ATV

Tag: Ejup Maqedonci

  • Ministri Maqedonci: Armatosja e Serbisë, kërcënim për rajonin – FSK-ja e gatshme për mbrojtje të vendit

    Ministri Maqedonci: Armatosja e Serbisë, kërcënim për rajonin – FSK-ja e gatshme për mbrojtje të vendit

    Ministri i Mbrojtjes i Republikës së Kosovës, Ejup Maqedonci, lidhur me vendosjen e shumë njësive ushtarake të Serbisë pranë kufirit me Kosovën, thotë se “ne jemi gjithmonë të gatshëm, Forca e Sigurisë së Kosovës (FSK) ka në gatishmëri njësitet e saja për çdo kërcënim dhe rrezik që paraqitet në vendin tonë”.

    Në një intervistë të dhënë për “Anadolu”, Maqedonci ka folur për tensionet e fundit me Serbinë, procesin e shndërrimit të FSK-së në ushtri, planet për t’u anëtarësuar në NATO, ndihmën e tyre ushtarake për Ukrainën dhe marrëdhëniet ushtarake Kosovë-Turqi.

    Maqedonci tha se vendosja e shumë njësive ushtarake të Serbisë afër kufirit me Kosovën paraqet rrezik, derisa theksoi se ushtria dhe xhandarmëria serbe kanë 48 baza operative në afërsi të kufirit me Kosovën.

    “Duke i shtuar kësaj militarizimin e ushtrisë dhe Serbisë në përgjithësi, ku vlen të theksohet blerja e sistemeve të ndryshme të armatimit nga Kina, Rusia, madje edhe Irani, e shohim këtë si një kërcënim të vazhdueshëm të sigurisë në Republikën e Kosovës por edhe në vendet e tjera përreth”, theksoi Maqedonci.

    Sipas ministrit kosovar, këto zhvillime bazohen në politikën hegjemoniste dhe agresive të qeverisë serbe ndaj Kosovës dhe fqinjëve të tjerë.

    “Kjo gjë thuhet haptas. Kemi pasur deklaratat e fundit të presidentit Vuçiq se Serbia pret një moment të favorshëm për të marrë veprime ushtarake kundër Kosovës, por kjo na jep të dimë se duhet t’i zhvillojmë kapacitetet tona dhe të ndërtojmë ushtrinë tonë jo vetëm për të përballuar këtë kërcënim, por edhe për t’u ballafaquar me kërcënime të tjera që cenojnë sigurinë dhe territorin e vendit tonë”, theksoi ai për agjencinë turke të lajmeve, Anadolu.

    Procesi i transformimit të FSK-së në ushtri dhe anëtarësimi i Kosovës në NATO

    Ministri Maqedonci tha se janë në fazën e dytë të realizimit të planit për transformimin e FSK-së në ushtri, me fokus në rritjen e kapaciteteve këmbësorike dhe luftarake për mbrojtjen e rajonit dhe se do të kalojnë në fazën e tretë dhe të fundit në vitin 2025 dhe në këtë kontekst, do të fokusohen në ndërtimin e kapaciteteve të artilerisë, mbrojtjes ajrore, si dhe kapaciteteve mbështetëse luftarake, deri në vitin 2028.

    Duke theksuar se aktualisht FSK-ja ka personel me rreth 4 mijë pjesëtarë, Maqedonci tha se në mesin e tyre janë 55 pjesëtarë turq të Kosovës.

    Ai tha se anëtarësimi në NATO është ndër synimet strategjike të sigurisë kombëtare të Kosovës, shtuar thënë se kanë krijuar kapacitete mbrojtëse në përputhje me doktrinën e NATO-s dhe se të gjitha pajisjet dhe sistemet e armatimit i kanë blerë sipas standardeve të NATO-s.

