ATV

Tag: Edward Joseph

  • ​Edward Joseph: Daçiq në Shkup shkeli Marrëveshjen e Ohrit, ShBA e BE të jenë të vëmendshme

    ​Edward Joseph: Daçiq në Shkup shkeli Marrëveshjen e Ohrit, ShBA e BE të jenë të vëmendshme

    Eksperti i zhvillimeve në Ballkanin Perëndimor dhe profesori amerikan i Universitetit “John Hopkins” në Washington, Edward P. Joseph, ka thënë se Serbia ka shkelur Marrëveshjen e Ohrit, duke iu referuar deklaratës së Ministrit të Jashtëm serb, Ivica Daçiq, i cili në Shkup ditë më parë kishte thënë se Kosova kurrë nuk do të bëhet anëtare e e OSBE-së.

    “Me afrimin e Këshillit Evropian – me konkluzionet kyçe për Serbinë dhe Kosovën në ekuilibër – Ministri i Jashtëm serb Daçiq vazhdon të avancojë kërkesën e Kosovës që Beogradi në fakt të nënshkruajë të tre propozimet e mbështetura nga BE/SHBA. Më 4 dhjetor, Daçiq nënvizoi deklaratën e presidentit Vuçiq se ai nuk e kishte nënshkruar propozimin franko-gjerman. Prandaj, Daçiq tha se, “kjo do të thotë se ne nuk pranojmë asnjë interpretim që nënkupton njohjen e Kosovës dhe se nuk ka hyrje në Kombet e Bashkuara”, ka shkruar ai në llogarinë e tij në platformën X.

    “Por bllokimi i Serbisë nuk kufizohet vetëm me hyrjen e Kosovës në OKB. Daçiq: “Ajo që është e mirë për OSBE-në është se Kosova nuk mund të bëhet kurrë anëtare e asaj organizate sepse për të kërkohet konsensus dhe Serbia nuk do të pajtohet kurrë me të. Procesi i vendimmarrjes është i tillë që vendimet merren unanimisht. Kjo do të thotë se Serbia duhet të pajtohet me të dhe Serbia kurrë nuk do të pajtohet me të. Është absolutisht e pamundur”, ka thënë Joseph.

    Ai tha se deklarata e ministrit serb është në kundërshtim ndaj Marrëveshjes së shkurtit për normalizimin e marrëdhënieve në mes Kosovës e Serbisë, teksa tha se ShBA e BE- duhet të jenë të vëmendshme ndaj kësaj deklarate.

    “Kjo është në kundërshtim flagrant me nenin 4 të Marrëveshjes së shkurtit BE/SHBA për Rrugën drejt Normalizimit ndërmjet Kosovës dhe Serbisë. Vërejtjet e Daçiqit në Këshillin Ministror të OSBE-së në Shkup javën e kaluar shkojnë përtej retorikës zgjedhore. Ato janë deklarata të qarta të politikës së kahmotshme serbe. Zyrtarët e SHBA/BE: kini parasysh.”, është shprehur profesori amerikan.

  • Joseph: Me propozimin e ri është përjashtuar modeli i Republikës Serbe

    Joseph: Me propozimin e ri është përjashtuar modeli i Republikës Serbe

    Profesori në Universitetin “Johns Hopkins” në Uashington, Edward Joseph në një lidhje të drejtpërdrejtë për “Lajmet e fundit” në RTK ka thënë se me propozimin e ri të draft-statutit të Asociacionit është eliminuar modeli i Republikës Serbe në Kosovë.

    “Me atë që kam dëgjuar unë, edhe pse nuk është gjë formale, propozimi i SHBA-së dhe BE-së e përmbyll këtë telashin mbi atë se a duhet të jetë Asociacioni në pajtim me vendimin e Gjykatës Kushtetuese. Sigurisht se duhet të jetë në pajtim me atë vendim dhe ky lloj misteri është sqaruar. Propozimi që është bërë është në pajtim me Kushtetutën e Kosovës dhe për aq sa kam kuptuar modeli i Republikës Serbe është lënë komplet jashtë. Në vend të këtij modeli është bërë një propozim krejt i ri, praktik, i arritshëm dhe që përmbush standardet kushtetuese dhe është në përputhje me atë kolumnen që është shkruar nga Derek Chollet dhe Gabriel Escobar”, ka thënë Joseph.

