Category: ZGJEDHJET 2026

Partia Demokratike e Kosovës e nisi ditën e tretë të fushatës zgjedhore me një konferencë për media, ndryshe nga subjektet e tjera politike. Kryetari i PDK-së dhe kandidati për kryeministër, Bedri Hamza, mbajti konferencën pa energji elektrike dhe pa sistem të zërimit, duke e përdorur situatën si ilustrim të problemeve që, sipas tij, po përballon vendi në sektorin energjetik.

Kurse gjatë tubimit në Lipjan, Hamza publikoi një mesazh politik ku theksoi nevojën për ndryshim dhe veprim të shpejtë.

“Kosova nuk është vend i krizave të pafundme. Ndryshimi nuk mund të presë më. Qytetarët e kërkojnë atë tani”, shkroi ai.

Pas Lipjanit, fushata vijoi në Shtime dhe më pas në Suharekë me fokus në mobilizimin e elektoratit dhe prezantimin e programit qeverisës të PDK-së.

Lëvizja Vetëvendosje, së bashku me partnerët e saj të koalicionit, ka vazhduar aktivitetet e fushatës zgjedhore me tubime në Kamenicë dhe Gjilan, në ditën e tretë të fushatës për zgjedhjet parlamentare.

Kryetari i LVV-së dhe kandidati për kryeministër, Albin Kurti, gjatë paradites ka qëndruar në Marinë të Skenderajt, ku është përkujtuar 27-vjetori i rënies heroike të dëshmorëve Rasim Kiçina dhe Ragip Halilaj.

Kurti ka publikuar edhe një video kushtuar suksesit të xhudos kosovare, duke e cilësuar Kosovën si “shtet të xhudos” teksa tha se në muajin mars ka nisur projekti me vlerë mbi 5.7 milionë euro për zgjerimin e Qendrës Nacionale të Xhudos në Pejë.

Po ashtu, në një postim në Facebook, i pari i VV-së ka shkruar për rritjen e pagës mesatare dhe përpjekjet për kontrollin e çmimeve të produkteve bazë.

Më pas, karvani zgjedhor i Lëvizjes Vetëvendosje ka vazhduar në Kamenicë, ku është mbajtur tubim me qytetarët e kësaj komune, ku kane publikuar fotografi nga tubimi me mbishkrimin: “Dardana e përbashkuar në thirrjen ‘Krejt për shtet, Shtet për Krejt’”.

Aktivitetet e ditës të LVV-së janë përmbyllur në Gjilan, ku para tubimit është ndjekur edhe finalja e Ligës së Kampionëve.

Në kuadër të fushatës elektorale për zgjedhjet parlamentare që do të mbahen më 7 qershor në Kosovë, kryetari i Lëvizjes Përparimtare të Romëve të Bashkuar dhe bartësi i listës me numrin 1, Erxhan Galushi, ka zhvilluar një vizitë në lagjen Firajë në Pejë.

Përmes një postimi në rrjetin social Facebook, Galushi njoftoi se së bashku me kandidatët dhe aktivistët e LPRK-së, vizituan banorët e lagjes Firajë.

“Nga afër pamë mungesën e investimeve bazike, infrastrukturën e dobët dhe mungesën e ndriçimit publik në këtë lagje, e banuar kryesisht nga komuniteti rom. Pavarësisht këtyre sfidave, u pritëm me ngrohtësi dhe respekt nga banorët e lagjes, të cilët i falënderojmë për mikpritjen dhe gatishmërinë për bashkëpunim. Besimi dhe shpresa e tyre për ndryshim janë motiv shtesë për angazhimin tone”, shkroi ai.

Po ashtu, kryetari i LPRK-së ka publikuar edhe një videomesazh drejtuar qytetarëve.

Ai u ka bërë thirrje qytetarëve të komunitetit rom që më 7 qershor të dalin në votime.