    “Blerjet e armatimit janë të drejtuara në vendet e NATO-s, ne nuk blejmë nga asnjë vend që nuk është pjesë e NATO-s. Kryesisht jemi fokusuar të bëjmë blerje nga vendet me të cilat kemi partneritet më të afërt, si SHBA, Turqia, Gjermania dhe vende të tjera”, theksoi ministri, duke nënvizuar se nga viti 2021 deri në vitin 2023 kanë ndarë mbi 200 milionë euro për blerjen e armëve dhe pajisjeve të ndryshme në kuadër të transformimit të FSK-së në ushtri.

    Kosova do të ofrojë ndihmë ushtarake për Ukrainën

    Ministri Maqedonci deklaroi se janë gjithmonë të gatshëm të mbështesin “luftën e drejtë për liri” të Ukrainës.

    Ai tha se ndihma, të cilën ai e quan modeste, është shumë e rëndësishme për Ukrainën në këtë fazë të vështirë të luftës së tyre për liri.

    “Qeveria e Kosovës ka vendosur të ofrojë dy pako mbështetëse për Ukrainën. Pakoja e parë do të dërgohet këtë javë për në Ukrainë dhe përbëhet nga kamionë taktikë, automjete taktike dhe autoblinda ushtarake. Kurse pakoja e dytë që përbëhet nga predha mortajash 120, 81 dhe 60-milimetërshe, do të dërgohet gjithashtu së shpejti në Ukrainë”, theksoi Maqedonci.

    Ne kemi “marrëdhënie të veçanta” me Turqinë në fushën ushtarake

    Maqedonci tha se ushtarët turq që shërbejnë në kuadër të KFOR-it që nga viti 1999 janë shumë të rëndësishëm për sigurinë dhe stabilitetin e vendit.

    Ai tha se Kosova me Turqinë kanë “marrëdhënie të veçanta” në fushën ushtarake, bazuar në lidhjet kulturore dhe historike.

    “Ne në vazhdimësi kemi njësi dhe individë që i trajnojmë në Republikën e Turqisë. Kemi shumë ekipe të ushtrisë turke të cilat në Kosovë zhvillojnë trajnime të ndryshme për njësitë e FSK-së. Kemi gjithashtu raporte të shkëlqyera në aspektin e industrisë ushtarake, pra, më saktësisht të blerjeve ushtarake. Në këtë aspekt, për të rritur më shumë këtë bashkëpunim, në fillim të këtij viti nënshkruam një marrëveshje kornizë ushtarake me Republikën e Turqisë në Ankara bashkë me ministrin (Jashar) Gyler. Gjithë kjo mbështetje që Turqia ofron për kapacitetet mbrojtëse të vendit tonë janë vërtet vitale që vendi ynë, më saktë Ministria jonë e Mbrojtjes dhe FSK, të kenë sot një nivel të lartë profesionalizmi dhe ndoshta të jetë ndër ushtritë më të zhvilluara në rajon në aspektin e gjithëmbarshëm”, theksoi ai.

    Duke folur për dronët “Bayraktar TB2”, që Kosova i bleu nga Turqia gjatë vitit të kaluar, Maqedonci theksoi se proceset e testimit dhe trajnimit me to janë duke vazhduar.

    “Njësitë e veçanta që merren me drejtimin e Bajraktarëve TB2, zhvillojnë aktivitete të ndryshme me ta dhe me të vërtetë ne i shohim si asetet kyçe të FSK-së”, theksoi ministri.

    Duke deklaruar se në inventarin e FSK-së kanë produkte turke si raketa kundërtank “Omtas” dhe automjete “Vuran” me sistem të integruar të armatimit të mortajave 120 milimetër, Maqedonci shtoi gjithashtu se do të blejnë nga SHBA-ja raketa kundërtank “Javelin”, për të cilat procesi ende po vazhdon.

    FSK-ja, e cila u themelua në vitin 2009 për të ofruar operacione për menaxhimin e krizave në Kosovë dhe përtej kufirit, për të shërbyer në operacionet e mbrojtjes civile në vend dhe në fatkeqësitë natyrore dhe emergjenca të tjera, filloi procesin e transformimit të saj në ushtri me ndryshime ligjore nga viti 2018. Procesi pritet të zgjasë 10 vjet.