    Ai tutje ka thënë se jo detyrimisht duhet të publikohet tani draft-statuti i Asociacionit të Komunave me shumicë serbe, nëse qëllimi është që të arrihet një lloj marrëveshje e avancuar përtej asaj që ekziston.

    “Nganjëherë dokumentet duhet të mbahen të fshehta, larg publikut derisa është në negocim e sipër. Pra nuk është se detyrimisht duhet të publikohet. Pyetja është se çfarë do të jetë pozicioni përfundimtar i SHBA-ve dhe BE-së në veçanti dhe pastaj shteteve kyçe siç janë Franca, Gjermania, Italia dhe cili do të jetë pozicioni kur bëhet fjalë për Serbinë. Refuzimi i presidentit të Serbisë për ta nënshkruar marrëveshjen dhe pastaj refuzimi për ta zbatuar atë marrëveshje që e ka pranuar në Bruksel dhe Ohër”, ka theksuar profesori Joseph.

    Ai tutje ka thënë se më 6 tetor ia ka parashtruar pyetjen emisarit Lajçak në Malin e Zi se pse nuk e shfrytëzoni mundësinë, sidomos pas agresionit mbi Kosovën më 24 shtator në Banjskë.

    “Pse të mos përdoret kjo gjë dhe t’i prezantohet Beogradit propozimi merre ose lëre. Këtu Serbia vihet para pozicionit që ta pranojë plotësisht se do ta përmbush obligimin e saj ndaj Kosovës, që ka të bëjë me njohjen de-facto, njohjen e dokumenteve dhe simboleve dhe të mos e kundërshtojë anëtarësimin e Kosovës në organizatat ndërkombëtare. Pra pse të mos shfrytëzohet kjo lloj përparësie kur Beogradi dhe presidenti Vuçiq është në situatë të brishtë. Këtë pyetje ia kam bërë Lajçakut kur ai ishte në Malin e Zi muajin e kaluar. Ai nuk dha përgjigje publike, por pashë disa elemente të asaj që unë kam vërejtur në atë dokument të QUINT-it”, ka shtuar Joseph.

    Sa i përket takimit të nesërm të Lajçakut me partitë opozitare, ai ka thënë se kjo “është gjë e mirë që partitë opozitare të jenë pjesë e procesit dhe një hap i rëndësishëm për Republikën e Kosovës”.

    Sipas tij tani çështja është nëse ekziston tashmë vullneti politikë në SHBA dhe BE që t’i bëjnë presion palëve dhe ta përfundojnë këtë marrëveshje njëherë e përgjithmonë.

    “Më 26 tetor pas takimeve në Bruksel, Kosova është deklaruar se ka kërkuar nënshkrimin e dokumenteve nga Serbia. Unë besoj se kjo është kërkesë e arsyeshme në cilindo kontekst. Për mua kjo ishte kërkesë shumë e arsyeshme dhe SHBA dhe BE duhet të insistojnë te Serbia që ta nënshkruajë këtë dokumentet dhe dy dokumentet tjera të dakorduara më parë dhe përfundimisht të ndalet kjo lojë. A është marrëveshja që secila palë, Kosova dhe Serbia, duhet ta formalizojnë atë dhe të thonë ‘po kjo është ajo marrëveshje’. Si mund t’i besoj dikush fjalës së Serbisë se do të implementojë një marrëveshje e cila i ka këto elemente të rëndësishme të njohjes brenda – siç është mos kundërshtimi i anëtarësimit të Kosovës në organizatat ndërkombëtare. Si mund të besohet kjo kur presidenti Vuçiq nuk e nënshkruan këtë”, ka nënvizuar Joseph.

