ATV

Tag: Miroslav Lajçak

  • Analistët politikë mirëpresin largimin e Lajçakut, presin një figurë tjetër më të angazhuar

    Analistët politikë mirëpresin largimin e Lajçakut, presin një figurë tjetër më të angazhuar

    I dërguari i posaçëm për dialogun ndërmjet Kosovës dhe Serbisë, Miroslav Lajçak, pas katër vitesh do të largohet nga kjo detyrë, dhe pritet të jetë ambasador i Bashkimit Evropian në Zvicër nga 1 shtatori.

    Njohës të çështjeve politike në Kosovë kanë shprehur opinionet e tyre lidhur me punën dhe angazhimin e tij në këtë proces.

    Politologu Albinot Maloku ka thënë për Ekonomia Online se mbarimi i misionit të Lajçakut duhet të shihet si pozitiv, në kuptimin që një person tjetër do të jetë më i angazhuar dhe më neutral.

    “Është pritur që mbarimi i Lajçakut të jetë pozitiv në kuptimin që një person tjetër të jetë më i angazhuar më neutral dhe të jap ndikimin e vetë personal në këtë drejtim. Se a do të bëhet kjo duhet me pritë për me e pa, por konsideroj që Lajçak, ka pasur një mision në traditën e vet të dështuar të angazhimeve ndërkombëtare dhe nuk kam pasur aspak pritje duke e njohur angazhimin e tij ndërkombëtar. Tani çdo person që do të vijë do të jap ndikimin e vet pozitiv. Paralelisht kësaj dihet se BE-ja në raport me çështjen e dialogut është një mekanizëm i cili e mban një trase thelbësore të dialogut. Individi në këtë proces mundet të jap kontributin e vet të ruajtjes së neutralitetit që ka qenë shumë e rëndësishme në procesin mes Kosovën dhe Serbisë dialogut”, ka thënë Maloku.

    Njohësi i çështjeve politike, Maloku ka shtuar se përmbyllja e dialogut do të ishte bërë nëse kishim pas marrëveshjen gjithëpërfshirëse ligjërisht obliguese përfundimtare që e ka në qendër njohjen mes Kosovës dhe Serbisë

    “Përmbyllja e dialogut do të ishte bërë nëse kishim pas marrëveshjen gjithëpërfshirëse ligjërisht obliguese përfundimtare që e ka në qendër njohjen mes Kosovës dhe Serbisë. Këto marrëveshje që kanë ndodhur, pajtimet të gjitha janë vetëm kontribuuese në normalizimin e raporteve dhe për pasojë nuk konsideroj që do të ndodh përfundimi i dialogut si i tillë dhe tani që me pajtimin e fundit që Kosova e dha me shkrimin e vetë dhe pajtoj që dialogu të jetë përcaktues edhe i integrimeve evropiane të saj. Kjo është pjesa tjetër shqetësuese e hapave të qeverisë aktuale pas pajtimit që ndodhi në Bruksel dhe Ohër që kishte vullnet për ta dhënë nënshkrimin dhe tani si mundësi nuk e shoh përmbylljen e dialogut sidomos në një të afërme dhe sidomos nëse nuk do ta kemi këtë dokumentin gjithëpërfshirës i cili kishte më qenë mision obligues i njohjes mes palëve mirëpo do të merr dinamikën e vet fatkeqësia është se po diskutohet në Bruksel për një çështje që ka qenë e brendshme siç është dinari dhe kjo ka qenë një dalje jo e mirë nga binarët që ka pas dialogu si i tillë në të gjitha dështimet që i ka pas, të gjitha defektet që i ka pas si proces prej nisjes së saj”, ka thënë ai.

    Ndërsa Dritëro Arifi, profesor i Marrëdhënieve Ndërkombëtare në Kolegjin UBT ka thënë se do të ketë ndryshime në gjithë strukturën e Komisionit Evropian sepse po afrohen zgjedhjet e Parlamentit Evropian.

