Author: Diellëza Krasniqi

Një banor i lagjes Ulpiana, në rrugën “Taulantina” në kryeqytet, kur vendosi ta rinovonte podrumin e banesës së tij, e nxorri në hapësirë publike gypin e kanalizimit.

Me këtë veprim nuk po pajtohen komshinjtë, të cilët po kërkojnë largimin e tij, për shkak të kundërmimit.

“Po, kemi erë, po shihet qysh është jashtë pamja edhe nuk është një banesë e jetueshme këtu, tha Brahimi”.

“Ne jemi banorë këtu, realisht jetoj me qira, por na pengon era. Zakonisht vjen kur është nxehtë, por edhe kur fillon të ftohet kjo kohë. Madje, kur bie shi, vetëm kundërmon keq, tha Xani”.

ATV-ja mëson se pronari i këtij podrumi nuk jeton në Kosovë, ndërkaq i njëjti është i mbyllur e punime nuk po bëhen.

Kësisoj banorët po kërkojnë veprim instituciol për ta sanuar këtë problematikë.

“Kemi bërë ankesa në komunë, kanë ardhur, por nuk kanë marrë asnjë masë. Po këna shumë probleme, por askush nuk po merret me to dhe nuk po dimë më se ku të ankohemi, tha Brahimi”.

Por, Komuna e Prishtinës në një përgjigje për ATV-në thotë se kjo është përgjegjësi e Kompanisë Rajonale Ujësjellësi “Prishtina”.

Ndërkaq nga kjo kompani deklarohen se infrastruktura e tyre nuk paraqet ndonjë defekt, dhe se përgjegjësia për këtë problem bie mbi vetë pronarin.

Rrjeti ynë është në rregull, por këta kanë problem me horizontale që del në kolektorin tonë, e cila bie në përgjegjësi të vetë banorëve. Kjo gjendje ka qenë që më herët.”

Me këtë problematikë banorët e kësaj zone po përballen tash e disa muaj.

Nga fillimi i tetorit aplikacioni “Kuleta Dixhitale” u lansua që kryeqytasit ta kishin më të lehtë udhëtimin me transportin urban.

Mirëpo tash e disa ditë në të qytetarët nuk po arrijnë të regjistrohen.

Për mosfunksionimin e këtij aplikacioni ankesa kanë veçanërisht studentët.

Në Komunën e Prishtinës arsyetohen se për shkak të kërkesës së lartë për ta shkarkuar aplikacionin dhe për të hapur llogari në të, po shkaktohet kjo problematikë.

“Për momentin është aplikacioni më i shkarkuar në Republikën e Kosovës. Kërkesat janë të mëdha, sidomos nga të rinjtë që kanë filluar ta shkarkojnë. Duhet të fusin të dhënat personale dhe dokumentet e nevojshme, përndryshe nuk është funksional, tha Bajqinovci”.

E studentët të cilët nuk kanë arritur ta shkarkojnë “Kuletën Dixhitale” ose të hapin llogari në të, mund të udhëtojnë falas në të gjitha linjat e autobusëve në Prishtinë vetëm me kartelë studentore.

Veç studentëve, nga 1 tetori nga pagesa janë liruar edhe kategoritë e stafit shëndetësor, arsimor, administrata komunale si dhe nxënësit.

Për herë të dytë, brenda një jave këta prindër po protestojnë në hyrje të oborrit të shkollës “Zenel Hajdini” në Prishtinë. Kërkesa e tyre e vetme mbetet, kthimi i fëmijëve në shkollën fillore “Asim Vokshi”.

Përfaqësuesja e prindërve, Njomza Berisha Poqani, tha se prindërit kanë dorëzuar një peticion me rreth 200 nënshkrime për të kundërshtuar zhvendosjen e fëmijëve për shkak të mësimit gjithëditor. Madje sipas tyre, ky proces në ketë shkollë as nuk ka filluar.

“Nuk janë plotësuar kushtet për mësim tërëditor dhe mësimi tërëditor nuk ka filluar. Ne jemi dalë me kërkuar kthimin e fëmijëve tanë në shkollën ‘Asim Vokshi’, për arsye të sigurisë që nuk ka siguri, tha Berisha Poqani”.

Prindërit thonë se kanë takuar përfaqësues komunal, të cilët janë zotuar për përmirësime në sinjalistikën rrugore, po kjo sipas tyre, nuk e zgjidh problemin kryesor.