  • Joseph paralajmëron Zelenskyn: Mos bjerë në grackën e Vuçiqit, flet marrëzi për “neutralitetin”

    Joseph paralajmëron Zelenskyn: Mos bjerë në grackën e Vuçiqit, flet marrëzi për “neutralitetin”

    Analisti amerikan dhe ligjëruesi i Universitetit të “Johns Hopkins”, Edëard Joseph ka folur për takimin e presidentit ukrainas Volodymyr Zelensky dhe atij serb, Aleksandër Vuçiq. Ai ka paralajmëruar Zelenskyn se do të dëgjojë shumë marrëzi për gjoja ‘neutralitetin’ serb ndaj agresionit rus kundër Ukrainës.

    Ai i ka kërkuar po ashtu Zelenskyt që të mos bjerë në grackën e përpjekjes për të kërkuar mbështetjen e Vuçiqit, në takimin e tyre kokë më kokë.

    “Marrëdhënia e Vuçiqit me Rusinë – dhe fuqia e tij – mbështetet në izolimin e Kosovës. Si Rusia ashtu edhe Serbia e shfrytëzojnë Kosovën për të mbështetur agresionin kundër vendit tuaj. Në të vërtetë, ministri i Mbrojtjes i Vuçiqit – dhe kreu i partisë së tij politike – sapo fajësoi promovimin perëndimor të pavarësisë së Kosovës për pushtimin e Rusisë në vendin tuaj. Këtu hyn Ukraina”, ka thënë analisti amerikan në rrjetin social “X”, shkruan KosovaPress.

    Sipas tij, marrëdhëniet Beograd-Moskë prishen kur asnjë kryeqytet nuk mund ta izolojë Kosovën.

    “Njohja e Kosovës nga Kievi do të katalizojë 4 shtetet jonjohëse të NATO-s që të ndjekin shembullin. Siç e dini, rruga për anëtarësimin në NATO është çelësi. Pasi të përfundojë izolimi ruso-serb i Kosovës, është fundi i lojës për sharadën e Vuçiqit. Beogradi do të ketë vetëm një opsion: atë që ju dhe qytetarët tuaj e keni zgjedhur, të mirëpresë dhe pranojë NATO-n dhe BE-në. Një zgjidhje përfundimtare dinjitoze e çështjes së Kosovës do t’i shkaktojë një goditje të madhe Putinit”, ka shkruar ai mes tjerash.

    “President Zelensky, ji i gatshëm të dëgjosh shumë marrëzi për “neutralitetin” serb ndaj agresionit rus kundër vendit tënd. Siç e dini, e vetmja gjë më e keqe se neutraliteti është neutraliteti i rremë. Serbia jo vetëm që refuzon të zbatojë sanksione ndaj Rusisë, por Beogradi shpërfill hapur politikën e BE-së duke mirëpritur mediat RT dhe Sputnik, duke përkrahur narrativat pro-ruse në të gjithë rajonin. Vuçiq ka lënë në krye të inteligjencës bashkëpunëtorin e Rusisë, të sanksionuar nga SHBA, Vulinin”, ka shkruar Joseph.

    Sipas tij, Vuçiq dhe Vulin e dinë me siguri se sa municione serbe shkojnë në Ukrainë.

    “A e dini se sa municione serbe mbërrijnë në Rusi? Presidenti dhe kryeministri serb pranojnë se votat për rezolutat e Asamblesë së Përgjithshme të OKB-së që dënojnë Rusinë kanë të bëjnë me ruajtjen e pretendimit të Serbisë ndaj Kosovës – nuk kanë të bëjnë me solidaritetin me Ukrainën. Serbia anashkaloi Samitin e Platformës së Krimesë me më shumë se 40 vende, duke ekspozuar ‘shqetësimin’ mashtrues për sovranitetin e Ukrainës. Serbia ka dyfishuar naftën ruse, duke ndërtuar një tubacion të ri me Hungarinë. Nëse vendi juaj, Ukraina, përfundon tranzitin e gazit rus në Hungari, Beogradi do ta zëvendësojë atë me gazin rus. E shikoni? Serbia ruan marrëdhëniet e saj energjetike me Rusinë, ashtu si Vuçiç e ruan marrëdhënien e tij me Putinin. Dikush që është ‘neutral’ do të kishte qëndruar i qetë gjatë kryengritjes së Ëagnerit; në vend të kësaj, Vuçiç përkrahi “reagimin e vendosur, të qartë dhe me vullnet të fortë” të Putinit, duke pretenduar se vetëm Putini mund të kishte pasur sukses. Nuk është çudi që Rusia gëzon mbështetje në Serbi”, ka shkruar ai.

