Java e Pavarësisë filloi me promovimin e librit “Ora e Kosovës: Pavarësia dhe Shtetndërtimi”, që ka autor ish-presidentin e Kosovës, Fatmir Sejdiu.
Libri i botuar nga Kolegji AAB, në përmbajtje trajton etapat drejt shtetformimit të republikës më të re në Evropë, e cila më 17 shkurt i bënë 16 vjet e pavarur.
Vet autori pati një mesazh për gjeneratat që do e drejtojnë shtetin në të ardhmen.
“Gjeneratat që vinë pas pavarësisë së Kosovë kanë përgjegjësinë që t’ia shtojnë miqtë Kosovës, inkorporimin dhe ngjitjen e saj kudo në botë”, tha Sejdiu.
Presidentja Vjosa Osmani, vlerësoi lartë veprën dhe punën e paraardhësit të saj, ish-presidentit Sejdiu.
“Në mitologjinë shqiptare, ora përfytyrohej si qenie e padukshme mbrojtëse që sjell fat të mirë. Rrjedhimisht secili njeri, familje apo grup etnik e ka orën e vet. Ora jonë ishte më 17 shkurt 2008…Ndaj në këtë proces presidenti Sejdiu paraqitet një kronikan i rëndësishëm i rrjedhave zhvillimeve që i dhanë formë përpjekjes sonë për shtet”, u shpreh presidentja Osmani.
Ndërkohë, në fjalën e tij, Rektori i Kolegjit AAB, Lulzim Tafa potencoi se autori i “Orës së Kosovës”, është personi që i jep peshë rreshtave të shkruar në këtë libër.
“Këtë libër e rekomandoj jo vetëm për lexim se është një libër që lexohet lehtë por se autori i këtij libri, Fatmir Sejdiu nuk ka qenë vetëm një shikues ose vrojtues i orës së Kosovës por ishte pjesë e mekanizmit kryesor të punës së asaj ore”, tha Tafa.
Në promovimin e librit, morën pjesë figura të shumta nga sfera publike vendore e ndërkombëtare./atvlive.tv/
Rektori i Kolegjit AAB, Lulzim Tafa, në emisionin LIBERO në ATV, tha se gjendja e arsimit në Kosovë nuk mund të ndryshojë me revolucion e as me shkop magjik, por me shumë punë të gjatë dhe sistematike nga niveli parashkollor deri në universitet.
“Gjërat bëhet në rrënjë nga fillimi që nga niveli parashkollor, shkolla fillore cikli i ulët, pastaj te shkolla e mesme e deri në universitet. Dy gjëra i kam hetuar, gjërat ne arsim nuk bëhen as me revolucion e as me shkop magjik. Duhet shumë punë të gjatë, shumë punë sistematike, sot të ndërmerren veprime që pas disa viteve të shihen”, tha rektori Tafa.
Ai tha se në vendin tonë kanë mbetur në këmbë edhe dy shtylla të komunizmit, të cilat assesi nuk po mund ta rimarrin veten, e ato sipas tij janë arsimi dhe shëndetësia.
“Po dëgjoj herë pas here qoftë në parlament, qoftë çarqe të ndryshme intelektuale, në shkrime se komunizmin duhet dënuar. Po flas me dozë kompetencës profesionale edhe të juristit kur jemi të dënimi i komunizmit. Dënimi është masa e cila i shqiptohet për fajin e shkaktuar, për fajin e bërë. Faji i komunizmit është aq i madh sa që nuk ka dënim që kish me qenë i baras vlefshëm me peshën e fajësisë të cilën e ka komunizmi. Komunizmit në vendin tonë i kanë mbetur në këmbë edhe dy shtylla, fatkeqësisht. Arsimi dhe shëndetësia janë ato dy oazat e fundit, të cilat assesi të kthjellen dhe ta rimarrin veten. Kur është themeluar AAB-ja, kemi pasur veç një universitet edhe ai ka qenë Universiteti Publik i Prishtinës dhe ideja ka qenë që të bëjmë një universitet alternativ të mos ketë monopol universiteti publik dhe të nxisim paksa konkurrencën. E kam thënë edhe në rastet e tjera, Amerika është një superfuqi e madhe ushtarake, industriale, financiare dhe pasurinë më të madhe e ka ekonominë e lirë të tregut, konkurrencën”, u shpreh Tafa.
