ATV

Tag: Ballina

  • Selmanaj tregon si u sulmua ura nga NATO deri sa serbët po i transportonin të burgosurit shqiptarë, aty ishte edhe Ukshin Hoti

    Selmanaj tregon si u sulmua ura nga NATO deri sa serbët po i transportonin të burgosurit shqiptarë, aty ishte edhe Ukshin Hoti

    Ish i burgosuri politik, Rasim Selmanaj, në emisionin CONTEXT në ATV, tregoi se si ishte goditur ura nga bombardimet e NATO-s deri sa po transportoheshin për në Kosovë bashkë me të burgosurit e tjerë, në mesin e të cilëve ishte edhe Ukshin Hoti.

    “Kur kemi mbërri te ura e Llozicës tre autobusë kemi qenë, e kanë goditurën edhe autobusi i parë mbërri një ve e kalu aty edhe në atë autobus nëse nuk gaboj ka qenë edhe Ukishin Hoti, ndërsa dy autobusë të tjerë mbetëm këtë pjesën këndej ure. Ka qenë një tragjedi do të thosha në atë rast sepse ne u rrezikum të gjithë. Caqet e bombarderëve të NATO-s e goditën një autoblindë në mes të dy autobusëve ku isha edhe unë aty edhe normal që aty nëse nuk gaboj kanë qenë tre oficerë dhe ata shkuan për “anena”, e madje të gjithë gardianët që ishin ata edhe nga paniku kaluan disa në rrugën në pjesën e majit disa në të djathtën dhe ne kemi qenë të lidhur për këto karrige të autobusëve te pjesa e hekurit dhe unë dy kemi qenë për një prange”, tregoi Selmanaj. /atvlive.tv

  • Projektligji për pagën minimale mbetet pezull, tash e një vit asnjë hap konkret nga Qeveria

    Projektligji për pagën minimale mbetet pezull, tash e një vit asnjë hap konkret nga Qeveria

    25 kërkesat që ia dërguan kryeministrit Albin Kurti për takim, i kanë vendosur në një mur.

    Përfaqësues të Sindikatës së Punëtorëve të sektorit Privat nuk morën asnjë përgjigje nga Qeveria, për t’u takuar e për të diskutuar rreth projektligjit për pagën minimale.

    Zvarritjet për futjen e këtij ligji në fuqi, sindikalistët po i konsiderojnë të qëllimshme nga na e Qeverisë.

    “Nuk e kanë parë të arsyeshme të takohen me neve, që në njëfarë forme neve na kanë lënë duart e lira, por qëndrimi i Federatës Sindikale është gjithçka që është nën 450 euro, ata këtë pagë mund ta mbajnë për vete, por jo edhe për neve”, tha Azemi.

    Ani pse në muajin e ardhshëm bëhet 1 vit prej kur në Kuvend është votuar në parim projektligji i cili i hap rrugë rritjes së pagës minimale, që nga atëherë nuk ka pasur ndonjë hap konkret për miratimin e tij.

    Për këtë opozita kërkon bashkëpunim, por thotë se paga prej 250 eurosh do të kundërshtohet edhe nga ta.

    “Lufta imagjinare e kësaj Qeverie me kategori të caktuara të kësaj shoqërisë tonë, me sindikata me kategori të caktuara të dala nga lufta, duhet të kalohet, nuk ka njeri normal që kishte me thanë që është e merituar paga minimale 250 euro”, tha deputeti i PDK-së, Ferat Shala.

    Paga minimale në Kosovë nga 170 sa është aktualisht, me ligjin e ri të propozuar nga Qeveria parashihet të bëhet 264 euro bruto, apo 250 euro neto.

    Në këtë ligj nuk është paraparë përfshirja e veteranëve, të cilët përmes protestave kanë kërkuan përfshirje në Projektligjin për Pagën Minimale. /atvlive.tv

  • Chollet flet në telefon me Kurtin e Vuçiqin për betimin e kryetarëve në veri

    Chollet flet në telefon me Kurtin e Vuçiqin për betimin e kryetarëve në veri

    Një ditë para se kryetari i zgjedhur i Mitrovicës së Veriut, Erden Atiq, të betohet solemnisht, Këshilltari i Lartë në Departamentit amerikan të Shtetit, Derek Chollet, është aktivizuar.