  • Joseph: Amerika po e mbështet autonominë serbe si gur të shenjtë për mbylljen e çështjes së Kosovës

    Joseph: Amerika po e mbështet autonominë serbe si gur të shenjtë për mbylljen e çështjes së Kosovës

    Analisti amerikan i politikës së jashtme Edward Joseph kas reaguar ashpër ndaj siç thotë ai mbështetjes dhe butësisë që po tregohet ndaj presidentit serb Aleksandar Vuçiq nga ndërkombëtarët.

    Sipas tij, dhënia e asociacionit për serbët e Kosovës, pa avancimin e njohjes së Kosovës nga serbët dhe nga aleanca e plotë e NATO-s, është një propozim zor i arritur.

    “Zyrtarët amerikanë mbështesin autonominë serbe si gur të shenjtë për mbylljen e çështjes së Kosovës. Në realitet, dhënia e asociacionit për serbët e Kosovës, pa avancimin e njohjes së Kosovës nga serbët dhe nga aleanca e plotë e NATO-s, është një propozim pothuajse i paarritshëm”, ka shkruar analisti në Twitter.

    Reagimi i tij vjen pas një teksti të publikuar në Foreignpolicy, ku thuhet se Amerika po krijon kriza në Kosovë.

    “Nëse dikush mund ta kuptojë përplasjen e shëmtuar dhe të panevojshme mes Shteteve të Bashkuara dhe Kosovës, ai është Volodymyr Zelensky. Kërkojini presidentit ukrainas t’u japë rusëve etnikë autonomi dhe Zelensky do të bëjë menjëherë tre pyetje: A do të pranojnë rusishtfolësit që të jetojnë në Ukrainë, jo në Rusi? A do ta njohë Rusia sovranitetin dhe integritetin territorial të Ukrainës? Dhe a do të na lejojë përfundimisht dhënia e autonomisë të anëtarësohemi në NATO?”, thuhet në hyrjen e këtij teksti.

  • Joseph: Kurti e befasoi Vuçiqin kur e pranoi Asociacionin

    Joseph: Kurti e befasoi Vuçiqin kur e pranoi Asociacionin

    “Është e qartë se Kurti ishte i pamatur në lëvizjet e tij operacionale në veri, sfidues kur ishte fjala për bashkësinë ndërkombëtare dhe provokues kur bëhej fjalë për bashkëqytetarët e tij, serbët e Kosovës.”.

    Kështu ka thënë në një intervistë për “Demostat” profesori amerikan në John Hopkins University, Edward Joseph, teksa ishte duke i komentuar veprimet e fundit në veri të vendit të kryeministrit, Albin Kurti.

    “Tash veç le të imagjinojmë një lider më bashkëpunues në Prishtinë. Në fakt s’kemi pse ta imagjinojmë; ka pasur një lider më bashkëpunues. Emri i tij ishte Avdullah Hoti. Në shtator të 2020-ës, ai madje nënshkroi edhe Marrëveshjen e Uashingtonit në Shtëpinë e Bardhë, bashkërisht me Aleksandër Vuçiqin. Në një pikë, ai madje edhe u pajtua për ta vendosur në agjendë edhe themelimin e Asociacionit të Komunave të banuara me shumicë serbe”, ka shtuar Joseph.

    Ndërkaq, sa i përket Asociacionit, Joseph ka theksuar se Kosova e ka obligim themelimin e Asociacionit por që BE dhe ShBA të detyrojnë dy palët që të bien dakord për zbatimin e Marrëveshjes Bazë.