    “Po, është e vërtetë që ka me pas ndryshime në gjithë strukturën e Komisionit Evropian sepse po afrohen zgjedhjet e Parlamentit Evropian dhe mbi bazën e pasi të ndërtohet Parlamenti Evropian si strukturë e BE –së, atëherë do të votohet edhe Komisioni Evropian i cili mund të ketë përbërje krejtësisht të re. Pra duke filluar që nga shefi i diplomacisë së jashtme, Borell dhe i dërguari për dialogun Kosovë-Serbi, jam i bindur që do të ketë ndryshime në këtë fushën e jashtme. Por edhe te zoti Lajçak si i dërguar special i BE-së, apo dialogun Kosovë-Serbi sepse është pa që ka nevojë për një rifreskim për këtë fushë dhe besoj që do të jetë një figurë e re”.

    “Por kisha pas dëshirë që figura të jetë më shumë politike se sa teknike në kuptimin që edhe zoti Lajçak ka qenë politike por një figurë  pak më e fuqishme apo të paktën që vie nga një shtet më i fuqishëm politik pra një shtet mos njohës. Mund të jetë nga Gjermania, Franca, Italia por jo një vend shumë i vogël i pafuqishëm politikisht dhe që nuk ka mjohue pra sepse po vërehet që po ka shumë disbalanc. Por sidoqoftë edhe nëse do ndryshon kryenegociatori prap mendoj se është fillim pozitiv pra në substancë përbeje nuk do ndryshojë shumë sepse Kosova veç se e ka pranuar planin Franko-Gjermanran dhe është zotuar që do ta zbatojë kështu që kryenegociatori i ri krejt çka do të ketë për detyrë është ta sekuencojë gjithë marrëveshjen kur dhe sa do të implementohet edhe pse Kosova i din detyrat e veta, siç i din edhe Serbia. Pra jemi në fazën e implementimit të dialogut. Do jetë më shumë një mbikëqyrës i zbatimit të marrëveshjes por megjithatë mendoj që në BE duhet të merret një vendim shumë më i vështirë se sa kjo, a do të krijohet një lidership i ri i cili merr vendim për njohje të Kosovës, sepse mendoj se pa njohjen e Kosovës nga 5 vendet e BE-së mendoj që vështirë do ketë zgjidhje për dialogun, Kosovë Serbi”, ka thënë Arifi.

  • Bislimi e Petkoviq takohen sot në Bruksel, vazhdojnë bisedimet për dinarin

    Bislimi e Petkoviq takohen sot në Bruksel, vazhdojnë bisedimet për dinarin

    Kryenegociatorët e Kosovës dhe Serbisë, Besnik Bislimi dhe Petar Petkoviq, pritet të takohen sot në Bruksel me ndërmjetësimin e të Dërguarit të Posaçëm të Bashkimit Evropian për dialogun mes Kosovës dhe Serbisë, Miroslav Lajçak.

    Këtë e bëri të ditur më 19 mars emisari i BE-së për dialogun Kosovë-Serbi, Miroslav Lajçak pas takimit mes kryenegociatorëve në kryeqyendrën evropiane.

    Lajçak në një postim në platformën “X” njoftoi se në mesin e temave të diskutuara në takim ishte edhe rregullorja e Bankës Qendrore të Kosovës për pagesa me para të gatshme.

    Në takimin e fundit që kryenegociatorët e të dy vendeve zhvilluan nën kujdesin e Lajçakut në Bruksel mbi tensionet që u ndezën pas rregullores së Bankës Qendrore (BQK), nëpërmjet së cilës autoritetet kosovare synojnë të ndalojnë përdorimin e dinarit serb brenda territorit, palët u dakorduan që deri më 22 mars t’i çonin propozimet për zgjidhjen e krizës së dinarit.

    Megjithatë, akoma nuk dihet nëse palët kanë respektuar afatet kohore. Nga ekzekutivi kosovar nuk është bërë e ditur nëse kanë dërguar propozime për dinarin, duke u kapur pas planit 10-pikësh të BQK-së që mundëson një fazë lehtësuese kalimtare – do të zgjasë jo më shumë se tre muaj, në mënyrë që qytetarët e komunitetit serb të mos dëmtohen nga zbatimi i vendimit.