  • Maqedonci pas takimit me homologun italian: E nënvizova qëllimin tonë për t’iu bashkuar NATO-s

    Maqedonci pas takimit me homologun italian: E nënvizova qëllimin tonë për t’iu bashkuar NATO-s

    Ministri i Mbrojtjes, Ejup Maqedonci, ka pritur në takim homologun e tij italian, Guido Crosetton, i cili është duke qëndruar për vizitë në Kosovë.

    Maqedonci, mes tjerash theksoi se temë e diskutimit ka qenë rritja e bashkëpunimit dhe anëtarësimi i Kosovës në NATO.

     “Rikonfirmuam angazhimin e përbashkët të të Kosovës dhe Italisë, për të vazhduar partneritetin tonë dypalësh në fushën e mbrojtjes”, shkroi Maqedonci në platformën X.

    “Ministrin e falenderova për mbështetjen që Italia i ka ofruar Kosovës, veçanërisht në fushën e sigurisë dhe mbrojtjes duke qenë shteti me pjesëmarrjen më të madhe të trupave në kuadër të misionit të KFOR-it. Ndërsa po ashtu e njoftova rreth mbështetjes që jemi duke i ofruar Ukrainës përmes ofrimit të trajnimeve dhe dhurimit të automjeteve taktive e municioneve që pritet të dërgohen së shpejti.Kërkova mbështetjen e Italisë në proceset për anëtarësimin e Kosovës në BE dhe në NATO, për të cilën pranova dhe konfirmin nga ministri Crosetto se do të kemi mbështetjen e pakursyer të Italisë. Integrimi i Ballkanit në BE dhe në NATO të dy ishim dakord se do të krijonte stabilitet dhe paqe të qëndrueshme”, ka shkruar mes tjerash Maqedonci.

  • Maqedonci: UÇK-ja dhe familja Jashari ndriçuan rrugën drejt lirisë

    Maqedonci: UÇK-ja dhe familja Jashari ndriçuan rrugën drejt lirisë

    Ministri i Mbrojtjes, Ejup Maqedonci sot së bashku me komandantin e FSK-së, Bekim Jasharin kanë bërë homazhe në nderim të familjes Jashari dhe të rënëve tjerë.

    Maqedonci ka shkruar në Facebook se UÇK-ja dhe familja Jashari ishin ata që ndriçuan rrugën drejt lirisë.

    “Datat 5, 6 dhe 7 mars, shënojnë kthesën më të madhe historike të popullit tonë, shënojnë sakrificën më sublime për liri dhe atdhe, prandaj do të mbetën përherë në kujtesën e lavdishme të popullit tonë”, ka shkruar ai mes tjerash.

    Postimi i plotë:

    Sot së bashku me komandantin e FSK-së, Gjenerallejtënant Bashkim Jashari, si dhe personelin e Ministrisë së Mbrojtjes dhe Forcës së Sigurisë së Kosovës, bëmë homazhe në nderim të familjes Jashari dhe gjithë të rënëve dhe më pas ishim në kullë, ku na priti baca, Rifat Jashari.

    Për të arritur te liria duhej të ishim bashkë të gjithë por përveçse të bashkuar duhej një fanar që të na ndriqojë rrugën. Ishte UÇK-ja, ishin Jasharajt ata që na bënë bashkë dhe na ndriquan rrugën duke na prirë përpara drejt luftës çlirimtare, rrjedhimisht drejt lirisë.

    Datat 5, 6 dhe 7 mars, shënojnë kthesën më të madhe historike të popullit tonë, shënojnë sakrificën më sublime për liri dhe atdhe, prandaj do të mbetën përherë në kujtesën e lavdishme të popullit tonë.

    Lavdi dhe nderime për të rënët!

  • Maqedonci: FSK-ja është gati për anëtarësim në NATO

    Maqedonci: FSK-ja është gati për anëtarësim në NATO

    Prania e 48 bazave ushtarake serbe përgjatë kufirit me Republikën e Kosovës, pak kilometra në thellësi të territorit të Serbisë, vazhdon të jetë rrezik real dhe si i tillë do të trajtohet, tha ministri i Mbrojtjes.