    “Asociacioni është i një rëndësie thelbësore për përmirësimin e Marrëveshjes Bruksel-Ohër ndërmjet Serbisë dhe Kosovës – dhe po ashtu është edhe zbatimi i obligimeve të marra nga Serbia, duke përfshirë mos bllokimin e Kosovës në organizatat ndërkombëtare. Prandaj është e një rëndësie thelbësore që BE dhe SHBA të detyrojnë Serbinë dhe Kosovën të bien dakord për një rend të hekurt të zbatimit të Marrëveshjes. Secila palë duhet të ketë garanci që pala tjetër do ta zbatojë marrëveshjen”, ka theksuar Joseph.

    Ndërkaq, themelimin e Asociacionit pa grancionin se Serbia do të njohë Kosovën dhe pa hapjen e integuese të Kosovës në NATO është një propozim i vështirë.

    “Unë mund ta shpjegoj këtë. Po, në vitin 2013 Kosova ka marrë obligim me Asociacionin. Kurti në shkurt e ka befasuar Vuçiqin duke e pranuar këtë detyrim.

    Por cila është natyra e këtij detyrimi? Kjo është ajo që kuptohet keq.

    Në artikullin tim të fundit të FP, “Shtetet e Bashkuara po krijojnë krizën e Kosovës”, shpjegova se autonomia është një çështje e statusit përfundimtar. E krahasova situatën me Ukrainën. Imagjinoni që SHBA dhe BE i kërkojnë presidentit Zelensky t’u japë autonomi rusëve etnikë në Donbass dhe Krime. Zelensky do të bëjë menjëherë tre pyetjet e përmendura në paragrafin e parë të artikullit tim të FP: a do të pranojnë këta rusë etnikë të jetojnë në Ukrainë dhe jo në Rusi? A do ta njohë Rusia Kosovën? Dhe a do të na lejojë përfundimisht dhënia e autonomisë “ne” (Ukraina) të hyjmë në NATO?

    E shihni se si vlen kjo për Kosovën dhe Serbinë? Nuk është e qartë nëse SHBA-ja dhe BE-ja mund t’i garantojnë Kosovës ndonjë nga ato pika themelore që Zelenski – ose ndonjë lider, do të kërkonte në një situatë të ngjashme.

    E përsëris: autonomia është çështje e statusit përfundimtar. Kjo është ajo që merr pakica në këmbim të heqjes dorë nga separatizmi – dhe zakonisht është një lëshim që i bëhet një shteti irredentist fqinj, siç është Serbia, kur heq dorë nga pretendimi i tij për sovranitet.

    Në këtë rast, edhe Ukraina edhe Kosova e dinë se e vetmja garanci reale për sovranitetin dhe integritetin territorial është anëtarësimi në NATO. Jo mbrojtjen e NATO-s përmes KFOR-it, por anëtarësimin në NATO, në rastin e Kosovës”, ka theksuar Joseph.

    “A do të thotë kjo se Kosova nuk ka obligim të themelojë një Asociacion? Sigurisht që jo. Kosova e ka këtë obligim që buron nga viti 2013. Por fakti mbetet se autonomia është e lidhur me statusin përfundimtar. Sa më shumë pasiguri të ketë për statusin përfundimtar të Kosovës dhe aftësinë e Kosovës për t’u anëtarësuar në NATO, aq më e vështirë është të pajtohet për Asociacionin”.

  • “ShBA-ja po krijon një krizë në Kosovë”, ish-ambasadori Greg Delawie shpërndan artikullin e Edward Joseph

    “ShBA-ja po krijon një krizë në Kosovë”, ish-ambasadori Greg Delawie shpërndan artikullin e Edward Joseph

    Ish-ambasadori i Shteteve të Bashkuara në Kosovë, Greg Delawie, ka shpërndarë artikullin e ish-zëvendësshef i misionit të OSBE-së në Kosovë, Edward Joseph, i cili mendon se SHBA-ja po krijon një krizë në Kosovë.

    Delawie i cili kishte shërbyer si diplomat amerikan në Kosovë nga viti 2015 deri më 2018, e ka shpërndarë në rrjetin e tij social “Twitter”.

    Në tekstin që e ka shpërndarë Delawie, Joseph shkroi se mos-kritika ndaj presidentit të Serbisë, Aleksandar Vuçiq e ka bërë atë që të ringjall nacionalizmin e “Serbisë së madhe” që thotë se e solli Beogradin në konflikt me fqinjët e tij dhe NATO-n në vitet 1990.