    Për dialogun me Serbinë dhe zgjedhjet lokale të mbajtura në katër komunat veriore, këshilltari amerikan bisedoi në telefon me kryeministrin Albin Kurti.

    Në komunikatën e lëshuar për media, Zyra e Kryeministrit theksoi se sa i përket dialogut, në fokus është Marrëveshja e 27 shkurtit për normalizim të marrëdhënieve, e arritur mes Kosovës dhe Serbisë.

    “Folën edhe për situatën në katër komunat në veri të Kosovës, pas zgjedhjeve të 23 prillit dhe për finalizimin e procesit zgjedhor, me rastin e mbajtjes së seancave konstitutive dhe betimit të kryetarëve të zgjedhur. Institucionet e Republikës së Kosovës mbesin të përkushtuara që të garantojnë kushtetutshmërinë dhe ligjshmërinë, dhe në të njëjtën kohë të sigurojnë mbarëvajtjen e shërbimeve ndaj qytetarëve”, thuhet në komunikatë.

    Shmangia e konfliktit dhe normalizimi i marrëdhënieve ishin tema edhe gjatë bisedës që një ditë më parë, Derek Chollet e pati me presidentin e Serbisë, Aleksandar Vuçiq.

    Sipas Presidencës serbe, zyrtari i lartë amerikan sërish ka shprehur mbështetjen e SHBA-së për procesin e dialogut, që ndërmjetësohet nga Bashkimi Evropian.
    Ndërkaq, nga Prishtina, ambasadori i SHBA-së, Jeffrey Hovenier, ka thënë se duhet të shmangen veprimet që nxisin tensione në veri.

    Pas takimit me kryeministrin Albin Kurti, ambasadori amerikan theksoi se nuk duhet të përdoret forca për të arritur qasje në ndërtesat e komunave në veri.

    “Unë i kam bërë disa komente dje. Ne folëm për të njëjtën gjë. SHBA-ja mendon që kjo gjë duhet të përfundojë, duhet të shmangen konfliktet dhe veprimet që çojnë në rritjen e tensioneve në veri. Ne nuk mendojmë që është ide e mirë që të përdoret forca për të arritur qasje në ndërtesat, që mund të mos jenë që qasshme”, tha Hovenier.

    Ndryshe nga Erden Atiq, që planifikon të betohet nesër, tre kryetarët e tjerë të dalë nga zgjedhjet me pjesëmarrje prej 3.5%, nuk dihet kur pritet ta nisin punën. /atvlive.tv

  • Prokuroria nis hetimet për objektin e “uzurpuar” në qendër të Prishtinës

    Prokuroria nis hetimet për objektin e “uzurpuar” në qendër të Prishtinës

    Kërkesat e ministrit të Bujqësisë, Faton Peci, për lirimin e hapësirave të uzurpuara në qendër të Prishtinës, kanë filluar të merren parasysh nga institucionet kompetente.

    Prokuroria Themelore ka nisur hetimet për një pjesë të objektit që gjendet në rrugën “Dëshmorët e Kombit” të kryeqytetit.
    Për ATV-në, kjo u konfirmua nga zëdhënësja e prokurorisë, Laureta Ulaj.

    “Ju njoftojmë se Prokuroria Themelore në Prishtinë ka autorizuar Policinë për grumbullimin e informatave dhe provave lidhur me këtë çështje, andaj në bazë të gjetjeve do të veprojë tutje”, tha Ulaj.

    Në hulumtimin e Ministrisë së Bujqësisë, të siguruar nga ATV-ja, është evidentuar se subjekti tregtar “ALBI MARKET” ushtron veprimtarinë në katin përdhese dhe sipas deklaratës së menaxheres, për hapësirën paguhet qira, por jo Ministrisë së
    Bujqësisë, e cila është pronare e objektit.

    Në raportin që e posedon televizioni, është konstatuar se në oborrin e objektit skaj rrugës “Henri Dunan” me sipërfaqe prej 600m² është ndërtuar edhe një objekt tjetër i cili shfrytëzohet si depo. Ndërsa, në katin e parë tashmë është hapur edhe një kafene.

    Në kuadër të kësaj ndërtese janë të privatizuara edhe dy njësi banesore, të cilat janë shndërruar në lokale afariste, duke u zgjeruar edhe në pjesën tjetër të objektit ekzistues me sipërfaqe prej 160m².