    Si fakt shqetësues, Ejup Maqedonci përmendi edhe armatosjen e shtetit fqinj, nga Rusia dhe Kina.

    “Prezenca ushtarake e ushtrisë së Serbisë në jug të territorit të Serbisë dhe prezenca e 48 bazave të përparme operacionale të ushtrisë dhe xhandarmërisë serbe përgjatë vijës kufitare me Republikën e Kosovës duke i shtuar kësaj edhe bazamentin që është qasja hegjemoniste dhe agresive politike e Republikës së Serbisë në raport me Republikën e Kosovës, ky rrezik është real dhe vlerësojmë që përderisa Serbia vazhdon militarizimin, blerjet e sistemeve dhe armatimit nga Rusia dhe Kina dhe përderisa rrit kapacitetet ushtarake dhe sidomos ato në kufi me vendin tonë, ky rrezik është real dhe vlerëson që vendi ynë do ta trajtojë me të vërtetë si një rrezik real”, deklaroi ministri Maqedonci.

    Anëtarësimin e Kosovës në Aleancën Veri-Atlantike, ministri i Mbrojtjes e sheh si problem politik duke e lidhur me qëndrimin e vendeve mosnjohëse.

    “Ne kemi bërë hapa jashtëzakonisht të shumtë për përgatitjen e kapaciteteve tona mbrojtëse për anëtarësimin në NATO. Ministria e Mbrojtjes planifikon dhe organizon punën e saj bazuar në planifikimin që e bënë edhe NATO, në dokumentet që aplikon në NATO. Forca e Sigurisë së Kosovës zhvillohet, trajnohet dhe përgatitet siç përgatiten të gjitha vendet e NATO-s, ushtarakët tanë përgatiten me doktrinën e NATO-s dhe shumica e pjesëtarëve tanë janë të trajnuar në shkollat e tyre. Sa i përket aspektit të përgatitjes së mbrojtjes, vendi ynë qëndron afër anëtarësimit në NATO, mirëpo normalisht problemi është politik, duke pasur parasysh që është vendim politik i secilit shtet brenda tij për çështjen e pranimit apo të mospranimit të një vendi në NATO, dhe i kemi katër vende të mosnjohjes që paraqesin në vazhdimësi problem në aspektin e anëtarësimit të vendit tonë në NATO.”, tha Maqedonci.

    Ministri kosovar i Mbrojtjes, edhe një herë theksoi se grupi terrorist që vrau rreshterin Afrim Bunjaku dhe plagosi policin Alban Rashiti,  me 24 shtator në Banjskë ka përdorur armatim të prodhuar në fabrikat shtetërore të Serbisë dhe ishte trajnuar nga instruktorë ushtarakë në Serbi.

  • Maqedonci: O’Brien ma konfirmoi se ShBA-ja do të angazhohet për integrimin euro-atlantik të Kosovës

    Maqedonci: O’Brien ma konfirmoi se ShBA-ja do të angazhohet për integrimin euro-atlantik të Kosovës

    Ministri i Mbrojtjes i Kosovës, Ejup Maqedonci që ndodhet për një vizitë në Shtetet e Bashkuara, pati një takim të mërkurën me Ndihmës Sekretarin amerikan të Shtetit, Jim O’Brien, ku u diskutua për vazhdimin e bashkëpunimit mes dy vendeve.

    Maqedonci shprehu në një intervistë me Zërin e Amerikës, vlerësimin për mbështetjen e Shteteve të Bashkuara për zhvillimin e kapaciteteve mbrojtëse të Kosovës. Lidhur me kërkesën e Shteteve të Bashkuara për formimin e shpejtë të Asociacionit, ai tha se Marrëveshja e Ohrit duhet të zbatohet si nga Kosova dhe Serbia në tërësi dhe se çdo marrëveshje duhet të jetë në përputhje me Kushtetutën.

    Zëri i Amerikës: Zoti Maqedonci, cilat ishin çështjet kryesore që u ngritën në takimin me zotin O’Brien?