Pas rezultateve të PISA-s, ai thotë se disa persona të cilët nuk e njohin fushën e arsimit, padrejtësisht filluan të drejtojnë gishtin edhe te arsimi i lartë.
Problemi me arsimin në Kosovë, sipas rektorit Tafa, nuk qëndron tek arsimi i lartë, por tek ai para universitar.
“Ne e kishim arsimin pa konkurrencë dhe tash kur dolën rezultatet e PISA-s, filluan të merren me këtë temë edhe ata të cilët nuk e njohin fushën e arsimit dhe të drejtojnë gishtin padrejtësisht edhe te arsimi i lartë. Nuk e kam zakon ta citoj asnjëherë veten, por diku në vitin 2004 ose 2005, kam qenë në një emision në RTK dhe aty kam thënë që problemet me arsimin në Kosovë nuk janë te arsimi i lartë, por problemet me arsimin në Kosovë janë te arsimi para universitar. Institucionet e arsimit të lartë në Kosovë, qofshin ato publike, qofshin kolegjet private, punojnë me ato resurse me ata nxënës të cilët na përgatitin në arsimin para universitar. Edhe në universitetet publike, edhe në kolegjet private vinë nxënës me notën shembullore, me të gjitha 5-she, numër maksimal të pikëve në testin e maturës, ndërsa në zbrazësi pothuajse elementare në fusha të caktuara. Shpesh herë kanë thënë se studentët e Kosovës bëjnë gabime, nuk dinë me shkru, universiteti nuk të mëson me shkru, universiteti nuk të mëson me lexu. Me shkru e me lexu të mëson shkolla fillore”, tha Tafa.
Në raport me ranglistat botërore, rektori Tafa tha se universitetet e Kosovës, qofshin publike apo private, qëndrojnë më mirë se në vendet e rajonit. /atvlive.tv
Intervistën e plotë të rektorit Lulzim Tafa në LIBERO e gjeni në videon më poshtë:
Lulzim Tafa, njëri ndër poetët kosovar më të njohur në botë, ishte i ftuar në emisionin LIBERO në ATV, ku bëri një rrëfim më ndryshe për jetën e tij private, rrugëtimin profesional si dhe pasionin për poezi.
Në këtë emision ai foli edhe për çmimet e shumta që ka marrë gjatë karrierës së tij në letërsi, ndërsa për çmimin e fundit që mori nga presidenti francez Emmanuel Macron, thotë se ka qenë ndër çmimet më të veçanta për të.
“Në karrierën time pothuajse tërë jetësore me poezinë, me letërsinë, kam marrë shumë mirënjohje, çmime, dekorata, tituj nderi, mirëpo kjo që më erdhi nga presidenti i Republikës së Francës, Emmanuel Macron, që realisht është dekorata më e lartë të cilën e ndanë shteti francez në fushën e artit dhe letërsisë, përveç që më ka gëzuar, më ka tunduar shumë. Edhe për faktin se ndoshta lidhjet e mia me Francën janë pak më të veçanta, unë kam të botuara dy libra në gjuhën frënge, po ashtu kam qenë pjesëmarrës shumë herë në festivalet e letërsisë edhe të poezisë në Francë, jam anëtar i Akademisë Franceze të Letërsisë dhe të Arteve me seli në Paris dhe Parisin e kam konsideruar dhe vazhdoj ta konsideroj si kryeqendrën botërore të artit dhe të kulturës”, u shpreh poeti Tafa.
Ai thotë se ky çmim e ka bërë atë që të ndihej njësoj si shumë vite më parë kur merrte çmime ndërkombëtare.