“Shqetësimi ynë kryesor është distanca e madhe dhe siguria, pasi që rruga është e ndarë përmes magjistrales Prishtinë–Podujevë, e cila është rruga më e ngarkuar në Prishtinë, tha Zenjullahu”.

“Edhe unë e kam këtë shqetësim sepse duhet me dalë nga puna e me ardhë me marrë fëmijën ose me detyru dikë me ardhë me marrë, tha Isufi”.

Në rast se kërkesa e tyre nuk realizohet, këta prindër paralajmërojnë veprime ligjore.

“Nëse nuk marrim përgjigje, besojmë që do të shkojmë në mënyrë ligjore të kërkojmë siguri për fëmijët tanë që kemi të drejtë, dhe do të vazhdojmë me instanca më të larta, tha Berisha Poqani”.

Drejtori i Arsimit në Komunën e Prishtinës, Samir Shahini i tha ATV-së përmes telefonit se janë duke punuar me Drejtorinë e Shërbimeve Publike për shtimin e sinjalistikës dhe masave për siguri në rrugë, tha Shahini”.

Shahini tha se janë të gatshëm për takime me prindërit, për te gjetur një zgjidhje sa me pare qe është e mundur.

Ai e pranoi se në shkollën Zenel Hajdini nuk ka nisur mësimi tërëditor, për shkak të siç tha, vonesave nga bllokimi i buxhetit./ATV

Kjo është gjendja në të cilën ndodhet kjo shtyllë elektrike në rrugën “Qeta e Llapit” në lagjen Kodra e Trimave në Prishtinë.

Shtylla është rrëzuar që nga e premtja, më 3 tetor dhe si pasojë e kësaj, disa familje të kësaj zone kanë mbetur pa energji elektrike për më shumë se 3 ditë.

“Po e shihni banderin ku është. Kjo shtëpi është pa rrymë, kjo është pa rrymë, atje është pa rrymë. S’po dimë as çka me bërë në njëfarë mënyre, na kanë kthyer në shekullin 19. S’po dimë as çka me bo, as nuk ke kujt me iu ankua. KEK-u e din shumë mirë që banderi është i rrëzuar.”

Me që për disa ditë nuk u rregullua problemi, Hoxha thotë se ka qenë i detyruar të sigurojë rrymë për vete nëpërmjet një lidhjeje nga rruga tjetër, për cka thotë se e ka njoftuar KEDS-in.

“Unë jam detyruar dje, kam qasje edhe prej anës tjetër të rrugës, me u kyç prej asaj ane, edhe në rrymë, edhe në kabllovik, me u hek prej kësaj pjese. Por familjet e tjera s’kanë qasje.”

Megjithatë në këtë lagje vetëm një shtëpi ka rrymë.

“Ka ra natën, ka ushtu. Jom çu prej gjumit edhe e pashë që kish ra në këtë pjesë. Rrymë këna, po vetëm televizorin s’e këna.”

Nga KEDS-i i thanë ATV-së se ekipi do të dalë në vendin e ngjarjes dhe varësisht nga nevoja, do të veprojnë.

“Në lidhje me rastin në fjalë, ju informojmë se një ekip i KEDS-it do të dalë në vend për të verifikuar gjendjen dhe, varësisht nga nevoja, edhe do të veprojë”.

Ndërsa si pasojë e reshjeve atmosferike nga KEDS thanë se janë shkaktuar dëme në rrjetin elektrik shpërndarës.

Kanë kaluar katër muaj që kur zjarri përfshiu ketë ndërtesë banimi në lagjen Emshir të Prishtinës.

Nga ajo ditë deri të premten në këtë hapësirë nuk është ndërhyrë për riparim.

Si pasojë e kësaj familja e cila jetonte këtu është detyruar të dalë e të banojë me qira.

Shpresat për riparim pronari Luan Durmishi, i kishte tek komuna, meqë kryetari i Prishtinës, kishte premtuar mbështetje.

“Jemi në fazën e pikës 0 pa ndihmë të komunës pa ndihmë të qeverisë dhe po presim është kosto jashtëzakonisht e madhe dhe pa u rregullu kulmi asgjë nuk mundet mu be brenda, tha Durmishi”.

Prandaj, Durmishi po kërkon që institucionet të veprojnë më shpejt.

“I beje thirrje komunës i bëjë thirrje qeverisë qe sa më shpejt të bëjë një zgjidhje, tha Durmishi”.

Mosriparimi në kohë tash po u nxjerr telashe edhe banorëve të kësaj ndërtese.

