Në ditën e tetë të fushatës zgjedhore, aleanca për ardhmërinë e Kosovës, zbaroi në Suharekë, komunë kjo që edhe e zotërojnë.
E nikoqiri i këtij tubimi elektoral, kryetari bali Muharremaj, s’kruseur fjalët e falënderimet për kreun e partisë, teksa atyre që ia besuan mandatin në krye të komunës, iu kërkoi votë që për nivel qendror.
Në mesin e shumë qytetarëve, kandidati për deputet nga lista e AAK-së Burim Ramadani, tha se kryetari i komunës është shembull i udhëqesisë, sikurse dhe kandidati për kryeministër, që synon ta marr drejtimin e shtetit.
Zë i tyre në kuvend premtoi se do të jetë edhe Albana Bytyqi, nëse merr besimin e qytetarëve.
E vetë ai që synim ka qeverinë, Ramush Haradinaj, u zotua se do të punoi për vendin dhe qytetarët.
Aleanca, ditën e mbyllën në Klinë, ku patën tubim me qytetarë.
Lëvizja vetëvendosje ditën e nisi në Kamenicë, në takim me qytetarë
Ati kryetari I partisë që po kërkon mandatin e tretë si kryeministër Albin Kurti, kërkoi votë që këtë herë ta bëjnë qeverinë vetë, e mos të varën nga partitë e tjera.
Por nuk la anash as premtimet, nëse synimin për ta vazhduar punën në qeveri e arrin me 28 dhjetor.
Kurti vizitoi edhe Junikun, ku u zotua për investime në bujqësi.
Lëvizja vetëvendosje ditën e mbylli në kryeqytet ku takoi qytetarët.
Në ditën e tetë të fushatës zgjedhore, Lidhja Demokratike e Kosovës vazhdoi takimet me qytetarët në Anamoravë, ku kandidati për kryeministër Lumir Abdixhiku, prezantoi zotimet konkrete të LDK-së, që prekin rajonin por edhe vendin.
Fokusi kryesor ishte Autostrada e Anamoravës, e cilësuar si projekt strategjik kombëtar.
Abdixhiku theksoi e Anamorava do të jetë prioritet qeverisës, me investime në infrastrukturë, zhvillim ekonomik dhe hapje të vendeve të reja të punës.
Në zgjedhjet e jashtëzakonshme të 28 dhjetorit, LDK garon me numrin 123.
Lista Serbe ditën e nisi në Shtërpcë, komunë kjo që kanë udhëheqin
E si në nivel lokal, partia më e madhe serbe, kërkoi nga qytetarët e këtij komunitet, që tua japin besimin edhe për zgjedhjet nacionale.
Masës fillimisht iu drejtua kryetari i komunës Ivica Tanasijević, i cili u kërkoi bashkëqytetarëve që mos ta lënë këtë parti nën 10 deputet në kuvend.
“Dhjetë mandatet në Kuvendin e Kosovës na garantojnë se jemi shtyllë e pashmangshme në ruajtjen e interesave tona dhe në mbrojtjen e popullit tonë në këto hapësira. Një votë për Listën Serbe është votë për një të nesërme më të mirë, për një të ardhme të sigurt për fëmijët tanë, për qëndrim dhe mbijetesë. Është votë për një jetë të qetë dhe dinjitoze për çdo njeri. Votojmë që të jemi zot në tokën tonë, që zëri ynë të dëgjohet dhe të respektohet. Në këto zgjedhje nuk mbrojmë vetëm një të nesërme më të mirë, por edhe vatrat tona shekullore, historinë tonë të pasur, faltoret, ruajmë nderin e të parëve tanë dhe tokën që na është lënë trashëgimi”, tha kryetari i Shtërpcës, Ivica Tanasijević
Nga kryesia e partisë, Igor Simiq që për disa mandate qe deputet në kuvendin e Kosovës, kërkoi votë për siç tha, që të fitoi populli serb.