“Kur më kanë pyet, a gëzohesh kur merr çmime ndërkombëtare dhe cili është gëzimi të cilin e ke përjetuar më përpara dhe cilin tash, unë them edhe atëherë, edhe tash jam gëzuar shumë, mirëpo gëzimi e ka njëfarë lloj ndryshimi. Gëzimi që e përjetoja dikur më tundonte, kurse këto tani më japin një qetësi. Përjashtimisht, sepse unë vetëm vitin e kaluar kam marrë shumë çmime, mirënjohje, dekorata, po flas vetëm gjatë vitit 2023 pa e llogaritë pjesën tjetër, por kjo është hera e parë pas një kohe të gjatë që edhe më ka tunduar”, rrëfeu poeti Tafa. /atvlive.tv
Intervistën e plotë të poetit Lulzim Tafa në LIBERO e gjeni në videon më poshtë:
Rektori i Kolegjit AAB, Lulzim Tafa, njëherësh një ndër poetët kosovar më të njohur në botë, është dekoruar nga shteti francez me titullin “Oficer i urdhrit kombëtar të letrave dhe arteve”. Kjo dekoratë është më e larta në fushën e artit dhe letërsisë nga Franca, ndërsa është edhe dekoratat më e lartë të cilën e ka marrë deri tani ndonjë shkrimtar nga Kosova.
Ceremonia e dekorimit u zhvillua në Ambasadën e Francës në Prishtinë, ku ambasadori Olivier Guérot, në emër të presidentit të Francës, Emanuel Macron, i dorëzoi poetit dhe profesorit, Lulzim Tafa, titullin “Oficer i urdhrit kombëtar të letrave dhe arteve”.
Ambasadori Guérot, në fjalën e tij, përgëzoi rrugëtimin e jashtëzakonshëm të Tafës, duke thënë: “Kombinimi i identitetit profesional të Lulzim Tafës, si poet dhe profesor, është një përzierje e jashtëzakonshme që ndërthur racionalitetin me një ndjeshmëri të thellë. Arritjet e tij akademike në fushën e së drejtës penale, krahas kontributeve të tij në kulturë, ilustron më së miri përkushtimin dhe talentin e tij të shumanshëm”.
”I nderuar zoti Tafa, si shumë nga bashkëqytetarët tuaj, lufta ju goditi fort, duke ju shkatërruar shtëpinë, duke shkatërruar bibliotekën tuaj me librat dhe fotografitë e saj, si dhe të gjitha 300 poezitë e shkruara me dorë. Me durimin, këmbënguljen dhe besimin në njerëzim, ju keni gjetur forcën përsëri dhe keni vazhduar punën, duke botuar vepra të shumta shkencore dhe letrare”, tha ambasadori Guérot.
Ai përmendi se janë të shumta Çmimet Ndërkombëtar për Letërsi, të cilat i ka marrë poeti Tafa, si dhe puna e këtij të fundit që është përkthyer në shumë gjuhë, si në frëngjisht, anglisht, gjermanisht, italisht, serbisht, kroatisht, gjuhën malazeze, boshnjakisht, rumanisht, arabisht, greqisht, turqisht, suedisht, etj.
Duke reflektuar për nderimin që i është bërë, poeti dhe profesori Lulzim Tafa shprehu mirënjohjen e tij, ku theksoi se është thellësisht i nderuar që e merr këtë dekoratë prestigjioze, duke shprehur respektin e tij më të lartë për kombin francez, presidentin Macron dhe Ambasadën e Republikës së Francës në Kosovë.
“Kjo njohje ka një rëndësi të madhe për artin dhe letërsinë franceze, një sferë që unë e admiroj thellësisht, veçanërisht poezinë, ku qartësia dhe pastërtia e shprehjes janë shenja dalluese të shkrimtarëve francezë. Vetëm një shpirt i madh, si ai i kombit francez, di të respektojë dhe nderojë kombet e vogla, të nderojë letërsinë e kombeve të vogla si dhe poetët e tyre. Mua më pëlqen letërsia franceze, veçanërisht poezia. Letërsia, si çdo gjë tjetër, po zhvillohet çdo ditë. Por kam besim se letërsia franceze do të rezistojë në çdo kohë, siç shkruajnë me qartësi dhe pastërti shkrimtarët francezë. Kjo e bën unike edhe letërsinë franceze”, tha poeti Tafa.
Ai tha se edhe si rektori Kolegjit AAB, është mirënjohës për bashkëpunimin e madh me Ambasadën e Francës në Kosovë.
Poeti Tafa shtoi se nderime të tilla si ky nder i madh që e mori sot nuk e bëjnë atë një shkrimtar më të madh apo më të rëndësishëm, por e bëjnë më të sigurt në punën e tij krijuese.
