën Speciale në Hagë.

    Seanca nis në orën 09:30 dhe pritet të përfundojë rreth orës 16:00.

    Sipas aktakuzës, Pjetër Shala ishte anëtar i Ushtrisë Çlirimtare të Kosovës (‘UÇK’) i stacionuar në Kukës, Shqipëri.

    Ai akuzohet për krime të luftës të ndalimit arbitrar, trajtimit mizor, torturës dhe vrasjes së paligjshme.

    Krimet për të cilat akuzohet Shala dyshohet se u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej UÇK-së. Sipas aktakuzës, viktimat e këtyre krimeve ishin të gjithë shtetas të RFJ-së dhe persona të cilët nuk merrnin pjesë aktivisht në luftime.

  • Dëshmitari thotë se gjatë luftës nuk ka takuar e as njohur ndonjë person me emrin Pjetër Shala

    Dëshmitari thotë se gjatë luftës nuk ka takuar e as njohur ndonjë person me emrin Pjetër Shala

    Në Dhomat e Specializuara të Kosovës (DhSK) në Hagë, në gjykimin ndaj Pjetër Shalës, po vazhdon dhënien e dëshmisë dëshmitari Bedri Dervishaj, i cili duke u përgjigjur në pyetjet e mbrojtjes së Shalës, tha se gjatë luftës as nuk e ka takuar dhe as nuk e ka njohur ndonjë person me emrin Pjetër Shala.

    Këtë deklarim, Dervishaj e bëri duke u përgjigjur në pyetjet e avokatit Mohamed Hedi Aouini në lidhje me Pjetër Shalën, raporton “Betimi për Drejtësi”.

    Ai tha se nuk ka takuar as njohur një person me emrin Pjetër Shala gjatë luftës dhe se as në Brigadën 128 nuk ka njohur ndonjë person me atë emër.

    I pyetur se a ka dëgjuar gjatë luftës për nofkën “Ujku”, dëshmitari mohoi të ketë dëgjuar për këtë nofkë, por se për të kishte dëgjuar paslufte.

    Sipas tij, me nofkën “Ujku” ka qenë një person, i cili ishte me Ramush Haradinajn.

    Dëshmitari tha se për Pjetër Shalën ka dëgjuar përmes televizionit.

    Në pjesën me të madhe të sesionit të paradites, dëshmitari është pyetur për ndërtesën ku ai ka shkuar për të marrë injeksion, hapësirën e saj dhe personat që ka takuar aty.

    Lidhur me këtë, dëshmitari tha se ka kaluar kohë e gjatë dhe nuk i kujtohet saktësisht.

    Më pastaj, dëshmitarit i janë paraqitur disa foto të një objekt, ku dëshmitari ka thënë se në këtë ndërtesë te hyrja ka marrë injeksionin.

    Ai ka shtuar se hapësira ku ka marrë injeksionin ka qenë 2 metra me 1 metër, ku në të kanë qenë dy karrige dhe një çantë me barna dhe ka takuar një doktor.

  • Hagë: Vazhdon edhe sot seanca gjyqësore ndaj Pjetër Shalës

    Hagë: Vazhdon edhe sot seanca gjyqësore ndaj Pjetër Shalës

    Në Dhomat e Specializuara në Hagë do të vazhdojë edhe sot gjykimi ndaj ish-pjesëtarit të Ushtrisë Çlirimtare të Kosovës, Pjetër Shala.

    Kjo seancë gjyqësore do të nisë në orën 9:30.

    Të hënën ka filluar dëshminë dëshmitar i i Zyrës së Prokurorit të Specializuar (ZPS), Marek Gasior, në cilësinë e ekspertit mjekoligjor nga Polonia. Ky ka dëshmuar pa masa mbrojtëse derisa është intervistuar nga prokurorja Gaia Pergolo. Ai ka thënë se si ekspert i mjekësisë ligjore në Kosovë, nga viti 2000 deri në vitin 2008, ka punuar në kuadër të misionit të OKB-së, ndërsa më pas për katër vjet ka punuar me Bashkimin Evropian.

    Sipas Speciales “Krimet për të cilat akuzohet Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës(Shqipëri), që pretendohet se përdorej prej Ushtrisë Çlirimtare të Kosovës”. Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, në bazë të një kërkese për bashkëpunim në zbatimin e fletarrestit dhe urdhrit për transferim lëshuar nga Dhomat e Specializuara të Kosovës.