“Në Listën Serbe besojmë se kryeqyteti i të gjithë serbëve është Beogradi dhe jo Prishtina, dhe të gjithë në këtë sallë e dinë mirë këtë. Fatkeqësisht, po ashtu e dini se në radhët tuaja, në radhët e popullit serb, ka disa që janë mashtruar nga Prishtina, u kanë premtuar gjëra, u kanë dhënë dhurata të ndryshme. A është e mundur që një njeri të blihet për 100 euro, që për 100 euro të shesë të ardhmen e fëmijëve të vet dhe të popullit të vet? Nga ana tjetër, përballë nesh është një njeri që ka votuar për t’u marrë toka bujqve serbë në Zubin Potok dhe Leposaviq, që nuk u kundërshtua kur u formua muzeu i gjenocidit të serbëve në Kosovë, që nuk tha asnjë fjalë kur u sulmuan institucionet tona, Qendra për Punë Sociale, kur u përpoqën ta vështirësonin maksimalisht jetën e popullit tonë”, u shpreh Simić.
Sipas përfaqësuesve të kësaj partie, prioritet mbeten siguria, mbrojtja e pronës dhe institucioneve serbe, si dhe krijimi i kushteve për qëndrim dhe jetë të dinjitetshme të qytetarëve.
Për muaj të tërë deputetët morën paga, ndonëse nuk arritën ta konstituojnë kuvendin.
Por nëse kjo bllokadë vazhdon, arka e shtetit s’do të ketë para që t’i paguaj as ata, e as rreth 80 mijë punonjës të tjerë sa konsiderohet se ka sektori publik.
Data 31 i këtij muaji, është edhe data e fundit kur projektbuxheti për vitin e ardhshëm, do duhej të miratohej në kuvend.
Por veç një legjislature joaktive, vendi aktualisht s’ka as qeveri legjitime që do e procedonte tutje projektbuxhetin.
‘’Në rast se nuk ka miratim të ligjit për buxhetin e vitit 2026 janari dhe shkurti munden me vepru me ligjin e vitit 2025 vetëm sa i përket pjesës së pagave të punëtorëve por edhe për këtë normalisht që duhet me pas kuvend të konstituuar për ta votu një ndryshim i ligjit aktual sa i përket janarit dhe shkurtit pra për pagat e punëtorëve por në çdo rrethanë siç e kemi pa kuvend dhe pa qeveri legjitime po rrezikojmë që Kosovën me lënë pa buxhet dhe punëtorët pa paga’’, tha Demhasaj.
Njohësit e punës së kuvendit thonë se edhe shumë projekte tjera, fare lehtë mund të pezullohen, në mungesë të parave.
‘’Prej një janarit asnjë cent i buxhetit nuk guxon të përdorët nëse nuk ka ligj për buxhet, pra krejt projektet të cilat janë në zbatim, prej një janarit bllokohen për shkak se nuk ka mjete financiare , nuk ka buxhet të konsolidum që munden të vazhdohen dhe implementohen ato projekte’’, tha Demhasaj.
‘’Nuk do të mbërrijnë të adresohen kërkesat buxhetore të komunave, të agjencive të pavarura dhe të qytetarëve të ndryshëm të cilët kanë bërë kërkesa ta zëmë për çështje mjedisore, ujore, të infrastrukturës apo bujqësisë e gjëra të tjera të cilat ndikojnë drejtpërdrejtë në jetën e qytetarëve’’, tha Jakaj.
Këta vlerësojnë se këso bllokade, shteti nuk ka pasur ndonjëherë, teksa shtojnë se deputetët do të duhej t’i lënin anash inatet politike, meqë vendi po shkon drejt kolapsit, pasojat e të cilit mund të jenë afatgjate.
Përdorimit të ujit të pijshëm për ujitje, ia panë sherrin plot qytetarë në Prishtinë e rrethinë.
Shumë lagje të kryeqytetit e vende të tjera, po përballën me mungesë të ujit gjatë tërë natës, pothuajse që prej fillimit të sezonit të verës.
Krejt kjo shkak i shpenzimit enorm të ujit, që zbrazi rezervuarët, njoftuan nga kompania rajonale e ujësjellësit “Prishtina”.
“Problemet më të mëdha kanë qenë në rrugën B, rrugën Ndue Përlleshi, lagjja mati 1, por kjo ka qenë për shkak ë shpenzimit enorm të ujit të pijshëm nga ana e qytetarëve dhe rënia e nivelit të ujit në rezervuare ka qenë e madhe pasi disa zona nuk furnizohen direkt nga liqeni por nga rezervuarët”, tha Arjeta Mjeku, zëdhënëse e KRU “Prishtina”.