    Për lirimin e hapësirës në fjalë, ministri Faton Peci ka kërkuar ndihmë edhe nga kryetari i Prishtinës.

    “Në vazhdimësi në tre muajt e fundit, ne kemi kërkuar, madje kemi pasë edhe një dakordim me kryetarin Përparim Rama, që të ndërhyjë përmes inspektoratit, por siç duket niveli i shërbyesve civilë i Komunës së Prishtinës është thellë i përfshirë në këtë rast, kjo për faktin se edhe në kërkimin e materialeve që e kërkojmë, thjesht ata ofrojnë dokumente jorelevante dhe të pjesshme”, ka thënë Peci.

    Por, sipas nënkryetarit të Prishtinës, kjo nuk është çështje vetëm e inspektortatit të komunës.

    “Ky është një raport që u është dorëzu prokurorisë dhe organeve të tjera. Inspektoratit i duhen dokumente më të kompletuara. Prokuroria por edhe policia duhet t’i ndihmojnë komunës”, ka thënë nënkryetari i Prishtinës, Alban Zogaj.

    Ndërkohë, Prokuroria Themelore në Pejë, ditë më parë, ka ngritur aktakuzë për ndërtimet në pronën e Institutit për Hulumtime Bujqësore, në fshatin Stankaj të Rugovës. /atvlive.tv

  • ​Hovenier për kryetarët në veri: Të shmanget forca për hyrje në objektet komunale

    ​Hovenier për kryetarët në veri: Të shmanget forca për hyrje në objektet komunale

    Ambasadori amerikan në Prishtinë, Jeffrey Hovenier, ka deklaruar se duhet të shmanget çdo konflikt dhe përplasje që qon në rritjen e tensioneve me betimin e kryetarëve të rinj në veri.

    Ambasadori Hoveniver, pas takimit me kryeministrin, Albin Kurti, katha se Amerika nuk mendon se është ide e mirë që të përdoret forca për të arritur qasje në ndërtesat e komunave, shkruan Klankosova

    “I kam bërë disa komente edhe gjatë ditës së djeshme, të njëjtat i diskutova edhe sot. Shtetet e Bashkuara të Amerikës besojnë se kjo gjë duhet të ndodhë në një mënyrë që shmang konfliktet dhe përplaset që mund të qojnë në rritjen e tensioneve në veri. Ne jemi për zgjidhjen e kësaj çështjeje në mënyrë të mirë, ne nuk mendojmë që është ide e mirë që të përdoret forca për të arritur qasje në ndërtesat që mund të mos jenë të qasshme”, ka thënë Hovenier.

  • Gjykimi ndaj ish-krerëve të UÇK-së, dëshmitari i pestë i Prokurorisë thotë se ishte pjesë e UÇK-së

    Gjykimi ndaj ish-krerëve të UÇK-së, dëshmitari i pestë i Prokurorisë thotë se ishte pjesë e UÇK-së

    Mbrojtja e ish-krerëve të ushtrisë Çlirimtare të Kosovës(UÇK) ka filluar intervistimin e dëshmitarit të pestë të Zyrës së Prokurorit të Specializuar(ZPS).

    Dëshmitari i mbrojtur i cili mban kodin 3165 ka thënë se UÇK-së i ishte bashkuar në korrik të vitit 1998.

    Mbrojtja e ish-presidentit Hashim Thaçi, Albert Muskowitz, është interesuar të dijë nëse ky dëshmitar kishte marr ndonjë dokument që dëshmonte se ai ishte pjesë e UÇK-së.

    Sipas dëshmitarit, atij nuk i ishte dhënë ndonjë dokument i tillë.

    Avokati Moskowitz: Kur iu bashkëngjite UÇK-së, atë datë, atë mbrëmje a nënshkrove ndonjë gjë të vërtetoje që tani je ish anëtarë i UÇ?

    Dëshmitari: Po

    Avokati Moskowitz: A more ndonjë letërnjoftim, a ndonjë copë letër ku të thuhej që ti tani ishte anëtarë i UÇK-së?

    Dëshmitari: Unë kam dal në ora 2 të natës atë natës, kurse të nesërmen i kanë marr shënimet komandanti kush ka qenë aty.