Lidhja Demokratike e Kosovës ka vazhduar aktivitetet në kuadër të ditës së tretë të fushatës elektorale me një agjendë të ngjeshur takimesh me qytetarët. Aktivitetet e ditës nisën në Pallatin e Rinisë në Prishtinë, ku Forumi i Gruas i LDK-së prezantoi 38 kandidatet gra për deputete të kësaj partie.

Më pas, kryetari i LDK-së dhe kandidati për kryeministër, Lumir Abdixhiku, së bashku me kandidaten numër 1 në listën e LDK-së për presidente, Vjosa Osmani, zhvilluan takime me qytetarë në Klinë.

Para të pranishmëve, Abdixhiku prezantoi zotimet kryesore të programit të LDK-së.

Nga ana tjetër, Vjosa Osmani premtoi anëtarsimin e Kosovës në NATO.

Në Deçan, Abdixhiku tha se me të në pushtet nuk do të ketë më pension më të ulët sesa 300 euro në muaj.

Kurse në tubimin e mbajtur në Pejë, I pari i LDK-së u zotua për heqjen e TVSH-së për produktet bazike në javën e parë të qeverisjes.

Ndërkohë, Vjosa Osmani në fjalimin e saj para qytetarëve tha se kundërshtarët politikë po shmangin debatin dhe po përdorin propagandë e fyerje.

Në ditën e tretë të fushatës elektorale të Aleancës për Ardhmërinë e Kosovës, kandidati për kryeministër, Ardian Gjini, ka publikuar një video në rrjetin social Facebook, ku ka ngritur shqetësime lidhur me gjendjen e infrastrukturës dhe furnizimit me energji elektrike në vend.

Në postimin e tij, Gjini thekson se mijëra familje janë përballur me mungesë të energjisë elektrike edhe gjatë orëve të ditës, duke e cilësuar këtë si një realitet shqetësues për qytetarët e Kosovës. Ai gjithashtu ka përmendur gjendjen e rrugës Gjakovë–Dollc, e cila sipas tij prej vitesh është lënë pas dore dhe nuk ka marrë trajtimin e duhur institucional.

Duke iu drejtuar qytetarëve, kandidati i AAK-së ka shprehur optimizëm për ndryshime pas zgjedhjeve të 7 qershorit, duke paralajmëruar një “kapitull të ri” për përmirësimin e jetës në vend.

Aleanca për Ardhmërinë e Kosovës ka mbajtur tubimin e radhës elektoral në Rahovec, me pjesëmarrjen e kandidatit të AAK-së për Kryeministër, Ardian Gjini, si dhe ish-Kryeministrit Ramush Haradinaj.

Gjatë adresimit para qytetarëve, Ardian Gjini foli për programin ekonomik të Aleancës, duke kundërshtuar taksat progresive dhe duke premtuar politika që, sipas tij, do të stimulojnë punën dhe prodhimin vendor.

Ai premtoi gjithashtu ndryshime edhe në pragun e TVSH-së, duke theksuar se bizneset do të kenë lehtësime fiskale.

Gjini kritikoi Qeverinë që sipas tij po favorizohen kompani të mëdha përmes tenderëve njëburimorë dhe skemave shtetërore.

Në kuadër të aktiviteteve të ditës, kandidati i AAK-së për kryeministër zhvilloi takime me bizneset private.

Lidhja Demokratike e Kosovës ka vazhduar sot ditën e dytë të fushatës për zgjedhjet parlamentare të 7 qershorit, duke zhvilluar një seri tubimesh në disa komuna të vendit, ku u prezantuan kandidatët dhe programi qeverisës i partisë.

Kryetari i LDK-së dhe kandidati për kryeministër, Lumir Abdixhiku, së bashku me kandidatin për presidente në listën e partisë, Vjosa Osmani, morën pjesë në takime me qytetarë në Kaçanik, Hani i Elezit, Shtime, Fushë Kosovë dhe në Prishtinë.

Në tubimin e mbajtur në Kaçanik, Lumir Abdixhiku prezantoi vizionin e partisë për zhvillim ekonomik të bazuar në mirëqenien e qytetarëve.