Vetëm gjatë muajve të verës, janë evidentuar qindra raste të keqpërdorimit të ujit, përfshirë edhe lidhjet ilegale jashtë ujëmatësit.
“Rreth 300 e disa raste që i kemi zënë duke e ujitur përmes lidhjeve ilegale jashtë ujëmatësit përveç që i kemi shkyçur nga sistemi i ujësjellësit, lëndët e tyre janë dërguar edhe në gjykatat kompetente”, tha Mjeku.
Me probleme të njëjta, janë edhe shumë lagje të Mitrovicës me regjion.
Pa dhënë shifra, nga kompania rajonale e Ujësjellësit “Mitrovica”, thanë se gjatë tërë verën vazhdimisht kanë bërë kontrolle, dhe kanë gjobitur qindra qytetarë që janë zënë duke keqpërdorur ujin.
Sidoqoftë problemi me furnizim me ujë, pritet të evitohet tash me uljen e temperaturave, kur shpenzimi bie, meqë uji nuk përdorën më për ujitje.
Në një institucion që ka parë deputetë të vijnë e të shkojnë, reforma që kanë ndryshuar rrjedhën politike, dhe investime që kanë transformuar çdo cep, që nga holli e deri në sallën plenare, një element i vetëm ka mbetur stoik.
Kohës e teknologjisë moderne, në Kuvend i shpëtoi ky televizor, gjysmë çerek shekulli i vjetër, që ende transmeton seancat plenare.
Nga ky ekran i vjetër e i ngushtë, punëtorët e sigurimit përcjellin në kohë rrjedhën e seancës, për të qenë të përgatitur nëse kërkohen intervenimi i tyre.
Ndryshimet e kuvendit, e qëndrueshmërinë e televizorit, i pa nga afër edhe gazetari që përcolli punën e kuvendit ndër vite, Kosovë Gjoci.
“Një kohë e mbaj mend që ka qenë brenda tek ajo pjesa ku ne kemi qëndruar si gazetar sepse ka pasur periudha kur edhe e kemi pasur të ndaluar të rrimë në holl sepse dikur deputetet këtu kane pi cigare. Mandej me kohën kanë ndryshuar gjërat, ata kanë kaluar tek pjesa mbrapa por ky televizor realisht ka vite që qëndron këtu”, tha Gjoci.
Për një kohë, Gjoci thotë se iu shërbeu edhe gazetarëve.
“E mbaj mend në periudha të atëhershme kur kemi përdoru digdafon dhe kemi punuar kryesish për media të shkruara, e kemi përdor këtë televizor për me incizu zërin që na u është dashtë për ato çka është deklaru sepse atëherë edhe qasja në sallën ku tash shkojmë si media, nuk e kemi pas të drejtën me shku atje”, tha Gjoci.
Me një kërkim të thjeshtë në Google, vërtetohet se ky televizor është pjesë e një gjenerate tashmë të zhdukur, modelet analoge që shpenzojnë më shumë energji dhe nuk prodhohen më.
Në ndërkohë nga kuvendi bëjnë me dije se mos ndërrimi i tij nuk ka qenë për shkaqe mundësie, por vetëm për ta ruajtur si vlerë.
Të hënën e 15 shtatorit, një 40 vjeçar vdiq pasi u vra nga kushëriri i tij në Ferizaj.
Ky rast, shënon vrasjen e 14 në Kosovë që nga janari e deri tash.
Në ndërkohë sipas të dhënave të policisë, në periudhën janar 2015 – shtator 2025, 276 qytetarë janë vrarë nga armët.
Shumica prej këtyre vrasjeve sipas autoriteteve, thuhet të kenë ndodhur nga armë ilegale që qytetarët kanë në pronësi.
Megjithatë brenda këtij viti, policia ua ka marrë nga duar qytetarëve plot 1,039 armë ilegale.
Drejtori i përgjithshëm i policisë Gazemnd Hoxha, u bëri thirrje qytetarëve që t’i dorëzojnë apo legalizojnë armët.