    Përderisa shefi i delegacionit kosovar njoftoi se palët duhet t’i dorëzojnë propozimet e veta mbi çështjen e ndalimit të dinarit serb, shefi i delegacionit serb theksoi të ketë këmbëngulur në themelimin e Asociacionit të Komunave me Shumicë Serbe, sepse, sipas tij, ky mekanizëm do ta zgjidhte edhe çështjen e financimit të të gjitha “institucioneve serbe” në Kosovë.

    Lajçaku fillimisht priti në takim kryenegociatorin dhe zëvendëskryeministrin kosovar, pastaj zhvilloi një takim me delegacionin serb të udhëhequr nga Petkoviçi. E ky cikël i ri i negociatave në nivel të kryenegociatorëve erdhi në mes të paralajmërimeve të zyrtarëve evropianë për rritje të presionit ndaj të dyja palëve për të zbatuar marrëveshjen e arritur një vit më parë.

    “Unë prita dy kryenegociatorët për të diskutuar zbatimin e marrëveshjes për rrugën drejt normalizimit dhe çështje të tjera, përfshirë ndikimin e vendimit për operacionet me para të gatshme. Ne u dakorduam që të vazhdojmë këtë çështje të hënën e ardhshme, ndërsa marrëveshja do të duhet të adresohet nga liderët”, deklaroi Lajçaku pas takimeve që zgjatën disa orë.

    Në fakt, ky ishte takimi i dytë që u organizua nga BE-ja për çështjen e dinarit. Një raund i negociatave ndërmjet ekspertëve financiarë të Kosovës dhe Serbisë u zhvillua më 27 shkurt në kryeqendrën evropiane, por përfundoi pa rezultate konkrete. Kosova refuzoi që të përfaqësohet në nivel politik sepse konsideroi që dinari nuk duhet të jetë temë në procesin e dialogut.

    Sidoqoftë, sa u përket propozimeve rreth zgjidhjes së problemit, autoritetet kosovare përveçse hodhën poshtë propozimin e Shteteve të Bashkuara të Amerikës (SHBA), nënvizuan se nuk shkojnë përtej asaj që tashmë është miratuar. Kryeministri i Kosovës, Albin Kurti, garantoi këtë javë se nuk do të pranojë propozime që dalin jashtë kornizës rregulluese të BQK-së.

    “Shikoni, është një proces që po vazhdon dhe propozime ka, disa. Por, nuk ka propozime që pranohen nga ana jonë që shkojnë në kundërshtim me rregulloren e re të BQK-së. Njëkohësisht, ne mund të merremi vetëm me pjesën e mbështetjes në terren nëse ka probleme, sepse problemet që mund të shkaktohen, jo domosdo do të mund t’i zgjidhë të gjitha vetë BQK-ja”.

    Nga ana tjetër, presidenti i Serbisë, Aleksandar Vuçiç, në një paraqitje të fundit televizive, potencoi se nuk mund të arrihet asnjë marrëveshje sa i përket çështjes së përdorimit të valutës serbe në Kosovë, porse Serbia do të gjejë gjithmonë një mënyrë për të dërguar dinarë për serbët, derisa akuzoi autoritetet kosovare për zbatim nëpërmjet forcës të vendimit të BQK-së.

    “Nuk do të jetë e lehtë, para së gjithash për popullin tonë në Kosovë. Por do të ketë ndryshime në doktrinën dhe qasjen tonë. Nuk do të na sjellin më përpara një akti të përfunduar dhe na thonë se kanë rënë dakord të bëhet pagesa këtu, pastaj të paguhet atje, dhe pastaj të konvertohet nga dollarë në euro, dhe nga euro në të tjera”, paralajmëroi presidenti serb në fundjavë.