    Avokati Moskowitz: Morën shënime por nuk të dhanë ndonjë kartelë, letërnjoftim ku thuhej dhe verifikohej se në vërtet ishte anëtar i UÇK. Nuk e vë në dyshim se ishte anëtar i UÇK, thjesht po përpiqem të kuptoj se a ka pas ndonjë gjë që e vërtetonte dhe t’i mund t’ua tregoje personave që unë tani jam anëtar i UÇK-së?

    Dëshmitari: Nuk ma kanë dhënë

    Avokati Maskowitz e ka pyetur dëshmitarin edhe për mënyrën se si e kishte siguruar uniformën.

    Lidhur me këtë, dëshmitari ka thënë se vetë e kishte blerën copën vetë për ta qepur uniformën.

    Avokati Moskowitz: Po uniformë, të dhanë ndonjë uniformë atë kohë?

    Dëshmitari: I kemi blerë vetë nuk ka pas në atë kohë, u dashtë me ble si ceradë kena ble kamuflazh dhe i kena ba veshë ushtarake.

    Avokati Moskowitz: Pra, nuk të dhanë para për ta blerë uniformën, e ke blerë vetë. Uniforma ishte e gatshme kur e bleve apo bleve copën dhe e qepe?

    Dëshmitari: Në atë kohë blejshim copa dhe i qepshim.

    Avokati Moskowitz: Nga e dije se çfarë cope të bleje, kishte ndonjë rregullore që të tregonte se çfarë cope duhet të bleje në verën e ‘98?

    Dëshmitari: Si cerada, ato i kena ble edhe ato i kena kep.

    Dëshmitari ka thënë se armë nuk i kishin dhënë, por atë e kishte siguruar nga një bashkëfshatar.

    Avokati Moskowitz: Kur iu bashkëngjite UÇK-së a të dhanë armë?

    Dëshmitari: Armën e kisha marr nga një bashkëfshatar

    Avokati Moskowitz: Si ndodhi që ky bashkëfshatari të dha armën e tij, po ai vetë nuk ishte në ushtri atë kohë?

    Dëshmitari: Po ish lodhë, ish mërzitë ku ta di unë dhe më tha kush kërkon për me dal muj me ia dhanë edhe me kam marr.

    Mbrojtësi i ish-presidentit ka thënë se meqenëse atyre që kyçeshin në UÇK nuk iu jepet ndonjë dokument që dëshmon se janë pjesëtarë të UÇK, copën për uniform mund ta blinte çdokush.

    Më pas dëshmitari tha se nuk beson që dikush ka blerë uniformë pa qenë pjesë e Ushtrisë Çlirimtare të Kosovës.

    “Duke pas parasysh që atyre që kyçeshin në UÇK nuk u jepnin ndonjë dokument, kjo tregon se çdo njeri po të donte mund të blinte copën të bënte uniformën edhe pa qenë në UÇK sepse gjërat ishin kështu jo zyrtare”, ka thënë avokati.

    Pas kësaj, seanca ka vijuar e mbyllur për publikun, me pyetjet e mbrojtjes së Thaçit.

    Dëshmitari me kodin 3165 ZPS-së ka filluar dëshminë e tij të mërkurën, ndërsa para tij janë dëgjuar katër dëshmitarë të tjerë të Prokurorisë.

    Të gjithë kanë dëshmuar nën masa mbrojtëse dhe në seancë të mbyllur për publikun.

    Ndërsa të mërkurën, trupi gjykues u ka kërkuar parashtrime palëve, der më 31 maj, në lidhje me hapat konkret që mund të merren për të siguruar që procedurat të jenë publike në shkallë më të lartë.

    Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.

    Gjatë krejt kësaj kohe, ish-presidenti Thaçi, ish-kryeparlamentarët Krasniqi dhe Veseli, si dhe ish-deputeti Selimi, po qëndrojnë në paraburgim në Hagë, ndërsa në paraqitjet e tyre para gjykatës ata janë deklaruar të pafajshëm.

  • Pula: Kosova rrezikohet nga projekti ”Nova Rusia”

    Pula: Kosova rrezikohet nga projekti ”Nova Rusia”

    Njohësi i çështjeve politike, Shqiprim Pula, në emisionin A23 në ATV, tha se Kosova rrezikohet nga projekti sllav që quhet “Nova Rusia”, projekt ky që është një platformë politike pothuajse 150 vite e vjetër.