    Ejup Maqedonci: Vizitën time zyrtare në Shtetet e Bashkuara sot e fillova me takimin me Ndihmës Sekretarin e Shtetit për Çështjet e Evropës dhe Euroazisë. Do të kem edhe takime të tjera në ditët në vijim. Nesër do të takohem me Zëvendës Sekretarin e Mbrojtjes Sasha Baker dhe me zonjën Wallander, e cila është zëvendës ndihmës sekretare për çështjet ndërkombëtare. Në takimin me zotin O’Brien diskutuan për shumë gjëra, për shumë çështje të përbashkëta. Në veçanti, theksuam nevojën e vazhdimit të raporteve të shkëlqyera midis Shteteve të Bashkuara të Amerikës dhe Republikës së Kosovës dhe thellimin e këtyre të raporteve. Mora edhe një herë konfirmimin që Shtetet e Bashkuara të Amerikës dhe personalisht O’Brien do të angazhohen në mbështetjen e Kosovës në anëtarësimin në organizatat ndërkombëtare, me theks të veçantë integrimet euro-atlantike, programin e partneritetit të paqes dhe programe të tjera rajonale, ku Shtetet e Bashkuara të Amerikës kanë rol të veçantë. Sipas Ndihmës Sekretarit të Shtetit O’Brien, Shtetet e Bashkuara të Amerikës do të vazhdojnë të mbështesin zhvillimin e kapaciteteve mbrojtëse të vendit tonë. Zhvillimi i këtyre kapaciteteve është bërë tashmë për disa vite në bashkëpunim të plotë me Shtetet e Bashkuara dhe partnerë të tjerë të NATO-s.

    Zëri i Amerikës: Siç e dëgjuam edhe nga të rejat e fundit nga Prishtina, Shtetet e Bashkuara po kërkojnë themelimin sa më të shpejtë të Asociacionit. Si e vlerësoni këtë kërkesë?

    Ejup Maqedonci: Marrëveshja e Ohrit, e arritur mes Kryeministrit Kurti dhe autoriteteve të Serbisë, vlerësojmë dhe kjo është thënë edhe nga Kryeministri, që duhet të zbatohet nga të dyja palët, normalisht. Të gjitha marrëveshjet brenda marrëveshjes kryesore duhet të zbatohen pa përjashtim. Ne vazhdojmë të theksojmë faktin që çdo marrëveshje, që do të nënshkruhet, normalisht që bazë kryesore duhet të ketë kushtetutën e Kosovës. Pra, duhet të jetë e padiskutueshme çështja se do të jenë ato në përputhje me kushtetutën e vendit tonë. Pavarësisht se ky proces u dëmtua rëndë nga sulmi terrorist i 24 shtatorit ndaj sovranitetit dhe integritetit territorial të vendit tonë, qeveria e Kosovës vazhdon ta ketë në fokus dialogun si mjet i vetëm për zgjidhjen e çështjeve të diskutueshme mes dy vendeve.

    Zëri i Amerikës: Zoti ministër, sulmi i 24 shtatorit ndaj policisë së Kosovës në veri, nxiti shqetësime për situatën e sigurisë në rajon. Nga pikëpamja juaj si paraqitet kjo situatë aktualisht?

    Ejup Maqedonci: Situata e sigurisë në atë zonë tashmë është shumë më e qetë. Ne kemi prani të vazhdueshme të shtetit në atë pjesë, veçanërisht të policisë së Kosovës, e cila në vazhdimësi edhe para sulmit të 24 shtatorit ka qenë e pranishme atje, duke mundësuar jetesën për qytetarët dhe mirëqenien e qytetarëve atje. Por gjithashtu, duke penguar zhvillimin e aktiviteteve të ndryshme ilegale dhe terroriste, përfshirë edhe në rrugët ilegale, të cilat janë përdorur nga shumë grupe atje për sjelljen e armatimit ilegal në Kosovë, që u përdor nga grupi i udhëhequr nga Rajdoiçiq në sulmin ndaj institucioneve të vendit tonë. Tani situata është më e qetë. Megjithatë rreziku vazhdon të jetë i pranishëm. Kërcënimi vazhdon të jetë i pranishëm, ndërsa vazhdon qasja hegjemoniste dhe agresive e Republikës së Serbisë në raport me vendin tonë dhe për aq sa vazhdon militarizimi i Serbisë, duke përfshirë edhe blerjet nga Kina dhe Rusia, që janë blerje të vazhdueshme që Serbia është duke realizuar. Por edhe duke pasur parasysh militarizimin e pjesës kufitare me Kosovën, ku Serbia tashmë ka të vendosura 48 baza të përparme operacionale.