    E përderisa terreni i kërkimit të madh për “formulën e zgjidhjes” pritet të vazhdojë, mbetet për t’u parë nëse lista e skenarëve të dhunës që mund të rezultojnë për shkak çështjes së dinarit dhe tensioneve ekzistuese ose nënprodukteve të “pasioneve maniçeane” do të zgjerohet, apo do të arrihet një kompromis në kuadër të dialogut për normalizimin e marrëdhënieve.

  • Fillon takimi trepalësh në Bruksel

    Fillon takimi trepalësh në Bruksel

    Përfaqësues të Kosovës dhe Serbisë ndodhen sot në Bruksel për takimin e radhës në kuadër të dialogut për normalizimin e marrëdhënieve.

    Aktualisht, delegacionet e Kosovës dhe Serbisë, të kryesuara nga Besnik Bislimi dhe Petar Petkoviq, janë në takim të përbashkët, me ndërmjetësimin e përfaqësuesit të posaçëm të BE-së, Mirosllav Lajçak.

    Paraprakisht, Lajçak priti veç e veç Bislimin dhe Petkoviqin.

    Bashkimi Evropian paralajmëroi një ditë më herët se do të shtojë trysninë mbi dy vendet për të zbatuar marrëveshjen e arritur një vit më parë për normalizimin e marrëdhënieve. Bisedimet, megjithatë, mund të mbeten nën hijen e ndalimit të dinarit serb në Kosovë – temë kjo, po ashtu, e paralajmëruar nga BE-ja. Me një rregullore të Bankës Qendrore, Kosova e ndaloi përdorimin e kësaj valute më 1 shkurt, duke e bërë euron mjet të vetëm pagese. Diplomatë perëndimorë i kërkuan Kosovës që ta pezullojë rregulloren, për t’iu dhënë kohë qytetarëve të prekur që të përshtaten me praktikën e re./REL/

    Rundi i ri i dialogut Kosovë – Serbi: Kryengociatorët sot në Bruksel diskutojnë edhe për dinarin

  • Zëvendëskryeministri Bislimi sot takohet me Lajçakun

    Zëvendëskryeministri Bislimi sot takohet me Lajçakun

    Zëvendëskryeministri i Kosovës, Besnik Bislimi, të martën(sot) do ta presë në takim emisarin e BE-së për dialogun Kosovë – Serbi, Miroslav Lajçak.

    Kështu është bërë e ditur nga Zyra e Kryeministrit përmes një komunikate për media, ku thuhet se në takim do të diskutohet për ecjen përpara me zbatimin e Marrëveshjes Bazike.

    Bëhet e ditur se takimi do të mbahet në ndërtesën e Qeverisë duke filluar nga ora 09:30.

    “Zëvendëskryeministri i Parë për Integrim Evropian, Zhvillim dhe Dialog i Republikës së Kosovës, Besnik Bislimi, pret në takim ditën e nesërme, Përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajçak, me të cilin do të diskutohet për ecjen përpara me zbatimin e Marrëveshjes Bazike. Vendi: Ndërtesa e Qeverisë.Koha: 09:30”, thuhet në komunikatë.

  • Osmani takohet me Lajçakun në Turqi, flasin për ecurinë e dialogut dhe zgjedhjet në veri

    Osmani takohet me Lajçakun në Turqi, flasin për ecurinë e dialogut dhe zgjedhjet në veri

    Presidentja e Kosovës, Vjosa Osmani ka takuar të Dërguarin e Bashkimit Evropian për dialogun Kosovë-Serbi, Miroslav Lajçak, gjatë punimeve të Forumit të Diplomacisë, që po mbahet në Antalya të Turqisë.

    Për takimin mes tyre ka njoftuar vetë Lajçak, përmes një postimi në platformën “X”, derisa ka treguar edhe temat e diskutuara.

    “Një bisedë për t’u vlerësuar me presidenten Vjosa Osmani në margjina të Forumit Demokratik të Antalisë. Folëm rreth zhvillimeve të fundit në dialog, në veçanti për zgjedhjet në veri të Kosovës dhe takimin e fundit që e mirëprita në Bruksel”, ka shkruar Lajçaku.

