Malisheva dhe Prishtina kanë mbyllur në barazim 1:1 duelin e vlefshëm për javën e nëntë të Superligës së Kosovës, në një përballje mes dy skuadrave që po synojnë kreun e renditjes.
Vendasit kaluan të parët në epërsi në minutën e 29-të, kur Xhemajl Ibishi gjeti rrugën drejt rrjetës, duke i dhënë Malishevës avantazhin dhe duke vënë në vështirësi skuadrën kryeqytetase.
Prishtina reagoi në pjesën e dytë, duke kërkuar me ngulm golin e barazimit. Këmbëngulja e bardhekaltërve u shpërblye në minutën e 76-të, kur Assane Diatta u tregua i saktë nga pika e bardhë e penalltisë, duke vendosur rezultatin përfundimtar 1:1.
Pavarësisht përpjekjeve të të dyja skuadrave në minutat e mbetura, rezultati nuk ndryshoi dhe secila prej tyre u desh të kënaqej me nga një pikë.
Barazimi nuk sjell ndryshime në krye të tabelës. Malisheva vazhdon të kryesojë me 20 pikë, ndërsa Prishtina renditet e dyta me po aq pikë, por me një ndeshje më pak të zhvilluar.
Kështu, gara për kreun e Superligës mbetet e hapur, me dy skuadrat që vazhdojnë të jenë në një luftë të drejtpërdrejtë për pozitën e parë.