  • Specialja ia vazhdon paraburgimin Pjetër Shalës

    Specialja ia vazhdon paraburgimin Pjetër Shalës

    Dhomat e Specializuara të Kosovës (DhSK) me vendimin e 6 qershorit 2023, kanë vazhduar masën e paraburgimit për Pjetër Shalën.

    “Paneli urdhëron vazhdimin e paraburgimit të të akuzuarit”, thuhet në dispozitiv të vendimit, raporton “Betimi për Drejtësi”.

    Po ashtu, është urdhëruar ZPS-ja dhe mbrojtësi i viktimave, nëse dëshirojnë që të paraqesin parashtresa për shqyrtimin e radhës të paraburgimit të të akuzuarit jo më vonë se 6 korrik 2023.

    Tutje, është urdhëruar mbrojtja që të paraqesë parashtresa për shqyrtimin e radhës të paraburgimit të të akuzuarit, nëse dëshiron, jo më vonë se 13 korrik 2023 dhe ka përcaktuar që çdo përgjigje, nëse ZPS-ja dhe mbrojtësi i viktimave dëshirojnë, do të dorëzohet jo më vonë se 18 korrik 2023.

    Në fillim të këtij vendimi paraqitet historiku procedural, ndër të tjera se ZPS ka dorëzuar parashtresën e saj për shqyrtimin e njëmbëdhjetë të paraburgimit, duke kërkuar vazhdimin e paraburgimit të të akuzuarit, se mbrojtja iu është përgjigj parashtresës të ZPS-së duke kërkuar nga Paneli që të urdhërojë lirimin e përkohshëm të të akuzuarit ose vendosjen në arrest shtëpiak tek rezidenca e tij në Belgjikë, dhe së fundmi kundër-përgjigjen e ZPS-së.

    Në pjesën arsyetuese të vendimit thuhet se Paneli rikujton se, në vendimin konfirmues, gjyqtari i procedurës paraprake përcaktoi se ekzistonte një “dyshim i bazuar mirë”, në kuptim të nenit 39(2) të Ligjit, se i akuzuari ka kryer vepra penale brenda juridiksionit të DhSK-së .

    ‘‘Duke kujtuar se pragu i “dyshimit të bazuar mirë” është domosdoshmërisht më i lartë se “dyshimi i bazuar” i kërkuar për vazhdimin e paraburgimit, Paneli rithekson se, në bazë të vendimit për konfirmim, kërkesa e nenit 41(6)(a) të Ligjit është plotësuar’’, thuhet në vendim.

    Në lidhje me këtë, dhe përveç dëshmive të dëshmitarëve të dëgjuara deri më sot dhe materialeve tjera mbështetëse, Paneli konstatoi në këtë vendim se kërkesa sipas nenit 41(6)(a) të Ligjit nuk ka pushuar së ekzistuari dhe për këtë arsye vazhdon të përmbushet.

    Ndërkaq, thuhet se Paneli rikujton se më parë ka gjetur se i akuzuari nuk është në rrezik të arratisjes andaj edhe nuk është i bindur nga parashtresat e ZPS-së se vendimi i Apelit për deklaratat e mëparshme është në gjendje ta ndryshojë atë vlerësim.

    ‘‘Rrjedhimisht, Paneli mbetet i bindur se i akuzuari nuk është në rrezik të arratisjes dhe se një rrezik i tillë, edhe nëse ekzistonte, mund të zbutet në mënyrë adekuate me kushtet që do t’i vendosen në përputhje me nenin 41(12) të Ligjit dhe rregullin 56(5) të Rregullores’’, thuhet tutje.

    Kurse thuhet se Paneli edhe më parë ka vërtetuar se ekziston rreziku i pengimit të procedurës penale, sipas nenit 41 (6) (b) (ii) të Ligjit, për shkak të fillimit të gjykimit dhe dëshmitë e dëshmitarëve të ZPS-së, zbulimin e identitetit të dëshmitarëve dhe provave shoqëruese, duke përfshirë informacione potencialisht inkriminuese. deklaratat kërcënuese të të akuzuarit [REDAKTUAR] dhe klima e përgjithshme, e themeluar dhe e vazhdueshme e frikësimit të dëshmitarëve në Kosovë.