  • Lajçak sot në Kosovë

    Lajçak sot në Kosovë

    I dërguari i posaçëm për dialogun Kosovë-Serbi, Miroslav Lajçak, sot do të jetë në Kosovë, ku do të bisedojë me zëvendëskryeministrin Besnik Bislimi, kryenegociator i Kosovës në dialogun e Brukselit.

    Lajçaku dje ka qëndruar në Beograd, ku është takuar me presidentin e Serbisë, Aleksandar Vuçiq, me të cilin përveç tjerash ka diskutuar edhe për hapat e ardhshëm në normalizimin e marrëdhënieve me Kosovën.

    Ai ka shkruar në platformën X se në takimin me Vuçiqin, fokus i diskutimeve ka qenë perspektiva strategjike për vitin 2024, por gjithashtu kanë bërë një bilanc për të arriturat dhe ngecjet në dialog.

    Presidenti i Serbisë, Aleksandar Vuçiq, ka kërkuar anulimin e vendimit të Bankës Qendrore të Kosovës (BQK) për ndalimin e përdorimit të dinarit serb për pagesa me para të gatshme në Kosovë. Ai shtoi se e ka pasur një “takim konstruktiv dhe shumë të dobishëm” me Lajçakun.

    “E theksova domosdoshmërinë për themelimin e Asociacionit të komunave me shumicë serbe, për mbajtjen e zgjedhjeve lokale në veri të Kosovës urgjentisht, dhe kërkova mbështetje nga Bashkimi Evropian për ndalimin e provokimeve të mëtejshme që vijnë nga Prishtina”, shkroi Vuçiq në llogarinë e tij në Instagram, pas takimit me Lajçakun.

    Sipas zëdhënësit të BE-së, Peter Stano, përfaqësuesi special i BE-së për dialogun po i kryen këto vizita në Beograd dhe Prishtinë në përpjekje për të çuar përpara dialogun.

    “Bisedimet me presidentin Vuçiq në Beograd dhe me homologët kosovarë në Prishtinë, janë pjesë e mandatit të tij, janë pjesë e punës dhe përpjekjeve të tij të vazhdueshme në drejtim të ndihmës së të dyja palëve për të çuar përpara dialogun”, theksoi Stano.

    Ndryshe, Brukseli kërkoi nga autoritetet në Kosovë të hënën që të shtyjnë zbatimin e vendimit për ndalimin e përdorimit të dinarit serb në territorin e Kosovës, në mënyrë që të gjendet një zgjidhje në kuadër të dialogut ndërmjet Beogradit dhe Prishtinës.

    Nga Qeveria e Kosovës kanë argumentuar se vendimi i BQK-së është në përputhje me Kushtetutën e Kosovës, por QUINT-i ka thënë se ky vendim “ngre shqetësime në lidhje me ndikimin në veçanti në komunitetet me shumicë serbe”.

  • Lajçak: BE-ja është gati për zgjerim për herë të parë pas një kohe të gjatë

    Lajçak: BE-ja është gati për zgjerim për herë të parë pas një kohe të gjatë

    I dërguari i posaçëm i Bashkimit Evropian për dialogun Kosovë-Serbi, Miroslav Lajçak, ka thënë se për herë të parë BE-ja është e gatshme për zgjerim.

    “Në samitin për Ballkanin, theksova se për herë të parë pas një kohe BE-ja është gati për zgjerim. Është koha për të përfituar nga kjo mundësi”, shkroi Lajçak në platformën X.

    Lajçak mori pjesë të enjten në samitin BE-Ballkani Perëndimor të organizuar nga instituti politik i Brukselit “Friends of Europe”.

    Emisari i BE-së tha se “gjeopolitika e ka hapur derën për integrim në BE, por ajo nuk do t’ju kalojë vetvetiu juve përmes kësaj dere, sepse për një gjë të tillë duhet të përmbushen kushtet”.

    “Për herë të parë e shoh BE-në më të gatshme për Ballkanin sesa Ballkani për BE-në”, u shpreh Lajçak duke përsëritur që vendet e rajonit duhet t’i zgjidhin të gjitha çështjet e hapura mes tyre, në mënyrë që një ditë të mos mund të bllokojnë njëra-tjetrën në rrugën drejt BE-së.