“Besimi për një poet ka një rëndësi të madhe, veçanërisht kur kjo vjen nga Franca, djepi i kulturës së kontinentit tonë. Unë besoj në fuqinë e poezisë. Gjatë gjithë jetës sime si krijues, kam marrë shumë nderime dhe dekorata, ku nderimet e mia më të fundit janë nga Ukraina. Aty jam nderuar nga Akademia dhe Patriarku i Shenjtë, si dhe nga organizatat e shkrimtarëve. Më nderuan sepse u përpoqa ta ndaloja atë luftë edhe para se të fillonte, me poezi. A mund ta imagjinoni se sa larg mund të shkojë imagjinata e poetit? Një poet nuk ka kurrë problem me imagjinatën. Një poet ka problem me realitetin. Dhe ky realitet nuk është ai që e donim”, u shpreh poeti Tafa.
Ai tha se ky nder që iu bë nga Faranca, i jep edhe më shumë motivim që ta vazhdojë punën e tij krijuese.
“Si poet, do të përpiqem që vargjet e mia t’i shërbejnë lexuesit për kënaqësi shpirtërore, ndërsa si jurist, profesor dhe drejtues, do të punoj që vendin tonë ta bëjmë më të jetueshëm, sepse e kemi detyrim ndaj brezave që vijnë. Ne duhet të kujdesemi për të krijuar më të mirën e humbur, jo vetëm për njerëzit, por edhe për kafshët, eko-sistemin dhe të gjitha krijesat e planetit tonë”, tha poeti Tafa.
Në ceremoninë e ndarjes së titullit “Oficer i urdhrit kombëtar të letrave dhe arteve” për poetin dhe profesorin Lulzim Tafa që u zhvillua në Ambasadën e Francës në Prishtinë, morën pjesë edhe shumë personalitete të njohura, ndër ta edhe kryetari i Prishtinës, Përparim Rama.
Kujtojmë se gjatë ditës së sotme, PEN Qendra e Kosovës e ka uruar Lulzim Tafën për marrjen e këtij çmimi prestigjioz dhe e ka falënderuar Francën për përzgjedhjen e anëtarit të PEN Qendrës për dhënien e kësaj dekorate.
PEN Qendra e falënderoi Lulzim Tafën për kontributin që ka dhënë në këtë Asociacion dhe i dëshiron edhe shumë çmime e dekorata të tjera në fushën e artit në të cilën ai shquhet-poezi. /atvlive.tv
Poeti i njohur nga Kosova, Lulzim Tafa, këto ditë, nga presidenti i Francës Emmanuel Macron, është dekoruar me urdhrin e lartë të këtij vendi “Oficer i Urdhrit Kombëtar të Letrave dhe Arteve”.
Kjo është Dekorata më e lartë që deri më tash i është dhënë ndonjë shkrimtari a artisti në Kosovë.
Me këtë rast PEN Qendra e Kosovës e uron Lulzim Tafën për marrjen e këtij çmimi prestigjioz dhe e falënderon Francën për përzgjedhjen e anëtarit të PEN Qendrës për dhënien e kësaj Dekorate.
PEN Qendra e falënderon Lulzim Tafën për kontributin që ka dhënë në këtë Asociacion dhe i dëshiron edhe çmime e dekorata të tjera në fushën e artit në të cilën ai shquhet-poezi.
Vetëm pak ditë pasi Presidenti Francez, Emanuel Makron e dekoroi në Tiranë shkrimtarin Ismail Kadare me urdhërin “Oficier i Madh i Legjionit të Nderit”, Ministrja e Kulturës së Francës, Rima Abdul Malak e ka nënshkruar dekretin me të cilin i akordon poetit të mirënjohur kosovar, Lulzim Tafa, dekoratën ”Oficier i Urdhërit Kombëtar të Letrave dhe Arteve”.
Kjo është dekorata më e lartë që shteti francez e jep në fushën e artit dhe letërsisë dhe po ashtu është edhe dekorata më e lartë që ndonjë artist apo shkrimtar nga Kosova e ka marrë deri më tani nga shteti francez. Me këtë dekoratë Franca nderon personalitete të shquara franceze dhe ndërkombëtare për të arritura në fushën e artit dhe të letërisisë.
“Urdhërin Kombëtar të Letrave dhe Arteve” e ndanë Ministria e Kulturës së Francës dhe nga viti 1957 dhe është nën patronatin e Presidentit të Republikës së Francës.