    Ai këtë e bazon në deklarimet e fundit të zyrtarëve amerikanë ndaj kryeministrit Albin Kurti, pas veprimeve në veri të vendit.

  • Joseph: Serbia shkeli zotimet e saj nga Marrëveshja e Ohrit

    Joseph: Serbia shkeli zotimet e saj nga Marrëveshja e Ohrit

    Profesori amerikan, Edward Joseph e ka vlerësuar një hap jashtëzakonisht pozitiv për Kosovën dhe qytetarët e saj miratimin e aplikimit të saj në Këshillin e Evropës. Ai në një intervistë për magazinën “Lajmet e Fundit” në RTK, ka thënë se për herë të parë kemi parë se shtetet anëtare të BE-së dhe NATO-s që nuk e kanë njohur ende pavarësinë e Kosovës, nuk e kanë penguar atë, derisa Serbia me votën kundër ka shkel zotimet e Marrëveshjes së Ohrit.

    “Shtetet si Greqia, Sllovakia dhe Ukraina, e cila ka një rol kyç nuk votuan asnjëra kundër Kosovës. Ato abstenuan dhe në këtë mënyrë nuk e kundërshtuan votën e Këshillit të Evropës, duke i mundësuar Kosovës që të ecë tutje dhe kjo është shumë me rëndësi. Është një hap pozitiv dhe shumë i madh i Kosovës drejt BE-së dhe NATO-s dhe me dobi praktike për qytetarët shqiptarë dhe serbë të Kosovës”, ka theksuar Joseph.

    Ai ka thënë se nuk ka qenë i befasuar me votën kundër të Hungarisë, pasi sipas tij presidenti i saj është një lider autoritativ, i cili po luan lojë të dyfishtë, por ka thënë se ky kundërshtim hungarezë nuk do të ketë ndonjë rol në fund të procesit.

    Profesori Joseph tutje ka thënë se Serbia me Marrëveshjen e Ohrit është dakorduar që të mos pengojë anëtarësimin e Kosovës në mekanizmat evropianë dhe rasti i votës kundër në Këshillin e Evropës paraqet shkelje të zotimeve të saj.

    “Shefi i Politikës së Jashtme të BE-së, Josep Borrell duhet të komunikojë drejtpërdrejt me Madridin zyrtar, Bukureshtin dhe Nikozinë dhe zyrtarisht t’ua komunikojë se Serbia e ka shkelur zotimin e saj për të mos e penguar Kosovën në anëtarësim në mekanizmat evropian”, ka shtuar profesori amerikan.

    Ai tutje ka thënë se interesi bazë i presidentit serb, Aleksandar Vuçiq nuk është mirëqenia e serbëve të Kosovës. “…sepse sikur do të ishte i interesuar për mirëqenien e serbëve ai do të përpiqej që t’i zgjidhte këto çështje. Përfituesit e vërtetë të anëtarësimit të Kosovës në Këshillin e Evropës përveç shqiptarëve do të jenë serbët e Kosovës sepse do të kenë qasje në drejtësinë evropiane”, është shprehur Joseph.

    Miratimi i aplikimit të Kosovës në Këshillin e Evropës sipas profesorit amerikan paraqet një tregues pozitiv për mundësinë e Kosovës për të avancuar tutje në rrugëtimin e saj evropian. Por, ai ka thënë se Kosova e ka obligim që ta pranojë dhe ta shtyjë përpara formimin e Asociacionit.

    “E di që është diçka e vështirë por është një obligim nga marrëveshjet paraprake dhe nga ato të fundit në Bruksel dhe Ohër. Duhet të themelohet Asociacioni në mënyrë të shpejt, të drejtë dhe efektiv, duke bashkëpunuar me SHBA-në dhe BE-në, duke siguruar se nuk ka ndonjë kërcënim për funksionalitetin e Kosovës dhe tërësinë e saj”, ka nënvizuar Joseph.