    Në Bruksel po zhvillohet debati kushtuar procesit të zgjerimit të organizuar nga “Miqtë e Evropës”.

  • ​Lajçak thotë se ka progres në zbatimin e marrëveshjeve të dialogut

    ​Lajçak thotë se ka progres në zbatimin e marrëveshjeve të dialogut

    I dërguari i posaçëm i BE-së për dialogun mes Kosovës dhe Serbisë, Miroslav Lajçak, tha të enjten në Bruksel se ka progres në zbatimin e disa marrëveshjeve të arritura në dialogun ndërmjet të dyja palëve. Ai e tha këtë gjatë debatit për zgjerimin të zhvilluar nga organizata “Miqtë e Evropës“.

    Lajçak theksoi se e ardhmja evropiane e rajonit të Ballkanit Perëndimor nuk mund as ëndërr të shihet pa normalizimin e raporteve mes Kosovës dhe Serbisë.

    “Normalizimi i raporteve mes Kosovës dhe Serbisë është një çështje me rëndësi strategjike. Pa këtë normalizim nuk mund as të ëndërrojmë të ardhmen evropiane. Kemi progres kohëve të fundit në këtë drejtim. Së shpejti do ta mbyllim dosjen e energjisë, ka progres në çështjen e targave, në çështjen e personave të pagjetur, në çështjen e zgjedhjeve lokale në veri dhe në zbatimin e marrëveshjes për rrugën drejt normalizimit të raportev”, deklaroi Lajçak duke shtuar se ai është në kontakt të vazhdueshëm me palët për të vazhduar me zbatimin.

    Ai bëri thirrje që të mos humbet koha për implementimin e obligimeve nga dialogu dhe të mos humbet rasti për avancim në rrugëtimin drejt BE-së. Lajçak theksoi se viti i ardhshëm do të jetë një vit me kalendar të ngjeshur politik, sepse do të ketë zgjedhje në Bashkimin Evropian dhe në Shtetet e Bashkuara të Amerikës.

    Sipas Lajçakut, tash është një moment i ri në procesin e zgjerimit, që është shumë më i favorshëm sesa më parë. Ky moment i ri, tha ai, është krijuar nga presidenti i Rusisë, Vladimir Putin, dhe agresioni i tij ndaj Ukrainës”.

    Megjithatë, emisari i BE-së tha se “gjeopolitika e ka hapur derën për integrim në BE, por ajo nuk do t’ju kalojë vetvetiu juve përmes kësaj dere, sepse për një gjë të tillë duhet të përmbushen kushtet”.

    “Për herë të parë e shoh BE-në më të gatshme për Ballkanin sesa Ballkani për BE-në”, u shpreh Lajçak duke përsëritur që vendet e rajonit duhet t’i zgjidhin të gjitha çështjet e hapura mes tyre, në mënyrë që një ditë të mos mund të bllokojnë njëra-tjetrën në rrugën drejt BE-së.

    Në Bruksel po zhvillohet debati kushtuar procesit të zgjerimit të organizuar nga “Miqtë e Evropës”.

    Në këtë debat, Bashkimi Evropian porositi vendet e Ballkanit Perëndimor se nuk ka më kohë për të pritur që t’i normalizojnë raportet ndërmjet tyre porse kjo duhet të bëhet shpejt, si kusht për të shfrytëzuar mjetet nga plani për rritje ekonomike i miratuar më 8 nëntor nga Komisioni Evropian.

    Plani për rritje ekonomike për vendet e Ballkanit Perëndimor parasheh një paketë të madhe të asistencës financiare prej 6 miliardë eurosh për periudhën nga viti 2024 deri në vitin 2027. Sipas planit, nga kjo shumë, deri në 2 miliardë euro do të shkonin si asistencë pa kthim, ndërsa 4 miliardë në formën e kredive të favorshme apo investimeve kapitale. Një pjesë e këtyre mjeteve financiare do të mund të shkonin përmes pagesave direkte në buxhetet e vendeve të rajonit për t’u përdorur për këto qëllime.