    “Kosova gjendet në një situatë jo të mirë, në një situatë ku rrezikohet nga një projekt që quhet “Nova Rusia”, projekt i cili ka akterë të ndryshëm në etapa të ndryshme kohore dhe tani së voni kemi të bëjmë me akterë të Serbisë të cilët po e jetësojnë projektin e quajtur “Nova Rusia”, e që kanë një moto diku 150 vjeçare tashmë sepse kemi qasje në dokumente të tyre, në platformë politike të tyre që ka të bëjë me “Sllavizmi nuk ka fund askund””, tha Pula.

    Ai tha se bashkësia e komunave me shumicë serbe nënkupton betonizimin e shtetit serb brenda Kosovës.

    “Nuk duhet harrur dhe duhet të jemi shumë të vëmendshëm si qeveri, si institucione, në veçanti ato që janë përgjegjëse në procesin e dialogut, që të kenë kujdes në këtë drejtim sepse Kosova vërtetë rrezikohet madje unë do e quaja edhe nga terrorizmi politik që i bëhet shtetit të Kosovës nga spin doktorë të ndryshëm të cilët për të toleruar apetitet e shumta të Serbisë zyrtare kundrejt kombit shqiptar dhe shtetit të Kosovës në veçanti, insistojnë që të bëhet një bashkësi e komunave serbe dhe natyrisht edhe kisha serbe ortodokse në Kosovë që të dyja të kenë rolin, njëra e aspektit shpirtëror siç ata e proklamojnë me të madhe dhe tjetra në aspektin institucional në territorin e Kosovës”, tha Pula.

    Emisionin e plotë e gjeni në videon më poshtë:

  • Pula: Serbia tentoi të ndërtojë një reaktor bërthamor

    Pula: Serbia tentoi të ndërtojë një reaktor bërthamor

    Njohësi i çështjeve politike, Shqiprim Pula, në emisionin A23 në ATV, tha se Serbia kishte shprehur dëshirën për të krijuar një rotor bërthamor me ndihmën e Rusisë duke pretenduar që të marrë uraniumin e varfëruar në Kazakistan.

    “Serbia në vazhdimësi është parë si një shtet problematik, si një shtet që në çdo kohë mund të prodhojë rreziqe potenciale për rajonin dhe shto faktin këtu se ka informacione të mjaftueshme nga studiues të sigurisë ndërkombëtare me të cilët jam në kontakt për shkak të hulumtimeve që bëjmë se Serbia ka shprehur dëshirën për të krijuar një rotor bërthamor në Serbi me ndihmën e Rusisë dhe duke pretenduar që të marrë uraniumin e varfëruar në Kazakistan”, tha Pula.

    Ai tha se ky është një shqetësim jo vetëm në gjeopolitikën rajonale dhe më gjerë, duke shtuar edhe faktin që Serbia është vendi i vetëm në Evropë që nuk ka përkrahë asnjë lloj të sanksioneve ndaj federatës ruse.

    “Një gjë e tillë natyrisht që paraqet një shqetësim jo vetëm në gjeopolitikën rajonale dhe më gjerë, shto faktin këtu që Serbia është i vetmi shtet në Evropë që nuk ka përkrahë asnjë lloj të sanksioneve ndaj federatës ruse dhe të gjitha këto tolerime që i janë bërë Serbisë i kanë dhënë mundësinë që të përkëdhelet dhe të tolerohet në të gjitha pretendimet e saj politike dhe territoriale karshi Kosovës”, u shpreh Pula. /atvlive.tv

  • Del sondazhi: Serbia, kërcënimi më i madh për Kosovën

    Del sondazhi: Serbia, kërcënimi më i madh për Kosovën

    Një sondazh mbarëkombëtar në Kosovë nga Qendra për Perceptime në Hulumtime të Institutit Republikan Ndërkombëtar (IRI) tregon se Serbia shihet si kërcënimi më i madh për Kosovën dhe është përgjegjëse për tensionet e fundit, derisa normalizimi i marrëdhënieve me Serbinë sipas 44% të anketuarve pritet të ndodhë 1-5 vjetët e ardhshme.

    85% e të anketuarve kanë deklaruar se Serbia është kërcënimi më i madh për vendin, i pasuar nga Rusia me 84%, Kina (47%), Mali i Zi (22%), ShBA (14%), Shqipëria (13%) dhe Turqia (10%).