    Sipas kësaj gjykate, këta faktorë dhe rrethana vazhdojnë të ekzistojnë dhe nuk është paraqitur asnjë informacion apo zhvillim që i minon ata dhe përfundimin që ata mbështesin.

    ‘‘Përkundrazi, fakti që paraqitja e provave është në vazhdim e sipër dhe se dëshmitarë shtesë të ZPS-së kanë ofruar prova, duke përfshirë prova potencialisht inkriminuese, do të thotë se rreziku i pengimit të procedurës është ende shumë i pranishëm’’, thuhet tutje në arsyetim të vendimit.

    Gjithashtu, sipas këtij vendimi Paneli nuk është i bindur nga argumenti i mbrojtjes se deklaratat e të akuzuarit nuk duhet të mbështeten për qëllime të shqyrtimit të paraburgimit.

    ‘‘Kolegji i Gjykatës së Apelit e la në fuqi vendimin e Panelit për deklaratat e mëparshme dhe deklaratat janë dhe mbeten në dispozicion të Panelit derisa dhe nëse nuk vendoset ndryshe’’, thuhet më tej.

    Rrjedhimisht, Paneli ka konstatuar se vazhdon të ekzistojë rreziku që i akuzuarit të pengojë mbarëvajtjen e procedurave të DhSK-së.

    ‘‘Paneli rikujton se, përderisa ekzistenca e rrezikut të pengimit nuk përkthehet automatikisht në rrezik të kryerjes së krimeve të mëtejshme, faktorët që mbështesin të parën janë të rëndësishëm për vlerësimin e këtij të fundit në rastin aktual’’, thuhet në vendim.

    Sipas kësaj gjykate, i akuzuari tani ka njohuri të plotë për rastin kundër tij, duke përfshirë identitetin e dëshmitarëve të PSP-së, pasi masat mbrojtëse janë hequr ndaj të akuzuari, deri në vitin 2016 dhe 2019, i akuzuari bëri deklarata kërcënuese [REDAKTUAR] dhe paraqitja e provave nga ZPS është në proces.

    ‘‘Përveç kësaj, Paneli thekson se dëshmitë e gjashtë dëshmitarëve të parë tani janë përfunduar dhe dëshmia e dëshmitarit të shtatë është në vazhdim e sipër. Prandaj z. Shala ka marrë më tej një pasqyrë specifike për rastin dhe prova kundër tij’’, thuhet më tutje në vendim.

    Andaj, Paneli ka konkluduar se, për qëllimet e rishikimit periodik të paraburgimit të të akuzuarit, në pajtim me nenin 41(10) të Ligjit dhe rregullin 57(2) të Rregullores, koha që i akuzuari ka kaluar në paraburgim nuk është joproporcionale .

    Versionin e redaktuar publik të vendimit për shqyrtimin e njëmbëdhjetë të paraburgimit të Pjetër Shalës mund ta gjeni në gjuhën angleze: KËTU.

  • Mbrojtja e Pjetër Shalës ia paraqet disa fotografi dëshmitarit të shtatë

    Mbrojtja e Pjetër Shalës ia paraqet disa fotografi dëshmitarit të shtatë

    Në Dhomat e Specializuara të Kosovës në Hagë është duke vazhduar gjykimi kundër Pjetër Shalës, ku është intervistuar edhe dëshmitari i shatë i Zyrës së Prokurorit të Specializuar.

    Gjatë seancës, mbrojtja e të mbrojtja e të akuzuarit i ka shfaqur disa fotografi për dëshmitarin, por ato nuk janë bërë publike.

    Këto fotografi janë të disa personave për të cilët dëshmitari më herët kishte thënë që nuk i njeh, sipas avokatit Mohamed Hédi Aouini.

    Mirëpo sot dëshmitari ka thënë që në njërën prej fotografive është një person të cilin e njeh, por më parë, sipas tij, nuk ka arritur ta identifikojë.

    “A konfirmoni që nuk e keni njohur këtë person kur ju është treguar kjo fotografi më përpara, jo sot, por në atë momentin që nuk duhet ta përmendim?” e ka pyetur avokati Aouini.

    “Propozoj që t’i bëhen këto pyetje dëshmitarit, a mund të komentoni pse nuk e keni njohur këtë person në këtë fotografi atëherë?”, është përgjigjur kryegjykatësja Veldt Foglia.