    Në debat marrin pjesë edhe ambasadori amerikan në Beograd, Christopher Hill, drejtori i përgjithshëm për zgjerim në Komisionin Evropian, Jan Coopman, dhe shumë pjesëmarrës tjerë.

    Coopman tha se qëllimi i BE-së është t’i integrojë sa më shumë vendet e rajonit edhe para se të bëhen anëtare të BE-së, përfshirë edhe integrimin në tregun e brendshëm të Bashkimit Evropian.

    Në takim morën pjesë edhe ministrat nga disa vende të rajonit. Ata mbështetën idenë për integrimin gradual para integrimit formal në BE, por jo të shihet si alternativë e anëtarësimit.

    “Për të realizuar këtë, rajoni duhet t’i tejkalojë problemet e hapura. Nuk mund të pranojmë vende, të cilat kanë raporte të helmuara”, tha Coopman duke përmendur çështjet e hapura rreth kufijve.

    Këto kushte, sipas diplomatëve në BE, kanë të bëjnë para së gjithash me Kosovën dhe Serbinë, të cilat janë të përfshira në procesin e dialogut të lehtësuar nga Bashkimi Evropian.

    “Ne do ta kushtëzojmë planin e rritjes me normalizimin e raporteve. Kjo duhet të Duhet të ketë përparim në këtë [aspekt]. Nuk kemi më kohë për të pritur”, deklaroi Coopman. Ai tha se vlera e mjeteve nga ky plan është e madhe dhe nëse shtetet nuk i shfrytëzojnë, qytetarët do të humbasin.

    Ministri për çështje evropiane i Çekisë, Martin Dvorak, rikujtoi se nuk do të ketë mundësi për asnjë vend kandidat që të shmangë përmbushjen e kritereve në procesin e avancimit drejt BE-së.

    Ndërsa, ambasadori amerikan në Serbi, Christopher Hill, bëri thirrje që BE-ja të dëshmojë se kësaj radhe mundësia për integrim në BE është vërtet reale. Ai tha se Serbia po bën shumë në procesin e reformave sikur edhe në ndihmën për Ukrainën.

    “Serbia po bën shumë për Ukrainën, por ju lutem të mos e bëni të madhe këtë, sepse nuk do të ishte në interes të të gjithëve në Serbi“, tha Hill.

    Çka është plani për rritjen ekonomike në Ballkanin Perëndimor?

    Plan i ri për rritje ekonomike në vendet e Ballkanin Perëndimor, i miratuar nga Komisioni Evropian më 8 nëntor të këtij viti është i bazuar në katër shtylla.

    Shtylla e parë është “forcimi i integrimit ekonomik në tregun unik të BE-së”. Kjo do të varet nga përshtatja e vendeve të rajonit me rregullat e tregut unik dhe paralelisht hapja e tregut të tyre në sektorët përkatës për vendet fqinje.

    Shtylla e dytë e këtij plani është “forcimi i integrimit ekonomik brenda Ballkanit Perëndimor përmes tregut të përbashkët rajonal”. Kjo, sipas përvojës së BE-së do të ndikojë në një rritje potenciale ekonomike prej 10 për qind.

    Shtylla e tretë e këtij plani është “përshpejtimi i reformave fundamentale“. Kjo nënkupton dhe sundimin e ligjit që ndihmon edhe në tërheqjen e investimeve direkte të huaja dhe forcon stabilitetin rajonal.

    Shtylla e katërt e planit të ri të Komisionit Evropian për rritje ekonomike në Ballkanin Perëndimor është “rritja e asistencës financiare për të ndihmuar reformat“. Këtu përfshihet edhe propozimi për 6 miliardë euro ndihmë.