Reshjet e dy ditëve të fundit kanë depërtuar në banesat e tjera.

“Pas reshjeve të shiut dhe borës shiu po depërton në të gjitha dhomat pjesët e korridorit, as një ankese në organet e komunës së Prishtinës nuk ka rezultu pozitivisht dhe ne po futemi në sezonin e dimrit ku priten reshje shiu e dëbore, tha Restelica”.

Vlerësimi teknik dhe harmonizimi institucional janë disa prej arsyeve që Komuna e Prishtinës i dha, kur u pyet rreth mosintervenimit në këtë ndërtesë.

“Në koordinim me ndërmarrjen publike banesore, jemi duke shqyrtuar zgjidhjen më të shpejtë dhe të qëndrueshme, që së paku të bëhet izolimi i hapësirave të dëmtuara dhe të largohen rrjedhjet e ujit, me qëllim që të parandalohet përkeqësimi i mëtejmë i gjendjes dhe rreziku për sigurinë e qytetarëve, procesi ka kërkuar kohë për shkak të nevojës për vlerësim teknik dhe harmonizim institucional.”

Zjarri në natën e 26 qershorit kishte filluar në një nga banesat e kësaj ndërtese dhe më pas ishte përhapur edhe tek pjesët tjera të banesave.

Gjatë së premtes, shtatë shkolla në Prishtinë kanë shkurtuar procesin mësimor si pasojë e mungesës së funksionimit të sistemit të ngrohjes.

“Në shkollën tona u shkurtua orari mësimorë 25 minuta, arsyeja ka qene rrjedhja e ujit në sistemin e ngrohjes janë njoftuar edhe DKA-ja, tha Halimi”.

Për këtë, miratimin e dha vetë Drejtoria e Arsimit.

“Që nga mëngjesi kemi marrë konfirmime dhe kemi aprovuar shkurtimin e orarit në 7 shkolla si pasojë e mosfunksionimit të ngrohjes nga Termokosi. Ky ndryshim i papritur i motit nuk na ka zënë të papërgatitur, por duhet që në të ardhmen të kemi një koordinim më të mirë me Termokosin, në mënyrë që për ndryshime të tilla të shpejta të motit të kemi mundësinë edhe për lëshimin e ngrohjes për një ditë a dy, tha Shahini”.

Shkolla të tjera në Kryeqytet kanë vazhduar procesin mësimor, si zakonisht.

Ngrohja në shkolla nis më 15 tetor. Por drejtori i shkollës Pavarësia, Halil Brahaj, thotë se nëse vazhdon situata me të ftohtin, do të ndërmarrin masa alternative.

“Ulja e temperaturave ndikon dhe e përkeqëson situatën edhe nëpër institucione arsimore. Por, nëse situata vazhdon kështu, kemi servisuar gjeneratorin dhe mund të bëjmë ndezjen e tij, tha Brahaj”.

Ndërkohë, nga Termokos njoftojnë se po bëhen testimet e fundit për të filluar sezonin e ngrohjes.

“Aktualisht, janë duke u kryer testimet përfundimtare të rrjetit dhe gjithë sistemit të ngrohjes. Në rast se kushtet klimatike mbeten të njëjta, ditëve të ardhshme do të fillojë furnizimi i jashtëzakonshëm me ngrohje për gjithë konsumatorët tanë”.

Nga drejtoria e Arsimit thanë se, pavarësisht se nuk kanë pasur ngrohje, çerdhet në Prishtinë nuk e kanë shkurtuar orarin e punës.

“Me ty fillon parandalimi” – është motoja e fushatës sensibilizuese kundër kancerit të gjirit.

Gjatë hapjes së kësaj fushate, kryeministri në detyrë Albin Kurti, apeloi për kontrolle të rregullta, me që zbulimi i hershëm mund ta shpëtojë jetën.

“Me vetëkontroll dhe kontrolle të rregullta mjekësore, ne bëjmë hapësirën vendimtare të zbulimit të hershëm të sëmundjes dhe shpëtimit të jetës,tha Kurti”.

Trajtimi i kësaj sëmundjeje sipas ministrit në detyrë të Shëndetësisë, tashmë mund të bëhet më lehtë, meqë janë dyfishuar kapacitetet.

“Me investimet ne kliniken e onkologjis tashme kapacitet e shtreteve jan dyfyshuar hapsirat jan riorganizuar dhe mordenizuar duke ofruar kushte shume me te mira per pacient jane blere 3 akslerator tw ri, tha Vitia”.