    Ai nuk e ka vlerësuar aq shqetësues faktin se në grupin menaxhues, i cili do të hartojë draft-statutin e Asociacionit nuk është asnjë shqiptar. “Sa i përket dinamikave konkrete se kush do të propozojë Asociacionin është me pak e rëndësishme sesa përmbajtja e statutit. Qeveria e Kosovës është duke punuar ngushtë me BE-në dhe SHBA-në sa i përket përmbajtjes së statutit. Ajo duhet të jetë e tillë që t’i adresojë çështjet e vërteta të qytetarëve të saj dhe t’i mundësojë vetës të funksionojë mirë dhe mbarë. Kjo është në interes të çdo qytetari. Një Asociacion që i bën të ndihen mirë e të sigurt”, ka thënë profesori amerikan.

    Ai tha se është i vetëdijshëm se për palën shqiptare ndoshta paraqet shqetësim fakti se nuk është asnjë anëtar i qeverisë së Kosovës në këtë grup menaxhues, por ka thënë se nuk e sheh si diçka të patejkalueshme.

    “Nëse ekipi menaxhues ka serbë, ata do të propozojnë një version, i cili ndoshta mund të jetë i papranueshëm por nuk përfundon e tëra me kaq. Para takimit më 2 maj Kosova mund t’i propozojë çështjet dhe shqetësimet e saj. Por Kosovës i takon të jetë konstruktive, të ketë interesim për mbrojtje të rendit të saj kushtetues, tërësisë së saj, kufijve të saj dhe të mos i kompremtojë ato në asnjë mënyrë”, ka thënë Joseph, sipas të cilit statuti i Asociacionit duhet të jetë në harmoni me Kushtetutën e Kosovës dhe interesat e qytetarëve të saj.

    Profesori Joseph ka thënë se me formimin e Asociacionit, Beogradi zyrtar më nuk do të ketë mundësi të sabotojë dhe të bllokojë zgjedhjet, teksa Kosova do të ketë një personalitet të saj të formuar ndërkombëtarisht dhe do të ecë përpara drejt integrimeve të saj evropiane.

    Sa i përket takimit të liderëve më 2 maj në Bruksel, Joseph ka thënë se me deklarimet e fundit Vuçiq i ka humbur nervat dhe presidentja Osmani dhe kryeministri Kurti duhet t’i ruajnë nervat dhe të jenë konstruktiv para faktorit ndërkombëtar.

  • ​Joseph: Deklaratat e Vuçiqit janë të papranueshme, kujdes me “23 prillin”

    ​Joseph: Deklaratat e Vuçiqit janë të papranueshme, kujdes me “23 prillin”

    Profesori amerikan, Edward Joseph, i konsideron të papranueshme deklarimet e presidentit të Serbisë se nuk do të zbatojë të plotë marrëveshjen e Brukselit dhe aneksin e saj që u arrit në Ohër. Eksperti i politikës së jashtme dhe njohësi shumë i mirë i Ballkanit, konsideron se Kosova e Serbia nuk janë afër marrëveshjes finale.

    Në një intervistë për KosovaPress, Joseph deklaron se liderët e Kosovës duhet të mendojnë edhe për pasojat e mbajtjes së zgjedhjeve në veri të parapara të mbahen të dielën e ardhshme.

    Ai thekson se Serbisë do t’i leverdiste nëse në veri do të ketë incidente dhe mospjesëmarrje në zgjedhjet e 23 prillit.

    “Çfarë do ta dëmtonte Kosovën, një lloj loje që dëshiron Serbia, të ketë një lloj konfrontimi, mendoni për atë se çfarë do të përfitonte më shumë Aleksandër Vuçiq. Ai do të përfitonte më së shumti nëse mbahen zgjedhjet dhe ka incidente”, thekson ai.

    Profesori amerikan nga universiteti “Johns Hopkins”, Edward Joseph thotë për KosovaPress se marrëveshje e Ohrit është e rëndësishme, mirëpo ka shumë pengesa.

    Eksperti për politikë të jashtme nuk beson se Kosova e Serbia janë afër marrëveshjes finale.