‘’Shumë jetë janë humbur për shkak të armëve ilegale. Andaj ju bëjmë thirrje qytetarëve që të qëndrojnë larg armëve ilegale/ ata që janë pasionant të armëve MPB-ja ka rregulluar kuadrin ligjor dhe mund të aplikojnë për licencim’’, tha Hoxha.
Megjithatë juristët vlerësojnë se vetëm thirrjet nuk mjaftojnë.
Sipas Flamur Kabashit nga Insitituti i Kosovës për Drejtësi duhet më shumë angazhim nga policia për t’i çarmatosur qytetarët.
‘’Fakti që kemi raste të shumta të vrasjeve apo tentim vrasjeve është një indikator që duhet të ketë kontrolle më të rrepta nga ana e policisë, aksione, plane operative për kontrollimin e qytetarëve’’, tha Kabashi.
Sipas Kabashit, edhe gjykatat janë fajtore pasi shqiptojnë dënime të lehta për ata qytetarë që mbajnë armë pa leje.
‘’Nga 147 vendime të gjykatës që i kemi analizuar, në 128 vendime është shqiptuar dënimi me gjobë, në 18 dënimi me kusht dhe në vetëm 1 rast është shqiptuar dënimi me burgim edhe pse kjo si vepër penale e parasheh dënimin deri në 5 vjet burg’’, tha Kabashi.
Viti më i përgjakshëm ishte 2018-ta, ku 34 jetë u shuan nga armët.
Kanë kaluar 20 ditë që Kuvendi i Kosovës është jashtë funksionit, ndërsa afati i masës së përkohshme të pezullimit po i afrohet fundit. Gjykata Kushtetuese ende nuk ka bërë të ditur nëse do të marrë vendim përfundimtar para datës 30 shtator, kur edhe skadon pezullimi aktual.
Sipas një përgjigjeje zyrtare nga Kushtetuesja, çështja që lidhet me përbërjen e udhëheqjes së Kuvendit është ende në shqyrtim.
“Kjo kërkesë aktualisht është në procedurë të shqyrtimit. Për çdo vendim të Gjykatës do të njoftohen me kohë të gjitha palët e interesit dhe opinioni’’. Thuhet në përgjigjen e Gjykatës kushtetuese.
Naim Jakajt nga Instituti i Kosovës për Drejtësi, shprehe optimist se gjykata do ta vazhdojë masën e pezullimit.
‘’Në bazë të ligjit të Gjykatës Kushtetuese, por edhe rregullores së saj, po atë ditë kur e nxjerr vendimin, ajo e vazhdon edhe masën e përkohshme deri në publikimin e aktgjykimit, kur ai hyn në fuqi. Pra, Kuvendi nuk mund të mblidhet nëse masa vazhdohet pas 30 shtatorit’’, tha Jakaj.
Por edhe nëse kjo nuk bëhet, Jakaj vlerëson se deputetët s’do të duhej të vepronin para se vendimi të bëhet zyrtar.
‘’Në rast se nuk ka një masë të përkohshme kuvendi nuk do duhej të mblidhej përsëri sepse ka cenim të kushtetutshmërisë tek komunitetet jo shumicë, dhe në këtë rast duhet të pritet vendimi i gjykatës kushtetuese’’, tha Jakaj.
Nga ana tjetër, partia fituese e zgjedhjeve deri tani nuk ka treguar nëse do të ndërmarrë ndonjë veprim, në rast se masa pezulluese skadon pa vendim të ri.
Kuvendi është në pushim që nga 5 shtatori, meqë Gjykata Kushtetuese vendosi pezullimin e punës, pas anekses së Listës Serbe, që kontestoi se zgjedhja e nënkryetarëve nga radhët e komuniteteve pakicë, u bë në mënyrë anti kushtetuese.
Vendimi që çoi në këtë situatë u mor më 30 gusht, kur kryetari i Kuvendit, Dimal Basha, shpalli të mbyllur seancën konstituive të nisur që në 15 prill, duke deklaruar se Kuvendi është konstituuar, edhe pse pa përbërje të plotë, për shkak të mungesës së një nënkryetari nga komuniteti serb.