Por njëjtë nuk po thotë një e mbijetuar e kancerit të gjirit. Sipas Nafije Latifit, një nga telashet që hasin pacientët me këtë sëmundje është mungesa e kujdesit nga stafi mjekësor.

“Pacientët hasin në kushte të pamjaftueshme trajtimi, mungesë të stafit të mesëm shëndetësor, mungesë të lokacioneve dhe aparaturave të avancuara. Më e dhimbshmja nga të gjitha këto është mungesa e kujdesit paliativ.Kërkojmë që pacienti të vendoset në qendër të çdo politike,tha Latifi”.

E thirrje publike për kontrolle të rregullta mjekësore, bëri edhe deputetja Mimoza Kusari-Lila, e cila gjatë këtij viti ishte përballur me këtë sëmundje.

“Edhe pak ditë e kam datëlindjen, në muajin tetor jam diagonostifikuar dhe muajin tetor do e shfrytëzojë që maskimalisht t’iu them të gjithave mos u frikësoni,tha Lila”.

Me rastin e fillimit të Muajit të Ndërgjegjësimit Kundër Kancerit të Gjirit deri më 31 tetor, Mamografi Mobile do të ketë në disa prej qyteteve të Kosovës./ATV

Nga e mërkura, në Kosovës fillon zyrtarisht vaksinimi kundër gripit sezonal.
Qytetarët mund ta marrin këtë shërbim falas në Qendrat e Mjekësisë Familjare më të afërta që kanë njësi të vaksinimit.
Xhevrije Canolli, mjeke familjarë ne QKMF në Prishtinë thotë se tashmë janë bërë të gjitha përgatitjet për fillimin e këtij procesi,transmeton ATV.

“Jemi furnizuar dhe i kemi shpërndarë në të gjitha qendrat ku do të organizohet procesi i vaksinimit. Në fillim është interesimi më i madh. Vitin e kaluar janë vaksinuar rreth 11 mijë qytetarë,tha Canolli”.

Të përgatitur për ketë proces janë edhe stafi mjekësore i QKMF-së në Mitrovicë,transmeton ATV.

“QKMF në Mitrovicë i ka marrë 2,500 doza nga IKSHPK-ja.Vitin e kaluar e kemi pasur të njëjtën sasi dozash dhe kemi administruar rreth 2,258 doza brenda sezonës,tha Sylejmani”.

Ndërsa ne qytetin e Klinë, dozat e vaksinës priten që të arrijnë gjatë ditës së martë, transmeton ATV.

“Ne i kemi bërë të gjitha përgatitjet në bashkëpunim me IKSHPK-në. Vaksinat priten të arrijnë sot,zakonisht çdo vit vaksinohen afër 2 mijë qytetarë,tha Bojaj”.

Vetë qytetarët e vlerësojnë rëndësinë e vaksinës kundër gripit sezonal, transmeton ATV.

“Unë vazhdimisht e praktikoj marrjen e vaksinës kundër gripit. Tek unë ka pasur ndikim pozitiv,tha Krasniqi”.

“Po e marr që prej 4-5 vitesh. Jam pensionist dhe e mira e saj është se ofron njëfarë mbrojtjeje, sado pak, për moshën tonë – që t’i përballojmë më lehtë këto viruse të ndryshme, tha Abazi”.

Ndërkaq nga Ministria e Shëndetësisë në një përgjigjje për ATV-në thanë se furnizimi është bërë në bazë të kërkesës së qendrave nëpër komuna, transmeton ATV.

“Të gjitha QKMF-të janë furnizuar me vaksina kundër gripit sezonal. Shpërndarja është bërë në bazë të kërkesës së secilës komunë, duke siguruar që dozat të jenë të përqendruara në mënyrë të drejtë dhe në përputhje me nevojat lokale”.

Përveç të moshuarit, rekomandohet që të vaksionohen edhe fëmijët me imunitet të dobësuar, gratë shtatzëna, punonjësit shëndetësorë dhe personat me sëmundje kronike. Simptomat më të zakonshme të gripit janë ethet, kollitja, dhimbjet e muskujve, lodhja dhe dhimbjet e kokës.

Një bastisje e gjerë në Qendrën Korrektuese të Dubravës këtë të shtunë ka përfunduar me rezultat negativ,transmeton ATV.