    Pasi vendet e rajonit në raportet tregtare me Bashkimin Evropian përfitojnë edhe nga Marrëveshjet përkatëse të Stabilizim-Asociimit, KE-ja propozon që të shkohet edhe përtej kësaj, duke bërë edhe ndryshime në këto marrëveshje për të mundësuar kushte të barabarta në treg dhe mes vendeve në procesin e zgjerimit dhe vendeve anëtare të BE-së.

    Të gjitha këto qëllime janë në përputhje edhe me idetë që po realizohen përmes Procesit të Berlinit, si dhe krijimin e “tregut të përbashkët rajonal”./rel/

  • Lajçak flet për dialogun me ministren finlandeze: Faleminderit për mbështetjen

    Lajçak flet për dialogun me ministren finlandeze: Faleminderit për mbështetjen

    Emisari i BE-së për dialogun, Miroslav Lajçak, dje ka diskutuar për këtë proces me ministren e Jashtme të Finlandës, Elina Valtonen.

    “E mirëpres mundësinë e për të diskutuar dialogun dhe shtyrjen e ripërtërirë për ta bërë realitet perspektivën e BE-së për Ballkanin Perëndimor me ministren e Jashtme të Finlandës, Elina Valtonen”.

    Ai është shprehur falendërues për mbështetjen e Finlandës.

    “Faleminderit për mbështetjen e vazhdueshme të Finlandës”, ka shkruar Lajçak në platformën X.

  • Dialogu Kosovë-Serbi, Lajçak paralajmëron se do të ketë zhvillime shumë shpejt

    Dialogu Kosovë-Serbi, Lajçak paralajmëron se do të ketë zhvillime shumë shpejt

    Emisari i BE-së për dialogun Kosovë-Serbi, Miroslav Lajçak, është deklaruar pas aktivitetit të tij në procesin e negociatave në mes të Kosovës dhe Serbisë, ku teksa bëri një përmbledhje të këtyre zhvillimeve tha se diskutimet në Kosovë kanë qenë për çështjet me rëndësi në kuadër të dialogut.

    Duke u nisur nga fillimi i javës që u shënua me vizitën në Beograd, tha se diskutimet me presidentin serb Aleksander Vuçiq dhe kryenegociatorin serb, Petar Petkvoiq, ishin të fokusuar në vazhdimin e përpjekjeve për të avancuar implementimin e Marrëveshjes për Rrugën drejt Normalizimit.

    Teksa për vizitën në Kosovë, i njëjti u shpreh duke theksuar nevojën urgjente për zgjidhje e marrëveshjes nga të dya palët.

     “Në bisedat tona, unë theksova që implementimi i Marrëveshjes duhet të ketë progres nga të dy palët në përmbushjen e obligimeve të tyre respektive, hap pas hapi paralelisht dhe bazuar në parimin që të dy palët duhet të bëjnë diçka për të marrë diçka”, ka shkruar Lajçak.

    Në këtë përbledhje, Lajçak gjithashtu ka folur edhe për takimet që ka pasur me kryenegociatorët në Bruksel, duke treguar se kanë diskutuar për një numër çështjesh, përfshirë Statutin, planin e zbatimit, energjinë, tabelat, zgjedhjet dhe personat e zhdukur.

    Ai ka thënë se është bërë përparim në disa çështje dhe se pret një vazhdim të shpejtë të negociatave duke treguar se ka plan që bisedimet t’i vazhdojë në ditët dhe javët në vijim.

    “Takimet ishin të dobishme për të bërë përparim në një sërë çështjesh në axhendën tonë të Dialogut dhe pres një vazhdim të shpejtë së shpejti. Prandaj, kam në plan të vazhdoj bisedimet në ditët dhe javët në vijim”, ka paralajmëruar Laçjak.

    Emisari i BE-së ka përmendur edhe takimin që ka pasur në Bruksel me kryetarin e PDK-së, Memli Krasniqi.

    “Të mërkurën pata një takim të dobishëm me liderin e partisë opozitare të Kosovës, PDK-së, Memli Krasniqi. Folëm për situatën në Kosovë dhe rëndësinë e progresit në Dialog për rrugën  të Kosovës”, ka thënë ndër të tjera Miroslav Lajçak.