    “Kam qenë edhe sëmurë nga sytë, dhe jam ende sëmurë, nuk kam pasur syze dhe nuk i kam vërejtur fort, unë që dy vjet kam fillu me syze, i kam dy palë, edhe të leximit edhe kështu, mu tash mu kujtu dhe prapë po them se mua po më përngjan shumë në personin që ka qenë palë e dëmtuar, se ka qenë në dhomën time. Nuk do të thotë që nuk e kam njohur sot e të nesërmen po e njoh, se kokën e kam goxha të ngarkuar”, është përgjigjur dëshmitari.

    “Syzet që mi ka dhënë mjeku i kam për bazë nervore kur jam nervoz duhet me i mbajt, i mbaj dy tre orë deri të qetësohet truni, shoh më mirë, atëherë i heq, se nuk mund t’i mbaj rregullisht sepse i kam prej mjekut, sepse ndikon në sy, në bazë nervore, në pamje”, ka vazhduar ai.

    “Dëshmitari kur ju përgjigj asaj pyetje, nuk i kishte vënë syzet, kaq kisha për të thënë”, ka thënë më pas avokati Aouini.

    Vetëm kjo pjesë e seancës ka qenë publike, pasi që pjesa tjetër ka qenë e mbajtur privatisht.

    Seanca është zhvilluar publike vetëm në këtë pjesë, pjesa më e madhe e saj ka vijuar e mbyllur për publikun.

    Sipas Gjykatës Speciales, “krimet për të cilat akuzohet Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës(Shqipëri), që pretendohet se përdorej prej Ushtrisë Çlirimtare të Kosovës”.

  • Anulohet seanca e caktuar për sot në rastin Pjetër Shala, gjykimi rinis më 19 maj

    Anulohet seanca e caktuar për sot në rastin Pjetër Shala, gjykimi rinis më 19 maj

    Seanca e paracaktuar më 5 maj në rastin e Pjetër Shalës është anuluar dhe se gjykimi ndaj tij pritet të vazhdojë më 19 maj 2023.

    Kjo është bërë e ditur në faqen zyrtare të Dhomave të Specializuara të Kosovës (DhSK), raporton ‘‘Betimi për Drejtësi’’.

    ‘‘Pas vendimit gojor të Trupit Gjykues, gjykimi ndaj Pjetër Shalës përfundoi për ditën e sotme, ndërsa seanca e caktuar për nesër (më 5 maj) anulohet. Gjykimi do të rinis të premten, më 19 maj, në orën 09:30’’, thuhet në njoftimin e DhSK-së.

    Ndryshe, gjatë seancës së ditës së sotme, trupi gjykues i udhëhequr nga gjykatësja Mappie Veldt-Foglia gjatë seancës së të enjtes, ka nxjerrë pesë urdhra me gojë dhe ka paraqitur kalendarin për këtë çështje deri në janar të vitit 2024.

    Më 25 prill, Shala e ka dorëzuar dosjen paraprake për gjykimin që po zhvillohet ndaj tij.

    Ndryshe, gjatë muajit shkurt ka filluar gjykimi ku më 21 shkurt Prokuroria dhe mbrojtja e viktimave kanë paraqitur deklaratat e tyre hyrëse, kurse më 22 shkurt janë dëgjuar deklaratat hyrëse të mbrojtjes së Pjetër Shalës, si dhe deklarata pa betim e tij.

    Në mars ka filluar paraqitja e provave të Prokurorisë, ku deri më tani janë dëgjuar gjashtë dëshmitarë.

    Dëshmitari i parë ka filluar dëshminë e tij më 27 mars dhe e ka përfunduar më 28 mars, dëshmitarja e dytë ka filluar dëshminë më 28 mars dhe e ka përfunduar më 29 mars, dëshmitari i tretë ka filluar më dëshminë më 29 mars dhe e ka përfunduar më 30 mars, në të njëjtën ditë me dëshmitarin e katërt.

    Kurse, dëshmitari i pestë e filloi dëshminë më 1 maj, ndërsa e përfundoi më 2 maj, ku edhe filloi dëshmia e dëshmitarit të gjashtë, e cila përfundoi më 3 maj.

    Këta dëshmitarë ishin paraparë të dëgjoheshin për pesë seanca, por meqë të njëjtit kanë përfunduar dëshmitë për katër ditë, seanca e 31 marsit 2023 nuk është mbajtur.

    Ndryshe, Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës, raporton “Betimi për Drejtësi”.

    Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

    “Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.