Gjatë kontrollit të të gjitha hapësirave, nga dhomat e të burgosurve deri te ambientet përcjellëse, Shërbimi Korrektues i Kosovës nuk gjeti asnjë send të kundërligjshëm,transmeton ATV.

Ky aksion, kishte për qëllim parandalimin e veprimtarive të kundërligjshme dhe forcimin e sigurisë brenda këtij institucioni,transmeton ATV.

“Gjatë operacionit janë kontrolluar të gjitha hapësirat e brendshme, përfshirë dhomat e të burgosurve, si dhe hapësirat e jashtme të institucionit, kuzhina, lavanderia, salla e sportit dhe ambientet tjera përcjellëse. Pas përfundimit të bastisjes, rezultoi se nuk u gjet asnjë send i kundërligjshëm, duke e bërë operacionin me rezultat negativ. thuhet në njoftim të SHKK-së”.

Për ish-drejtorin e burgjeve, Emrush Thaçi, fakti që nuk u gjet asgjë e kundërligjshme është një sukses dhe një tregues i qartë i punës së mirë të stafit,transmeton ATV.

“Mendoj qe kjo bastisje edhe pse e pamë qe ka rezultuar negative është në aspekt shume pozitiv për shkak se këto bastisje me përmasa te mëdha kur del edhe negative nënkupton se Shërbimi Korrektuesi Kosovës e bën punën e vet,tha Thaçi”.

Por, ish-drejtori i burgjeve thekson se beteja kundër kontrabandës është e vazhdueshme, pasi tentativat për të futur sende të ndaluara, si telefona apo drogë, nuk ndalen asnjëherë,transmeton ATV.

“Në të kaluarën ka pasur edhe raste të kapjes së oficerëve korrektues, të cilët kanë qenë në bashkëpunim, eventualisht, me persona që kanë futur kontrabandë brenda. Megjithatë, kontrabanduesit në këto raste janë familjarët ose personat që i vizitojnë të burgosurit, tentativë kanë të fusin telefona, drogë apo mjete të tjera. Njëkohësisht, mendoj se siguria në burgje është në nivel, gjithmonë duke pasur parasysh përmirësime, edhe pse gjithmonë ka vend për përmirësim,tha Thaçi”.

Në aksion morën pjesë edhe zyrtarë korrektues nga institucione të tjera, si dhe njësiti special K9./ATV

Veli Ademi, afarist në qytetin e Shtimës, ankohet se tash e 5 vjet pas çdo reshje atmosferike bodrumi i lokalit mbushët me ujëra të zeza dhe kundërmim të pakëndshëm.

Kjo ndodh si pasojë e disa problemeve me rrjedhjen e kanalizimit në rrugën “Komandant Kumanova”. Ai thotë se kjo po i shkakton dëme ekonomike, transmeton ATV.

“Prej vitit 2020 kemi probleme me kanalizimin. Kur ka reshje atmosferike, bodrumi na mbushet plot me ujë. Gjatë natës ndjehet një erë e pakëndshme, që vjen nga kanalizimi. Në biznes klientët vijnë të për një kafe, thonë veli çka është kjo ere kështu un nuk mundem me qëndru këtu’’, tha Ademi.

Ademi thotë se problemin e ka adresuar në Komunë, por thotë se nuk është marr parasysh, transmeton ATV.

“Ne kemi bërë kërkesë me shkrim në Kuvendin Komunal në maj të vitit 2024, drejtorit të urbanizmit, drejtorit të shërbimeve publike dhe drejtorisë së zhvillimeve ekonomike. Kam biseduar edhe drejtpërdrejt me kryetarin në zyrë hapur, kemi diskutuar shumë herë, por nuk janë marrë masa, tha Ademi.

Por nënkryetari i komunës së Shtimes, Faruk Beqa, thotë se ky problem do të sanohet pjesërisht brenda pak ditëve, transmeton ATV.

“Unë veç tash i kam marrë hapat e parë. Kam thirrur disa prej pronarëve të tokave ku kalon kanalizimi, për të zgjidhur problemin afatshkurtër. Brenda 3-4 ditëve do të zgjidhet ky problem. Ndërsa për zgjidhjen më të gjerë, kemi plan buxhetor për vitin e ardhshëm një shumë të caktuar për të rivitalizuar gjithë sistemin në një gjatësi prej 500 metrash, tha Beqa.

Me të njëjtin problem përballen edhe banorët e tjerë në këtë pjesë por ata nuk pranuan të flasin para kamerës.