    Ai thotë se gjërat do të ishin shumë ndryshe në kuptim pozitiv nëse të gjithë anëtarët e Bashkimit Evropian dhe ata të NATO-s do ta njihnin pavarësinë e Kosovës.

    Për më tepër, Joseph thekson se Kosova nuk do të arrijë të anëtarësohet NATO dhe Bashkimin Evropian pa integrimin e plotë të serbëve.

    Komente të parpanueshme i konsideron deklarimet e presidentit të Serbisë, Aleksandër Vuçiq, që thotë se nuk do të zbatojë pjesët e marrëveshjes që kanë të bëjnë me anëtarësimin e Kosovës në Kombet e Bashkuara.

    “Këto lloj komente janë krejtësisht të papranueshme, sepse sipas BE-së dhe SHBA-së, është ligjërisht e obligueshme”, deklaron profesori amerikan.

    Kosova dhe Serbia u pajtuan me 18 mars në Ohër për aneksin e zbatimit të marrëveshjes që u arrit në Bruksel, ani pse nuk pati nënshkrim të saj. Në kuadër të saj, palët u pajtuan për të miratuar deklaratën për personat e zhdukur. E po ashtu për të zbatuar nenin 7 që Kosova të nisë menjëherë negociatat në kuadër të dialogut për përcaktimin e aranzhimeve dhe garancive specifike, që sigurojnë një nivel të duhur të vetëmenaxhimit për komunitetin serb në Kosovë.

  • Joseph: Në marrëveshjen e Ohrit ka detaje të paspeficikuara

    Joseph: Në marrëveshjen e Ohrit ka detaje të paspeficikuara

    Instituti Kosovar për Kërkime dhe Zhvillim të Politikave, në bashkëpunim me Universitetin “Johns Hopkins”, kanë organizuar tryezën me diskutimin për marrëveshjen mes Kosovës e Serbisë ku u tha se aneksi i marrëveshjes ka paqartësi dhe se diskursi politik nuk ka ndryshuar.

    Analisti amerikan dhe ligjëruesi në Universitetin “Johns Hopkins”, Edward Joseph tha se marrëveshja e Ohrit është ligjërisht e obligueshme dhe se fokusi duhet të jetë në zbatim.

    Po ashtu, ai theksoi se në këtë marrëveshje ka shumë boshllëqe dhe detaje të paspecifikuara.

    “Tani, këtu qëndrojmë formalisht, realiteti joformal dhe kontekstual, i njohur nga të gjithë në këtë sallë, dhe nga miqtë dhe kolegët tanë gjetkë në Kosovë dhe në Beograd, të gjithë i dinë sfidat e mëdha. Numër një, paqartësia e vetë marrëveshjes. Fakti që ka boshllëqe, ka elementë që nuk specifikohen, detaje të paspecifikuara, paqartësi që krijojnë pikëpyetje, ky është numri një”.

    “Numri dy është, natyrisht, statusi i marrëveshjes, fakti që ajo nuk u nënshkrua, fakti që nuk pati shtrëngim duarsh mes palëve dhe kontekstualisht, fakti që dëgjojmë një rrjedhë negativiteti për marrëveshjen, që sigurisht nuk është inkurajuese, dhe jo ajo që është standarde në çdo negociatë të suksesshme ndërkombëtare”, ka shtuar ai.

    Në anën tjetër, drejtori i Institutit Kosovar për Kërkime dhe Zhvillim të Politikave, Lulzim Peci theksoi se shpreson se për 100 ditë, të dyja vendet do të kompletojnë obligimet e tyre.

    Për normalizimin e marrëdhënieve dhe marrëveshjen finale ka folur edhe Sonja Biserko nga Komiteti i Helsinkut për të drejtat e njeriut në Serbi.

    “Sa i përket Serbisë, do të thosha, meqë u përmend pajtimi, problemi është se kemi nacionalizëm dhe kujtesë kulturore… Nuk mendoj se do të ketë konflikt, edhe pse ka potencial për një gjë të tillë… Ne jemi në një lloj okupimi nga mediat e Vuçiqit dhe OJQ-të e tij”, ka deklaruar ajo.