Në të njëjtin takim, Vjosa Osmani vlerësoi historinë e Kaçanikut si simbol i qëndresës dhe theksoi rëndësinë e përfshirjes qytetare në proceset demokratike.

Në Shtime, Lumir Abdixhiku premtoi investime të mëdha publike në infrastrukturë, energji dhe shëndetësi. Ai u zotua për ndërtimin e një centrali me gaz amerikan dhe një paketë investimesh prej rreth 5 miliardë eurosh.

Kurse Vjosa Osmani në Shtime, u fokusua në rëndësinë e marrëdhënieve ndërkombëtare dhe mirënjohjes ndaj aleatëve të Kosovës, veçanërisht Shteteve të Bashkuara të Amerikës.

Lëvizja Vetëvendosje ka vazhduar sot aktivitetet në kuadër të ditës së dytë të fushatës elektorale për zgjedhjet parlamentare të 7 qershorit në Kosovë.

Kryetari i LVV-së dhe kandidati për kryeministër, Albin Kurti, bashkë me partnerët e koalicionit, ka mbajtur tubime zgjedhore në Istog dhe Pejë, ku ka prezantuar programin qeverisës dhe zotimet për mandatin e ardhshëm.

Gjatë ditës, Kurti ka vizituar edhe disa biznese vendore ku ka premtuar 200 milionë euro për industrinë kreative, duke e quajtur këtë një investim strategjik për zhvillimin ekonomik dhe shoqëror.

Gjate tubimit në Pejë, Kurti tha se kishte kontaktuar ministrin e Infrastrukturës dhe Transportit për t’u informuar lidhur me projektin e rrugës Kuqishtë–Qakorr në Rugovë.

Në kuadër të zotimeve elektorale, Kurti premtoi mbështetje shtesë për punësimin e grave në sektorin privat.

Partia Demokratike e Kosovës ka vazhduar ditën e dytë të fushatës elektorale për zgjedhjet parlamentare të 7 qershorit me tubime zgjedhore në Gjakovë dhe Pejë.

Kryetari i PDK-së dhe kandidati për Kryeministër të Republikës së Kosovës, Bedri Hamza, gjatë ditës ka vizituar edhe familje të ndryshme, ku qytetarët kanë shprehur shqetësimet për jetesën e vështirë, migrimin e të rinjve, pensionet dhe pagat e ulëta, duke përsëritur mesazhin “Stop krizës”.

Përmes një video-mesazhi, Hamza prezantoi pesë zotimet kryesore: Ulje të çmimeve dhe tatimeve, investime në energji dhe infrastrukturë, arsim më konkurrues dhe drejtësi më efikase.

Në tubimin në Gjakovë, Hamza kritikoi Qeverinë aktuale për mungesë rezultatesh.

I pari i PDK-së premtoi mbështetje për bizneset, themelimin e Gjykatës së Punës dhe krijimin Fondit të Papunësisë.

Kryetari i PSD-së Dardan Molliqaj në kuadër të ditës së dytë të fushatës elektorale për zgjedhjet parlamentare përmes një video-incizimi të publikuar ka kritikuar ashpër orientimin e Qeverisë drejt rritjes së shpenzimeve ushtarake, duke e krahasuar kryeministrin Albin Kurti të dikurshëm si aktivist paqësor me qasjen e tij aktuale në pushtet.

Ai tha se Kosova ka nevojë urgjente për investime në shëndetësi, arsim, çerdhe publike dhe banim të përballueshëm, e jo për rritje të vazhdueshme të buxhetit për ushtrinë.

Molliqaj kritikoi edhe idenë për krijimin e xhandarmërisë, duke e cilësuar këtë si pjesë të një logjike të militarizimit të shoqërisë, të cilën e konsideroi jodemokratike.

Në fund të mesazhit të tij, kreu i PSD-së u bëri thirrje qytetarëve që në zgjedhjet e 7 qershorit të mbështesin PSD-në.