    Të pyetur se kur mendojnë që Kosova do t’i normalizojë marrëdhëniet me Serbinë, 44% e qytetarëve të anketuar janë shprehur se 1 deri në 5 vjet, brenda një viti (11%), në 6-10 vjet (14%), në 11-15 vjet (5%), në më shumë se 15 vjet (6%), kurrë (11%) derisa 9% e qytetarëve kanë refuzuar të përgjigjen.

    Ndërsa, se a është Kosova më afër apo më larg normalizimit të marrëdhënieve me Serbinë sesa ka qenë dy vjet më parë, 33% e qytetarëve kanë deklaruar se është më afër, 30% kanë thënë se nuk ka pasur asnjë ndryshim, 25% kanë thënë se më larg, derisa 8% kanë refuzuar të përgjigjen.

    Ndërkaq, se kur do ta njohë Serbia Kosovën si shtet, më pak se gjysma e të anketuarve janë shprehur se 1-5 vjet (41%), për periudhën 6-10 vjet janë shprehur 16% të të anketuarve, 8% kanë deklaruar që brenda një viti, 6% 11-15 vjet, në më shumë se 15 vjet (8%). Ndërsa, 11% e qytetarëve janë shprehur se Serbia kurrë nuk nuk do ta njohë Kosovën, derisa 11% e qytetarëve kanë refuzuar të përgjigjen.

    Lidhur me tensionet e fundit ndërmjet Kosovës dhe Serbisë, më shumë gjysma e qytetarëve të anketuar janë shprehur se Serbia është përgjegjëse. Sipas rezultateve të publikuara më 16 maj Qendra për Perceptime në Hulumtime të Institutit Republikan Ndërkombëtar (IRI), 83% e qytetarëve kanë deklaruar se shteti serb është përgjegjës për rritjen e tensioneve, 5% janë shprehur se Kosova, të dyja (10%), derisa 1% e qytetarëve kanë refuzuar të përgjigjen.

    Të pyetur se sa janë të shqetësuar se tensionet me Serbinë do zhvillohen në konflikt dhe dhunë më të madhe, 11% e qytetarëve kanë deklaruar se janë shumë të shqetësuar, disi të shqetësuar (45%), jo shumë të shqetësuar (30%), aspak të shqetësuar (13%), derisa 1% e qytetarëve kanë refuzuar të përgjigjen.

    Derisa se çfarë lëshimesh duhet të jetë e gatshme që të bëjë Kosova që Serbia të njohë Kosovën, rreth 79% e qytetarëve të anketuar janë shprehur se Kosova nuk duhet të bëjë asnjë lëshim. 7% janë deklaruar për pranimin e një njohjeje de-facto, komunat serbe (5%), tërheqja e ofertës për t’u anëtarësuar në Kombet e Bashkuara 2%, të tjera (1%), ndërkohë, që nuk e dinë apo refuzojnë të përgjigjen janë deklaruar 7% e të anketuarve.

    Të anketuarit janë pyetur edhe për çështjen e targave se a duhet që Qeveria e Kosovës të vazhdojë të shtyjë politikën që të gjithë qytetarët e Kosovës, përfshirë edhe serbët e Kosovës, të përdorin targa të Kosovës, mbi 65% e qytetarëve janë shprehur për (Po), 25% kundër (Jo), derisa 10% e tyre kanë refuzuar të përgjigjen.

  • Chollet dhe Vuçiq flasin për Kosovën dhe dialogun

    Chollet dhe Vuçiq flasin për Kosovën dhe dialogun

    Këshilltari i Departamentit amerikan të Shtetit, Derek Chollet, ka folur në telefon të martën me presidentin e Serbisë, Aleksandar Vuçiq.

    Sipas këtij të fundit, në telefonatë është diskutuar për situatën në Kosovë.

    Chollet tha se është e nevojshme të shmangen provokimet dhe konfliktet, si dhe se është e rëndësishme të vazhdohet puna për normalizimin, duke mbështetur dialogun e Brukselit.

    E Vuçiq ka theksuar se Serbia mbetet e përkushtuar ndaj politikës së paqes dhe bashkëpunimit në rajon.

    Po ashtu u tha se të dy theksuan se “marrëdhëniet serbo-amerikane janë duke u zhvilluar në një drejtim të mirë, veçanërisht në fushën e bashkëpunimit ekonomik, siç dëshmohet nga rritja e shkëmbimeve tregtare”.