    Zëri i Amerikës: A pati pasoja tek Forca e Sigurisë përjashtimi i Kosovës nga Defender Europe 2023?

    Ejup Maqedonci: Pavarësisht dëmtimit të imazhit me largimin nga “Defender Europe 23”, më saktësisht mund të them me pezullimin e ditës së vizitorëve të shquar, sepse gjithë procesi i trajnimit, të gjitha objektivat e “Defender Europe 23” të realizuar në Kosovë janë arritur. Ne kemi vazhduar edhe pas pezullimit bashkëpunimin me ekipet ushtarake amerikane për të validuar kapacitetet tona që kanë qenë të angazhuara në këtë ushtrim. Pra ushtrimi “Defender Europe 23” ka përfunduar me sukses pavarësisht pezullimit të ditës, që ka qenë pezullimi i ditës së vizitorëve të shquar, që është normalisht një aktivitet i rëndësishëm. Mirëpo me të vërtetë në përmbajtje nuk është dëmtuara fare.

    Zëri i Amerikës: Sekretari i Përgjithshëm i NATO-s Jens Stoltenberg, në të paktën dy raste pas 24 shtatorit ritheksoi se Forca e Sigurisë së Kosovës nuk duhet të vendoset në veriun e banuar me shumicë serbe, pa pëlqimin paraprak të komandantit të KFOR-it, duke iu referuar një marrëveshjeje me NATO-n. A e lë pa ndonjë rol në veri Forcën tuaj një gjë e tillë?

    Ejup Maqedonci: Në fakt ka qenë zotimi i vitit 2013 për mospërfshirje të Forcës së Sigurisë së Kosovës në operacione në veri të territorit të Kosovës, zotim i cili respektohet nga të gjithë ne sot. Normalisht, është çështje tjetër a pajtohemi apo nuk pajtohemi me atë zotim. Mirëpo ne jemi të vetëdijshëm për zotimet ndërkombëtare dhe vazhdojmë ta respektojmë zotimin e 2013-ës dhe do ta respektojmë në vazhdimësi. Në të saktësohet se Forca e Sigurisë së Kosovës do të mund të operojë në veri të vendit, duke bërë koordinim paraprak me forcat e KFOR-it, gjë që ne e bëjmë në vazhdimësi. Është për t’u theksuar se edhe pas zotimit të 2013-ës, ne kemi pasur në të kaluarën operacione në bashkëpunim me KFOR-in të njësive të veçanta, kryesisht të kërkim-shpëtimit në liqenin e Ujmanit. Pra ne pavarësisht kufizimit që e kemi në veri, në bashkëpunim me KFOR-in, jemi në koordinim të vazhdueshëm që në rast se cenohet territori dhe sovraniteti i vendit apo jeta e qytetarëve, ne do të jemi të gatshëm të mbështesim operacionet e policisë së Kosovës apo KFOR-it në veri të vendit. Gjithmonë duke pasur parasysh që do të bëhet në koordinim paraprak me KFOR-in. Përndryshe Forca e Sigurisë së Kosovës ka mandate të ushtrojë detyrat e saj në të gjithë territorin e vendit tonë dhe trajnohet, zhvillohet, përgatitet për të kryer tri detyrat kyçe të saj që është mbrojtja e territorit të vendit, mbështetja ushtarake për autoritetet civile si dhe pjesëmarrja në operacionet ndërkombëtare.