Lulzim Tafa është njëri ndër poetët kosovarë më të njohur në botë, veprat e të cilit janë përkthyer në rreth tridhjetë gjuhë të botës. Tafa nga kritika letrare botërore është cilësuar si një ndër poetët kryesorë postmodernistë të Evropës, ndërsa përmes librave të tij është mjaftë i njohur edhe për lexuesit në Francë.
Kohët e fundit, Lulzim Tafa, është bërë i njohur edhe për artin e tij në shërbim të paqes. Ai u bë shumë i njohur para shpërthimit të luftës në Ukrainë me poezinë ”Fol me poetët rusë” si dhe me letrat dërguar shumë artistëve dhe shkrimtarëve rusë me lutjet që të ndikojnë te politika që ta parandalojnë luftën.
Si rezultat i përpjekjeve të tij anti luftë me anë të poezisë ai është nderuar nga shumë institucione kulturore e arsimore edhe në Ukrainë si dhe është dekoruar edhe nga Patriarku i Ukrainës, Patriarku Filaret me urdhërin “Yuri i Shenjtë Fitimtar”.
Lulzim Tafa po ashtu ka fituar shumë çmime prestigjioze ndërkombëtare, mban shumë tituj nderi në akademi dhe universitete ndërkombëare.
Ndër të tjera është anëtar i Akademisë së Shkencave dhe Arteve të Evropës si dhe anëtar i Akademisë së Shkencave, Arteve dhe Letërsisë në Paris.
Ceremonia e dekorimit të poetit Lulzim Tafa me urdhërin “ Oficer i Letrave dhe Arteve” do të bëhet me ceremoni zyrtare në Rezidencën Franceze në Prishtinë.
Lulzim Tafa, një nga poetët më të njohur nga Kosova në skenën botërore, është nderuar me titullin më të lartë “Doctor of Literature” nga Kongresi Botëror i Poetëve.
Lajmin e ka bërë të ditur vetë Tafa nëpërmjet një postimi në Facebook.
“Një nderim i madh mu bë në ditën e fundit të Kongresit Botëror të Poetëve. Në mesin e qindra poetëve nga e mbarë bota, isha njëri prej 8 poetëve që Kongresi i Nderoi me titullin më të lartë “Doctor of Literature””, ka shkruar poeti. /atvlive.tv
Poeti i njohur kosovar, Lulzim Tafa do të jetë i ftuar si mysafir nderi në Kongresin Botëror të Poetëve.
Ky kongres, i 42-ti me radhë, sivjet për herë të parë mbahet në një anije gjigante dhe do të marrin pjesë poetë nga mbarë bota.
Kongresi do nisë në Romë-Itali dhe do të lëvizë bashkë me vargjet e poetëve nëpër ujërat e Mesdheut, në Maltë, në Greqi dhe përsëri do të kthehet në Itali.
“Poezia mbi ujë”, shprehet poeti Lulzim Tafa teksa tregon që është i lumtur që do të jetë pjesë e kësaj eksperience e njëkohësisht për faktin që në këtë kongres do të jetë prezente edhe letërsia shqipe.
“Jam i lumtur që do t’i takoj shumë nga miqtë e mi poetë nga të gjitha anët e globit, po ashtu jam i lumtur që në këtë kongres do të jetë prezente edhe letërsia jonë”, shprehet Tafa.
Kongresi Botëror i Poetëve do të mbahet më datë 22 deri më 29 shtator.
Lulzim Tafa është një nga poetët më të njohur nga Kosova në skenën botërore.
Botues të njohur nga vende të ndryshme të botës kanë përkthyer dhe botuar librat e tij, ndërsa krijimtarinë e tij artistike e kanë vlerësuar shkrimtarë dhe kritikë letrarë, vendas dhe ndërkombëtarë.
Lulzim Tafa është një nga poetët më të njohur dhe më të përkthyer të letërsisë shqipe në botë.
Së fundmi, poezia e tij është përkthyer edhe në suedisht nga Ullmar Qvick, ka njoftuar Ambasada e Kosovës në Stokholm, e cila edhe ka ndarë këtë përkthim në faqen e saj zyrtare në Facebook. /atvlive.tv