  • “Ai është pezulluar nga detyra”, Maqedonci flet për pjesëtarin e FSK-së, të dyshuar si i përfshirë në vrasjen e Liridona Ademajt

    “Ai është pezulluar nga detyra”, Maqedonci flet për pjesëtarin e FSK-së, të dyshuar si i përfshirë në vrasjen e Liridona Ademajt

    Ministri i Mbrojtjes, Ejup Maqedonci, në emisionin CONTEXT në ATV, tregoi se pjesëtari i FSK-së, Kushtrim Kokolla, i akuzuar për pjesëmarrje në vrasjen e Liridona Ademajt, është pezulluar nga detyra.

    “Si rasti i fundit kur gjykata faktikisht kur prokuroria e adreson këtë çështje dhe merret me individin, detyrë e jona është normalisht sipas rregulloreve që të pezullojmë, pra ta suspendojmë nga detyra për t’i dhënë mundësinë organeve të tjera të bëjnë hetimet e nevojshme, por edhe gjykatës që të kryejë punën e saj. Mirëpo, megjithatë ne vazhdojmë, kemi edhe ekipin e hetimeve brenda Policisë Ushtarake, ekip i cili realizon hetime, në rast se lidhet diçka me FSK-në edhe me kohën kur ka shërbyer aty që ndërlidhet edhe me krimin e supozuar jashtë”, tha Maqedonci.

    Ai thotë se në momentin që ai shpallet fajtor, atëherë automatikisht largohet nga FSK.

    “Ne në vazhdimësi ndjekim procesin gjyqësor, normalisht jo vetëm për të mbështetur aspektin e prokurorisë, por gjithashtu edhe për të shikuar edhe aspektin e ligjshmërisë të akuzës, pra në njëfarë forme, ne shikojmë edhe aspektin e mbrojtjes së drejtave të ushtarëve kur ballafaqohen me këto raste, por në momentin shpallet fajtor, atëherë largohet automatikisht nga FSK”, tregoi Maqedonci.

    Këtë rast, ai e vlerëson si rast të izoluar dhe nuk e përjashton se mund të ketë individë që mund të kryejnë akte të këqija jashtë institucionit.

    “Vlerësojmë se janë raste të izoluara. Një gjë duhet ta kemi parasysh se ushtria del prej popullit, pra qytetarët e këtij vendi e bëjnë ushtrinë. Çka është dallimi, është që normalisht ne jemi konsideruar ndër vite si institucioni më kredibilitetin më të lartë. Ne e kemi një kulturë të veçantë brenda FSK-së siç e kemi edhe brenda Ministrisë së Mbrojtjes që vjen si rezultat i formësimit ushtarak, formësimit, rregullit, disiplinës e të gjitha të tjerave. Megjithatë, ne nuk e përjashtojmë kurrë mundësinë që nga radhët tona të ketë edhe individë të cilët mund të kryejnë akte të këqija në raport jashtë institucionit, mirëpo megjithatë ne kemi marrë masa qysh në fillim. Në bëjmë vetingun, bëjmë një kontroll të së kaluarës të secilit pjesëtar qytetar që i bashkëngjitet FSK-së. Ne në vazhdimësi bëjmë edhe kontroll, i kemi hierarkinë ushtarake e cila është e obligueshme që të mbikëqyrë çdo lëvizje, qoftë edhe e dyshimtë, mirëpo normalisht ne nuk mund kontrollojnë çdo gjë 24 orë për secilin individ. Me të vërtetë, këto raste janë të izoluara”, deklaroi ministri Maqedonci. /atvlive.tv

  • Vrasja e Liridonës, Maqedonci: Ndaj pjesëtarit të FSK-së do veprohet në përputhje me rregulloret

    Vrasja e Liridonës, Maqedonci: Ndaj pjesëtarit të FSK-së do veprohet në përputhje me rregulloret

    Ministri i Mbrojtjes, Ejup Maqedonci, duke iu referuar përfshirjes së pjesëtarit të FSK-së në vrasjen e Liridona Ademajt, ka thënë se ndaj tij do të veprohet në përputhje me rregulloret e FSK-së.

    Sipas tij, të gjithë të përfshirët në rast duhet të marrin dënimin meritor.

    “I tronditur kam përcjellë ngjarjen e fundit tragjike, atë të vrasjes së Liridona Ademaj. Ndërkohë që zhvillimet e fundit rreth zbardhjes së rastit kanë sjellë një situatë makabër në publik, para pak çastesh jam informuar për arrestimin e një pjesëtari të FSK-së në lidhje me rastin”, ka shkruar Maqedonci.

    “Të gjithë të përfshirët në rast duhet të marrin dënimin meritor ndërsa deri në zbardhjen e plotë të rrethanave, ndaj pjesëtarit të FSK-së do të veprohet në përputhje me rregulloret e FSK-së”, ka shtuar ai.

    Ai u ka shprehur ngushëllime familjarëve, të afërmve dhe të gjithë qytetarëve të prekur nga vrasja e Liridona Ademajt.

  • Ministri i Mbrojtjes së Republikës së Turqisë, Yasar Guler pritet me ceremoni nga homologu kosovar, Ejup Maqedonci

    Ministri i Mbrojtjes së Republikës së Turqisë, Yasar Guler pritet me ceremoni nga homologu kosovar, Ejup Maqedonci

    Ministri i Mbrojtjes, Ejup Maqedonci e ka pritur me ceremoni ministrin e Mbrojtjes së Republikës së Turqisë, Yasar Guler, raporton Ekonomia Online.

    Të dy ministrat do të mbajnë takimin tete-a-tete, ku mediet mund të marrin pamje.

    Më pas, ministri i Mbrojtjes së Turqisë, Guler, do të pritet në takim nga Komandanti i FSK-së, gjenerallejtënant Bashkim Jashari, ndërsa pas përfundimit të takimeve të planifikuara, duke filluar nga ora 10:45 do të mbahet konferencë për medie.

    Ministri turk do të pritet në takim edhe nga presidentja Vjosa Osmani.

  • Kosova pa kapacitete për mirëmbajtjen e dronëve ushtarak

    Kosova pa kapacitete për mirëmbajtjen e dronëve ushtarak

    Përgatiti: Nora Luta

    Konsiderohen si investim më i madh në Forcën e Sigurisë së Kosovës që nga themelimi i saj.

    Por dronët “Bayraktar TB-2”, të blerë nga Turqia, përveç specifikave për përdorimin e tyre, ata në këtë fazë as nuk do të mirëmbahen nga FSK-ja.

    Ministri i ri i Mbrojtjes, Ejup Maqedonci, thotë se pjesë e kontratës për blerjen e tyre është edhe trajnimi i stafit dhe mirëmbajtja e pajisjeve, deri në përgatitjen e kapaciteteve vetjake.

    Sipas Maqedoncit, Kosova ka blerë pajisje dhe armatime të tjera të teknologjisë së fundit.

    Maqedonci, në një intervistë për ATV-në, ka thënë se Fondi i Sigurisë do të jetë i përhershëm.

    Por ministri i Mbrojtjes nuk ka treguar kur do të bëhet publik buxheti i mbledhur deri tash, meqë, sipas tij, përgjegjësia bie te Ministria e Financave.

    Ndërkohë, faza e dytë e planit të transformimit të FSK-së në ushtri, sipas Maqedoncit, do të përfundojë në vitin 2025.

    Maqedonci, i cili u emërua në këtë pozitë pas dorëheqjes së Armend Mehajt, ka shtuar se zbehja e raporteve dhe mospajtimet me ndërkombëtarët nuk kanë ndikuar në Ministrinë e Mbrojtjes, duke theksuar mbështetjen që e ka marrë nga Shtetet e Bashkuara të Amerikës.

    Maqedonci vizitën e parë zyrtare do ta ketë javën e ardhshme në Shqipëri, ndërsa po gjatë këtij muaji ai do të zhvillojë takime edhe në Britaninë e Madhe.

    Edicionin Qendror të lajmeve në ATV e gjeni në videon më poshtë: